Vujmingz Yen Cwngzsiengh Cin Concenz Siujyoz youq baihdoengnamz Vujmingz yienh- singz, liz yienhsingz daihgaiq 23 goengleix, dwg Cwngzsiengh Cin aen hagdangz lajmbanj liz yienhsingz ceiq gyae ndeu. Aen hagdangz neix 1951 nienz laebguh, 1985 nienz hainduj guh Cuengh Gun song saw vah sonhag. Daengx aen hagdangz ciemq dieg 6648 bingzfanghmij, gencuz menciz miz 576 bingzfanghmij, doengh laeuz sonhag miz song caengz 8 aen gyausiz, aen fandangz moq miz 80 lai bingzfanghmij, faq ciengz- gvaengh 100 lai mij raez cang baenz roqciengz vwnzva, hagdangz sezsih boiq miz caez, ndaw hagdangz vanzging gyaeundei, youh cingh youh seuq. Aen hagdangz neix hagseng dwg daj ndaw henzgyawj 3 aen mbanj sou daeuj.

Aeu Laeb Daegsaek Dazyinx Banhhag

Dangqnaj, Concenz Siujyoz miz aen youwzbanh (banlwgnyez) ndeu, gungh 17 boux nyez, siujyoz ngeih daengz seiq nienzgaep 3 aen ban, gungh 28 vunz. Hagdangz miz 5 boux lauxsae, ndawde 5 boux miz daconh yozliz, 3 boux gaenq ndaej bingzguh siujyoz gaugaep lauxsae. Seizneix, youz aen leixniemh “homsaw rim hagdangz, lwgnyez angq majhung” neix dazyinx, aen hagdangz neix gaenq laebhwnj le banhhag daegsaek “swnjcienz vwnzva minzcuz, fazcanj vwnzdij dwzcangz”, youq guhhong ndawde genhciz sien guh ndei swhsiengj binjdwz gyauyuz, aeu hong sonhag guhcawj, aeu hozdung guh bingz- daiz, haenqrengz cauxguh aen hagdangz angqyangz、vuenyungz ndeu.

Bouxboux Cungj Angq Hag Maij Doeg

Lai bi daeuj, aen hagdangz neix mboujduenh gyarengz ciuq leixniemh hengzguh, doenggvaq hozdung swnjcienz vwnzva minzcuz hawj lauxsae hagseng yawj ndaej raen、lumh ndaej deng、guh ndaej daengz, coi hawj hagseng fazcanj. Baez daengz haihag, hagdangz cungj guh lijsiengj gyauyuz hozdung, hawj hagseng ndaw sim miz maqmuengh. Bingzciengz cungj hai duzsuhsiz, heuh gyoengq hagseng ndaw hagdangz neix lai doeg saw, doeg sawndei, hawj saw buenx gyoengqde majhung. Bingzciengz guh doegsaw doxdax、gangj gojgaeq doxdax、sij saw doxdax、vwnzyi comzyienj、dijyuz doxdax、diuq fouxvunzlai、ok banjbau daengj hozdung, hawj gyoengq hagseng caeuq saw guhdoih; guh ndei seiz roengzdangz hozdung, hwnj ndei dangz “goq angqyangz” ndeu, hawj gyoengq hagseng gvaq ndaej vuenyungz.

Youq Seiz Roengzdangz Angq Guh Minzcuz Dijyuz

Gaenh bi daeuj, Concenz Siujyoz youq seiz roengzdangz hozdung anbaiz le minzcuz dijyuz hozdung, hawj hagseng gamjsouh dijyuz Bouxcuengh, lumjnaeuz dwk lwggyangq、bau aendomq、san lamzva、diuq guengh、diuq fouxfaexsaux、bengcag、diuqcag daengj hozdung; guh hozdung seizde, aen hagdangz neix cuengq gij go Bouxcuengh, lumjnaeuz《Niq Dahniq》《Haeuxnaengj Haj Saek》daengj, gij go neix yienh’ok le vwnzva Bouxcuengh gig ndei. Seiz roengzdangz hozdung gaenq baenz mbaw mingzben gyaeundei gven- daengz Vujmingz gyauyuz ndeu; lai bi daeuj, Concenz Siujyoz youq daengx cin doxdax guh seiz roengzdangz hozdung ndawde cungj aeundaej itdaengjciengj、ngeihdaengjciengj, cingzcik gig ndei.

Sonhag Sawcuengh Miz Yaugoj Dahraix

Daj 2014 nienz 3 nyied hainduj, Concenz Siujyoz daengx hagdangz sonhag Sawcuengh、dijyuz、meijsuz、yinhyoz daengj, neix couhdwg ndaw hagdangz daengxcungq hagseng comz youq giz ndeu hwnjdangz. Goq Sawcuengh youz song boux lauxsae ciuq sawson doengzcaez bwh goq, doxlwnz hwnjdangz, moix cou 3 dangz. Gaenh bi daeuj, gyoengq hagseng ndaw hagdangz neix engqgya maij hag Sawcuengh, gij naengzlig dingq、gangj、doeg、sij Sawcuengh de mboujduenh daezsang. Youq 2014 nienz daengx gih gangj goj Vahcuengh doxdax ndawde, aen hagdangz neix miz boux hagseng ndeu ndaej ngeihdaengjciengj.