Geij ngoenz gonq, Ningzmingz Yen Yinzminz Fazyen boux fazgvanh Bi Denhbingz aeu Vahcuengh saemj- leix aen anq lizvwnh gvendaengz Cinz moux gauq Vangz moux. Ciuq cam rox, langhnaeuz aeu Vahgun saemj aen anq neix couh deng aeu aen buenq cung cij saemj sat, Bi Denhbingz boux fazgvanh neix aeu Vahcuengh saemjleix le cij yungh 40 faencung.

Cinz moux(mehmbwk) caeuq Vangz moux youq 2008 nienz 2 nyied daengz Ningzmingz Yen Minzcwnggiz dwnghgi gietvaen, daengzlaeng aenvih songde doxceng, Cinz moux doenggvaq mbaw sawgauq ndeu gauq daengz fazyen iugouz caeuq Vangz moux lizvwnh. Youq guh fazdingz saemjleix seizde, aenvih Cinz moux mbouj rox gangj Vahgun, Bi Denhbingz couh aeu Vahcuengh daeuj saemjleix aen anq neix.

Ciuq cam rox, Ningzmingz Yen vunz Bouxcuengh lai, Vahcuengh dwg cungj vah haujlai vunz gangj de, bingzciengz vunzlai aeu Vahcuengh daeuj doxgyau. Vihliux hawj vunzlai guh saeh gauq lai fuengbienh、daezsang yauliz banh’anq, Ningz- mingz Yen Yinzminz Fazyen heuh dingzlai gangingj hag Vahcuengh dangdieg; youq laeb’anq、 haeuj mbanj soengq saw、hai dingz、diuzgaij、buenqanq seizde, dingzlai gangingj rox aeu Vahcuengh caeuq vunz dangdieg doxgyau.

Ningzmingz Yen Yinzminz Fazyen aeueiq hawj vunzlai saujsu minzcuz hengz gij gienzleih gauq- saeh, youq banh’anq seizde, aen fazyen neix doengzeiq vunz saujsu minzcuz aeu vah saw minzcuz bae gauq, handap vunz gauq, gangj leixyouz、lwnh yigen. Aeu Vah- cuengh banh’anq, hawj vunzlai caeuq ganbu engqgya nemgyawj, hawj vunzlai gauqsaeh lai fueng- bienh, daezsang le banh’anq yauliz, ndaej vunzlai haenhndei.

(Loz Yangzyinz/罗扬云)