Duh’anh Yauzcuz Swciyen Dahingh Yangh Mbanjmoq Minzcuz Vahgangh youq gak gaep dangjveij cwngfuj caeuq mizgven bumwnz gvensim bangcoengh lajde, baengh gij vanzging sengcingz gyaeundei de, haifat lijyouz hanghmoeg caeuq swnjcienz vwnzva minzsug Bunujyauz dangdieg, roengzrengz guh hong dajndaem dajciengx, cauxguh aen cunh lijyouz sengcingz mizmingz, saedceij vunzlai bi ndei gvaq bi, bongh hwnj diuzroen gvangqlangh vuenyungz saedceij siujgangh.

Mbanjvahgangh dwg gij mbanj Duh’anh Bunujyauz comzyouq haenx ndawde aen ndeu, ngamq miz 36 ranz 129 vunz, cungj dwg vunz Yauzcuz, vunzmbanj simsoh gaenxhong, doxgiet doxhuz, 2006 nienz ndaej lied guh Hozciz Si lajmbanj moq seveicujyi hwnjguh sawqdiemj, 2012 nienz ndaej lied guh “guekgya feihvuzciz vwnzva yizcanj hanghmoeg Mizlozdoz soncienz caeuq hagsib gihdi”、 Swcigih aencunh swnghdai lijyouz mizmingz hwnjguh sawqdiemj. Geij bi neix daeuj, aen mbanj neix hopheux aen muzbyauh cauxguh aencunh swnghdai lijyouz fuzbinz mizmingz neix, cienzmienh haiguh ranzyouq daegsaek gaijguh gunghcwngz, doengzseiz guh ndei gij hong diuzroen ndaw mbanj gaijguh、caujgiciz、bouxvunz doenghduz gwnraemx、vwnzva dijyuz sezsih caeuq loegvaq gunghcwngz daengj, youq baihgwnz bangbouj mbangj ngaenz lajde, vunzlai gag baengh swhgeij caezsim roengzrengz bae guh, ceklid gij ranznamhvax caeuq ranzhaz haenx bae, guhbaenz 28 aen ranzlaeuz cien caep, lij hwnj le aen laeuz vujbauj song caengz miz 10 fungh ranz 220 bingzmij ndeu, guhbaenz diuz roenmbanj seiqgaep raez 3.5 goengleix ndeu, ndawde miz 1.2 goengleix dwg roen suijniz; lij guhbaenz aen lanzgiuzcangz ndeu, aen daizheiq ndeu, aen daemz ndaej rom raemx 300 lizfanghmij ndeu, ranzranz guh miz caujgiciz, diuzluengq gyanghongh bingzbwd seuqcingh, faex heu va hom. Doengzseiz, ndaw mbanj ciuq saedsaeh bae guh, haenqrengz hwngfat lijyouz canjyez、fungsug minzcuz vwnzva canjyez caeuq daeg- saek dajndaem dajciengx canjyez, mboujduenh demlai souhaeuj. Seiz- neix, daengx mbanj ndaem miz gomakhwzdauz 210 moux (gya hwnj mbanj henzgyawj lienzbenq ndaem miz 620 moux), moix bi ndaem oij 150 moux, lij laebguh aen suen ndaemganq Ywyauzcuz ndeu gungh 180 moux, ndaemganq miz goyw 60 lai cungj; banh miz aen ciengz- ciengxgaeq ndaw ndoengfaex ndeu, moix bi ciengx gaeqdoj 300 lai duz. Bi’gvaq, daengx mbanj nungzminz moix vunz bingzyaenz ngaenzyienh souhaeuj dabdaengz 5089 maenz.

Vih hawj vunzlai vwnzva swnghhoz engq lai cungj lai yiengh, daezsang vunzlai suciz, Mbanj- vahgangh laebbaenz le Bunujyauz Yozdonz, vatra、swnjcienz Yauzcuz Mizlozdoz vwnzva, doenggvaq yienjok senhconz dangj raeuz minzcuz cwngcwz, haenhdanq vunz ndei saeh ndei ndaw mbanj, yozdonz cawz youq ndaw cunh ndaw yangh yienjok le, lij bae Yaau Yangh daengj gij yangh henzgyawj yienjok, guh vwnzva doxgyau, mboujduenh daezsang yienjok suijbingz. Aen cezmuz 《Foux Nyenz》biujyienh fungsug sibgvenq Yauzcuz youz aen yozdonz neix youq Hozciz Si、Swcigih daengj daihhingz vwnzva comzyienj ndawde yienjok cungj ndaej haenhndei. Bineix ndwencieng gaxgonq, aen mbanj neix youh dued ndaej Hozciz Si gaiq daih’it “aenmbanj ceiq gyaeundei” mingzdaeuz ndei.