Baksaek Si Yougyangh Gih Bingzhih Cunh dwg Baksaek Si、Yougyangh Gih song gaep hong minzcuz sifandiemj、seveicujyi lajmbanj moq sawqdiemj, 2008 nienz ndaej bingz baenz Guengjsae nungzyez lijyouz sifandiemj、Guengjsae cib aen mbanj ceiq yinxvunz. 2008 nienz 2 nyied 8 hauh, Cunghgung Cunghyangh cungjsuhgi、guekgya cujsiz、Cunghyangh Ginhveij cujsiz Huz Ginjdauh bae daengz aen cunh neix cunzyawj caemhcaiq caeuq vunzlai nungzminz dangdieg daxcaemh gvaq cieng gvaq.

Bingzhih Mbanjmoq Minzcuz gaxgonq dwg Baksaek Si You- gyangh Gih Yangzhih Cin Bingzhih Cunh Mbanjyabingz, youq baihsae singz Baksaek, dep henz Aenfai Baksaek Suijli Suhniuj, daengx mbanj 101 ranz gungh 402 vunz, cungj dwg Bouxcuengh. 2001 nienz, aenvih hwnjguh Baksaek Suijli Suhniuj Gunghcwngz cix senj dieg youq. 2005 nienz, vunzlai aen mbanj neix baengh gij ndei dep henz Fai Baksaek Suijli Suhniuj, couh youq henz fai hwnjguh mbanjmoq, 2007 nienz guhbaenz Bingzhih Minzcuz Fungcingzlaeuz aen ranz miz fungcingz vwnzva Bouxcuengh neix, riengzdwk aeu guh “nungzgyahloz” guhcawj, haidou daih hek, gij ngaizlajmbanj daegbied de, Bouxcuengh couxhek “eu、sup、boq” sam bouh gingqlaeuj de, gij dijyuz ndawbiengz、eu fwen doiq fwen biujyienj mizyinx de cungj hawj vunzlai da’byaengq sim’angq, yinx bouxhek bae youz bae cet, hawj “nungzgyahloz” baenz ndaw mbanj hangh hong vunzlai souhaeuj haemq lai ndeu. Daj 2012 nienz hainduj, Bingzhih Cunh dangguh bi haenx 9 aen mbanj okmingz lijyouz daegsaek Guengjsae caemhseiz cauxlaeb ndawde aen ndeu, ndaw mbanj haiguh aenmbanj gveihva、rogciengz aenranz gaijguh baecat daengj 14 aen hanghmoeg, roengzsim bae guh ndei gihcuj sezsih caeuq gunghgung fuzvu sezsih, daezswng lijyouz fuzvu goengnaengz, baenz aen gyauyuz gihdi hawj vunzlai rox guekcingz yiengcingz ndeu, baenz gizdieg Baksaek “lijyouz saeknding” ndawde dieg ndeu, hawj gyoengq hek ndaw gih rog gih engq gyaez bae ndaw mbanj youzcet.

Cunhminz Veiz Cujswngh angq dwk lwnh naeuz, geij bi neix ranz de lwgnyez okrog dajgoeng, ndaw ranz caemh guh di dajndaem dajciengx, souhaeuj bi beij bi lai, bi’gvaq daengx ranz cinghsouhaeuj 3 fanh lai maenz. Gyoengq vunzmbanj ranzranz cungj lumj ranz Veiz Cujswngh nei, doxgiet doxbang, haenqrengz bae guhhong, saedceij vuenyungz lai lo.