Dungzlingj Cin youq baihnamz Dahgenzgyangh Vujsenh Yen, daengx cin miz 6.6 fanh vunz. Aen cin neix lizsij vwnzva gyaeraez, ndawde Bouxcuengh “foux roegdingdiuj” gig mizmingz, swnjcienz geij bak bi lo. Seizneix, Dungzlingj Cin Cungh- sinhyau guenj bonjhag caeuq 13 aen hag lajmbanj. Daengx hag miz lauxsae 198 vunz, it daengz roek nienzgaep hagseng 3436 vunz, ndawde Boux- cuengh ciemq 90%. Aen hag neix daj 2013 nienz hengzguh Cuengh Gun song saw vah sonhag, dwg daengx gih aen hagdangz Cuengh Gun song saw vah sonhag ceiq cungyau ndeu.

It. Gyagiengz lingjdauj minz- cuz gyauyuz

Geij bi neix daeuj, Dungzlingj Cin Cunghsinhyau dawz minzcuz gyauyuz dangguh hangh hong youqgaenj ndeu, doigvangq saedhengz Cuengh Gun song saw vah sonhag. It dwg gyagiengz lingjdauj. Baij boux fuyaucangj ndeu cienmonz guenj hong Cuengh Gun song saw vah sonhag, boiq miz Sawcuengh fujdaujyenz. Ngeih dwg gyagiengz senhconz. Guh minzcuz vwnzva senhconzlanz daeuj senhconz Cuengh Gun song saw vah sonhag, sawj vunzlai rox minzuz cwngcwz, caez guh ndei hong minzcuz doxgiet.

Ngeih. Daengx cin saedhengz Cuengh Gun song saw vah sonhag

Dungzlingj Cin Cunghsinhyau gaxgonq cijmiz Sinhlungz Siujyoz saedhengz Cuengh Gun song saw vah sonhag. 2012 daengz 2013 nienz, aen hag neix ciuq Swcigih 《Gij Yigen Gvendaengz Caenh’itbouh Gyagiengz Cuengh Gun Song Saw Vah Sonhag》（Gvei cwngban fat 〔2012〕329 hauh）cingsaenz, ginggvaq haujlai baez diucaz yenzgiu, gietdingh daengx cin saedhengz Cuengh Gun song saw vah sonhag.

Dungzlingj Cin Cunghsinhyau saedhengz Cuengh Gun song saw vah sonhag faen song yamq byaij.

It dwg gya’gvangq Sinhlungz Siujyoz. 2012 nienz dawz Dadungz、 Yinzhan caeuq Liengzdienz sam aen siujyoz gyawj haw Sinhlungz neix gyoeb haeuj Sinhlungz Siujyoz. Dadungz、 Yinzhan caeuq Liengzdienz cij banh gyauyozdenj. Sinhlungz Siujyoz seizneix miz 40 lai aen ban, hagseng 1200 lai vunz, daengx hag saedhengz Cuengh Gun song saw vah doengzbouh sonhag.

Ngeih dwg daengx cin siujyoz saedhengz Cuengh Gun song saw vah sonhag.

Daj 2013 nienz hwnj, Dungzlingj Cin youq daengx cin gak aen siujyoz mbehai Cuengh Gun song saw vah sonhag, gietdingh youq cunghsinhyau caeuq lajmbanj siujyoz hengzguh Cuengh Gun song saw vah mozsi ngeihloih sonhag. Daengz neix, Vujsenh Yen saedyienh Cuengh Gun song saw vah sonhag daj aen hag ndeu bienqbaenz daengx cin hengzguh, gij gveihmoz Cuengh Gun song saw vah sonhag ndaej daengz caenh’itbouh mbe’gvangq.

Seizneix, Dungzlingj Cin Cuengh Gun song saw vah sonhag miz song cungj mozsi: It dwg Sinhlungz Siujyoz caeuq geij aen gyauyozdenj gyawj haw Sinhlungz neix laebdaeb guh Cuengh Gun song saw vah doengzbouh sonhag, ngeih dwg Dungzlingj Cin Cungh- sinhyau bonjhag caeuq geij aen siujyoz gyawj haw Dungzlingj neix hengzguh Cuengh Gun song saw vah mozsi ngeihloih sonhag.

Sam. Beizyangj lauxsae Saw- cuengh Sawgun cungj rox son

Dungzlingj Cin Cunghsinhyau yawjnaek beizyangj lauxsae, moix bi cungj cujciz lauxsae hag gij cwng- cwz minzcuz、 《Byauhcunj Gocwngz Sawcuengh》, geij bi neix daeuj cujciz lauxsae bae rog dieg yawjngonz hagsib haujlai baez. Aen hag neix mboujdanh gaenx baij lauxsae bae camgya gak cungj beizyin, lij gag banh geij geiz Sawcuengh beizyinbanh. Daj 2010 nienz daeuj, Dungzlingj Cin Cungh- sinhyau lauxsae gungh miz 126 vunz camgya gvaq gak cungj beizyinbanh ndaw hag caeuq rog hag, miz 7 vunz aeundaej bonjcingq Vahcuengh Saw- cuengh suijbingz gaujsi.

Seiq. Cizlieng Cuengh Gun song saw vah sonhag ndaej daezsang

Dungzlingj Cin Cunghsinhyau dawz Cuengh Gun song saw vah sonhag lied haeuj cangzgveih guenj- leix hagdangz bae

It dwg yungh 《Byauhcunj Gocwngz Sawcuengh》 guh cijdauj. Fujdaujyenz gaenx haeuj hagdangz dingq goq caeuq bingz goq, gyagiengz genjcaz caeuq cijdauj.

Ngeih dwg anbaiz ndei gyauyenz hozdung. Moix bi banh gij hozdung dijyuz minzcuz haeuj hagdangz、 fwengo minzcuz haeuj hagdangz, banh cozvwnz Sawcuengh doxdax、 Vah- cuengh byauhcunj doxdax、 lauxsae gangj goq doxdax daengj gak hangh gyauyenz hozdung.

Sam dwg anbaiz ndei cizlieng genjcwz. Moix bi cujciz roek nienzgaep hagseng camgya daengx gih Sawcuengh bizyez cwzsi, ndaw hag moix geiz cungj guh ndei cizlieng genjcwz. Geij bi neix daeuj, Dungzlingj Cin siujhagseng camgya daengx gih Sawcuengh bizyez cwzsi cungj aeundaej cingzcik ndei. Lumj 2014 nienz, daengx cin 174 vunz camgya, faenbingzyaenz ndaej 63.4 faen, gizgwzliz ndaej 67.7%, youh- siuliz ndaej 35.3%, ndawde 5 vunz doengz ndaej ceiq sang 97 faen.

Haj. Hozdung minzcuz vwnz- va lai cungj lai yiengh

Geij bi neix daeuj, Dungzlingj Cin Cunghsinhyau gawjbanh lai cungj lai yiengh hozdung daeuj senhconz minzcuz vwnzva.

It dwg dawz dagogenh hozdung banh ndaej lai cungj lai yiengh. Miz “foux roegdingdiuj”、 foux haizgieg- raez、 ringx gengxdiet、 diuq cagnyangj daengj, hawj hagseng rox minzcuz vwnzva bonjfaenh.

Ngeih dwg banh ndei ciet yisuzcez. Dungzlingj Cin cungh- sinhyau youq bi’gvaq 11 nyied co gawjbanh gaiq daih’it minzcuz vwnzva yisuzcez, sawj hagseng rox gij cihsiz minzcuz, baijyienj gij vwnzva ndei minzcuz, senhconz gij cingsaenz gaenxguh yiengq ndei.

Sam dwg yinxson gak aen ciet conzdungj. Lumjbaenz cietfwen “sam nyied sam” Bouxcuengh caeuq ciet- cingmingz, daiq hagseng bae ranz- gingqlaux guh saehndei. Ciet ngux- nyied co’ngux gangj gij goj Gizyenz gyaez guekcoj.

Doenggvaq doenghgij hozdung neix, sawj hagseng rox conzdungj vwnzva guekcoj raeuz, beizyangj hagseng gyaez dangj gyaez guekcoj.

2014 nienz 5 nyied, gyauyuzbu caeuq guekgya minzveij lienzhab diuyenzcuj bae daengz Dungzlingj Cin cazyawj minzcuz gyauyuz, gyoengq lingjdauj、 lauxhangz cungj haenh aen hag neix Cuengh Gun song saw vah sonhag caeuq minzcuz doxgiet gyauyuz guh ndaej ndei.

Samcib bi daeuj, Dungzlingj Cin Cunghsinhyau laebdaeb damqra diuz- loh minzcuz gyauyuz, song baez bingz ndaej Vujsenh Yen minzcuz yijvwnz gunghcoz senhcin cizdij. Seizneix daengx cin ndaej mbe’gvangq Cuengh Gun song saw vah sonhag, gyoengqde miz saenqsim dawz aen hag neix hong minzcuz gyauyuz guh ndaej engq miz daegsaek、 cingzcik engq ndei.