Yungzhoz Gvanghcaij Yozyau dieg youq mbiengjsae Lungzanh Yen Yengyangh Cin, yozyau caeuq “namzbaek” ngeihgaep goengloh doxnem, liz yienhsingz miz 12 goengleix. Yozyau ciemq dieg miz 20 moux, youq bi 1935 banhhag, dwg aen yozyau lajmbanj ndeu. Seizneix miz ranz sonhag 1605 bingzmij, miz 3 aen nienzgaep (1-3 nienzgaep), 84 boux hagseng, dingzlai dwg lwgnyez louzsouj, 6 boux lauxsae, ndawde miz boux ndeu dwg bwnjgoh, 4 boux dwg daconh, boux ndeu dwg cunghconh. Gij baijbouh yozyau hableix, ndaw hag va、rum、faex heuswd mwncup, gyaeundei raixcaix, dwg aen dieg ndei lwghag hagsib he.

Yungzhoz Gvanghcaij Yozyau itcig swnjcienz gij yaufungh (gouzsaed、haivat、gaenxhwnj、ceng aeu daih’it)、gyaufungh (doxgiet、gaenxgyaek、haivat、gienhawj)、yozfungh(roxhag、angqhag、vuedhag、laihag) daeuj banhhag. Geij bi gvaqdaeuj, yozyau ndaej daengz gyauyuz bumwnz caeuq gak gaep dangjveij cwngfuj cihciz caeuq bangcoh, diuzgienh banhag ndaej gaijbienq haujlai. Yozyau seizneix miz aen laeuz sonhag ndeu, aen laeuz cunghab ndeu caeuq aen laeuz lauxsae youq ndeu. Ca mbouj geijlai ndaej muenxcuk sonhag caeuq swnghhoz gyoengq lauxsae caeuq hagseng.

Youq sonhag ndawde, yozyau gaemndei gij hong cangzgveih guenjleix, sonhag cizlieng bi beij bi ndaej daezsang. Yozyau lingjdauj doxgiet gapguh, gaenx ra gij roen fazcanj yozyau haenx. Doengzseiz gaemndaet guenjleix, haenqrengz sawj aen yozyau mboujlwnh sonhag roxnaeuz gingjsaek cungj ndaej baiz youq baihnaj gij hagdangz lajmbanj.

Yozyau youq 1982 nienz hainduj yungh Sawcuengh Sawgun song cungj saw vah sonhag, genhciz gij yenzcwz “aeu Cuengh guhcawj, Cuengh Gun giethab, aeu Cuengh coi Gun, Cuengh Gun cungj rox”, dangseiz, Cuengh Gun song saw vah sonhag hwnj ndaej gig swnhleih. Hoeng doeklaeng aenvih miz gak cungj yenzyinh, guh mbouj ndei doxciep, miz geij bi dwg dingzdingz duenhduenh ciep mbouj hwnj. Gaenh geij bi neix gvaqdaeuj, yozyau youh dauqcungz giphwnj Sawcuengh, okrengz bae ra gij mozsi hab yozyau sonhag haenx. Daj 2012 nienz hwnj, yozyau hainduj youq yozcenzbanh guh Cuengh Gun sonhag ngeihloih mozsi. Yozyau seizneix miz 6 boux lauxsae ndawde couh miz 4 boux dwg youq Gvangjsih Minzcuz Cunghconh bizyez, cungj dwg rox Sawcuengh, lingh song boux hix dwg bae camgya gvaq gyauyuzdingh gawjbanh aen ban Sawcuengh cogaep beizyin haenx le hag rox Sawcuengh. Seizneix yozyau youq yozcenzbanh hai goq son Sawcuengh, it daengz sam nienzgaep moix aen singgeiz cungj anbaiz miz song dangz Sawcuengh.

Geij bi neix daeuj, Lungzanh Yen Gyauyuzgiz hix yawjnaek Sawcuengh sonhag, moix bi cungj gawjbanh gij hozdung caeuq Sawcuengh mizgven haenx, caemhcaiq daiq lauxsae Sawcuengh daengz Dwzbauj caeuq Gveigangj daengj yienh(si) bae hagsib sonhag gingniemh. Yozyau lauxsae bae hagsib dauqma le, cungj aeu gij gingniemh Cuengh Gun song saw vah sonhag yozyau yienh wnq giethab gij daegdiemj yozyau swhgeij daeuj guh sonhag, aeundaej cingzcik ndei. Yozyau baeznaengz baij Cuengh Gun lauxsae camgya daengx yienh gawjbanh gij hwnjdangz doxdax caeuq gangjgoq doxdax haenx, cungj aeundaej cingzcik ndei dauqma. 2014 nienz, daengx yienh Cuengh Gun song vah gangjgoq doxdax youq Yungzhoz Gvanghcaij Yozyau gawjbanh, yozyau lauxsae camgya doxdax haenx aeundaej cingzcik ndei；aen haggeiz 2014 buenqbilaeng youh youq ndaw yozyau guh Cuengh Gun song saw vah sonhag hwnjdangz doxdax, cingzcik hix gig ndei. Gyoengq lauxsae mboujdanh camgya ndaw yienh hozdung, Swcigih Gyauyuzdingh banh gij hozdung haenx hix cizgiz camgya, lumj lunvwnz doxdax、gangjgoq doxdax daengj, cungj aeundaej cingzcik ndei. Mboujdanh dwg lauxsae camgya hozdung, gyoengq hagseng hix gig angq camgya gak cungj Cuengh Gun song saw vah hozdung, 2012 nienz, hagseng camgya ndaw yienh siujhagseng byauhcunj Vahcuengh dungxcaiz byaujyenj doxdax, ndaej daih’it mingz, ndaej daibyauj daengx yienh bae Nanzningz camgya daengx gih siujhagseng byauhcunj Vahcuengh dungxcaiz byaujyenj doxdax. Moix bi daengx gih gawjbanh gij hagseng byauhcunj Vahcuengh gangjgoj dox- dax haenx, hagseng yozyau cungj dwg cizgiz bae camgya. Gyoengq lwgnyez ndaej okrog bae camgya gak cungj hozdung, raen daengz gij seiqgyaiq hung, gak fuengmienh cungj ndaej daengz duenhlienh caeuq daezsang, yienghneix lwgnyez sim’angq, boh- meh gyoengqde sim’angq, lauxsae sim’angq, ndigah baez miz hozdung, gij bohmeh hagseng caeuq vunzmbanj cungj gig haenhndei caeuq cihciz.

Yozyau lingjdauj gig yawjnaek hong Cuengh Gun song saw vah sonhag. Vihliux hawj gyoengq lauxsae daezsang gij suijbingz hwnjdangz swhgeij, yozyau moix bi、moix aen haggeiz cungj baij lauxsae camgya gak cungj beizyin, daegbied dwg Swcigih Gyauyuzdingh gawjbanh gak cungj Cuengh Gun song saw vah beizyin. Yozcenzbanh lauxsae lienzdaemh geij bi camgya “angqhag Sawcuengh” beizyin, lij miz yijvwnz、suyoz guzgan lauxsae beizyin, banhcujyin beizyin, saenqsik beizyin, Cuengh Gun song saw vah yozyau yaucangj beizyin daengj. Lauxsae ndaej bae beizyin lai, sawj lauxsae sonhag gingniemh cuk, sonhag fuengfap lai, sonhag yaugoj hix lwenqda. 2013 nienz, yozyau bingz ndaej “Lungzanh Yen Yivu Gyauyuz Guenjleix Gunghcoz Youhsiu Danhvei ”aen cwnghauh miznaj neix, 2014 nienz, yozyau youh ndaej bingz guh “Lungzanh Yen Gyauyuz Hidungj 2013 Nienzdoh ‘Senhcin Gyaugungh Ranziq’” aen cwnghauh najrongh neix.

Yungzhoz Gvanghcaij Yozyau ndaej gak gaep cwngfuj bumwnz cijdauj caeuq cihciz, yaek laebdaeb haenqguh gij hong Cuengh Gun song saw vah sonhag, siengsaenq baelaeng de yaek fazcanj ndaej ngoenz beij ngoenz ndei.