Gunghcwngz Yauzcuz Swciyen minzcuz fungcingz lai cungj lai yiengh, minzcuz daegsaek noengznwd. Mboengqgonq, aen yienh neix youq Bingzanh Yangh gawjbanh aen hozdung yenzswnghdai Yauzcuz couxbawx haqlwg cunzyouz ndeu. Gyoengq dahsau Yauzcuz daenj buh moq vaq moq gyaeundei, sing loxlez goksagsag, aen giuzgeq Bingzanh gyaeundei, diuzdah lajgiuz raemx sawrwgrwg, goengqbya seiqhenz dah heuyauyau haenx, lijmiz minzcuz fungcingz daegsaek Yauzcuz gietvaen yizsi haenx, sawj gyoengqvunz yawj le haenh ndei mbouj dingz.

Yauzcuz conzdungj couxbawx haqlwg fungsug yizsi miz daejhaq、doiq fwen、couxbawx caeuq baiq dangz. Cunzyouz hozdung ngoenzde, caiq yienh le gij fungsug conzdungj Yauzcuz couxbawx haqlwg neix, sawj minzcuz fungsug caeuq gij raemxbya gyaeundei haenx doxdak doxboiq, ndeiyawj dangqmaz.

(Dangh Silieng)