Seizcin fuengz bingh ciengx ndang gwn maz cuk ne? Baihlaj gaisau geij cungj cuk cawjfap hawj daihgya senj yungh.

Cukbyaekginzcai: Moix baez aeu 120 gwz byaekginzcai dwk raemx ngauzcawj aeu raemx, caeuq 150 gwz haeuxsuen caez cawj cuk, langh raeujremh seiz gwn. Seizcin heiqyiengz aendaep yungzheih doengh, ciengz hawj huj aen’daep swng sang, hawj vunz okyienh gyaeuj in da raiz daengj bingh. Boux ndang miz bingh caeuq boux cungnienz bouxlaux, ciengz gwn di cukbyaekginzcai ndeu, doiq gyangq hezyaz、gemjsiuj sim fanz miz itdingh ndeicawq. Seizcin lwgnyez hwnjcimj lai, ndaej cawj di cuk- byaekginzcai ndeu hawj de gwn.

Cukvagut: Aeu 50 gwz vagut, 100 gwz haeuxsuen, di dangznae ndeu. Sien dwk raemx baek vagut aeu raemx, caiq caeuq haeuxsuen caez cawj cuk, gya dangznae yungz le haethaemh gwn. Bouxcungnienz caeuq bouxlaux seizcin gwn cungj cuk neix, mboujdanh ndaej yw rumz ndat gyaeuj in、da raiz rwz maenj, ciengzseiz gwn ndaej hawj vunz ndang soeng rwz singj da raeh, doiceiz aenndang nyieglaux.

Cukmaenzcienz: Aeu 100 daengz 200 gwz maenzcienz swiq seuq ronq baenz gep, caeuq 100 gwz haeuxsuen caez cawj cuk gwn. Yienhdaih yozlij yenzgiu ndaej rox, maenzcienz hamz miz denfwnjmeiz、danbwz dangz caeuq swyouz anh- gihsonh、youzlauz、dansuij vahoz- vuz、veizswnghsu C daengj, gwn de miz bouj. Bouxcungnienz caeuq bouxlaux seizcin ciengzseiz gwn, bouj ik gig lai.