Saedhengz Cuengh Gun song saw vah sonhag 30 bi daeuj, Sinhlungz Siujyoz ciuq gyauyuz fanghcinh banhhag, yawjnaek minzcuz gyauyuz, gij cizlieng sonhag bi beij bi sang. Gyawj 10 bi neix, lauxsae ndaej si doxhwnj gak cungj mingzdaeuz ndei 11 vunzbaez, ndaej yienh gak cungj mingzdaeuz ndei 20 lai vunzbaez, hagseng ndaej yienh doxhwnj ciengj 147 vunzbaez, hagdangz ndaej “Daengx Gih Minzcuz Yijvwnz Gunghcoz Cizdij Ngeihdaengjgoeng”、 “Gyauyuz Gunghvei Senhcin Cizgungh Siujgyah”、 “Vujsenh Yen Minzcuz Yijvwnz Gunghcoz Senhcin Cizdij” daengj cwnghhau.

Sinhlungz Siujyoz youq Vujsenh Yen Dungzlingj Cin Haw Sinhlungz, 209 lohguek vang gvaq najdou hagdangz. Daj 1984 nienz daeuj, aen hag neix laebdaeb hengzguh Cuengh Gun song saw vah sonhag. Vujsenh Yen Sawcuengh haeuj hagdangz sonhag, suenq aen siujyoz neix ceiq caeux!

Youq lajmbanj Vujsenh Yen, Sinhlungz Siujyoz suenq dwg aen siujyoz haemq hung ndeu, daengx hag 40 lai aen ban, hagseng 1226 vunz, ndawde miz 415 vunz youq hagdangz dozninz. Lauxsae caeuq vunzhong miz 80 vunz, ndawde siujyoz gauhgiz lauxsae 51 vunz, bwnjgoh yozliz 19 vunz, lauxsae hozgwzliz 100 %.

Sinhlungz Siujyoz youq 1951 nienz 7 nyied guhbaenz, seizneix, daengx hag ciemq dieg 13000 lai bingzfuengmij, miz aen laeuzsonhag 2350 bingzfuengmij ndeu, miz aen laeuzrugninz hagseng 1616 bingz- fuengmij ndeu, miz aen laeuzgwnngaiz hagseng 1100 bingzfuengmij ndeu. Diegcauhcangz youh gvangq youh bingz, gak cungj sezbei lienhndang baij ndaej yungh bienh youh cingjcaez, gak cungj fuenghranz goengnaengz sonhag caeuq lauxsae banhgoeng sezbei hix cungj boiq ndaej gaeuq. Ndaw hag haujlai doxgaiq miz daegsaek minzcuz, seizneix dwg aen siujyoz ceiq gyaeu lajmbanj Vujsenh.

Sinhlungz Siujyoz soqlaiz yawj- naek Cuengh Gun song saw vah sonhag caeuq minzcuz doxgiet gyauyuz, sawj song hangh hong neix cungj guh ndaej gig ndei.

It. Guhsaed minzcuz doxgiet gyauyuz

Minzcuz gyauyuz gvendaengz minzcuz doxgiet、 guekgya onjdingh. Sinhlungz Siujyoz hengzguh Cuengh Gun song saw vah sonhag soqlaiz dawz minzcuz doxgiet gyauyuz guh muzbyauh. Aen hag neix laebbaenz siujcuj lingjdauj hong minzcuz gyauyuz, moix aen haggeiz dawz gak hangh hong Cuengh Gun song saw vah sonhag anbaiz ndaej ndei, sawj minzcuz doxgiet gyauyuz guh ndaej youh saed youh miz daegsaek.

Ngeih. Hong vwnzva minzcuz swnjcienz guh ndaej hoengh- hwdhwd

Vih guh ndei vwnzva minzcuz swnjcienz, Sinhlungz Siujyoz leih- yungh gak aen cindi senhconz vwnzva minzcuz.

Aen hag neix guh faq ciengz vwnzva minzcuz ndeu, veh dozndang- daenj 56 aen minzcuz, lij boiq sij gij cihsiz minzcuz. Ciengz vwnzva minzcuz miz doz youh miz cih, sawj hagseng yawj ndaej mizyinx doeg ndaej rox.

Gyawj geij bi daeuj, aen hag neix moix haggeiz cungj gawjbanh “minzcuz doxgiet haeuj hag” hozdung. Gonqlaeng gawjbanh “fwengo minzcuz daihgya ciengq”、 “vwnzva minzcuz daihgya ciep”、 “minzcuz doxgiet fwngz rag fwngz” daengj hozdung. Doenggvaq hozdung, sawj hagseng laebhwnj minzcuz swcunhsinh caeuq swhauzganj, roxdaengz minzcuz doxgiet yiyi naekna. Seizneix, daengx hag hagseng doxgyaez doxbang, aenhag huzndei ndaej daengz saedyienh.

Sam. Daezsang lauxsae sonhag suijbingz

Guh ndei Cuengh Gun song saw vah sonhag, lauxsae beizyin dwg ceiq youqgaenj. 2014 nienz, yienh gyauyuzgiz youq Sinhlungz Siujyoz gawjbanh Sawcuengh lauxsae sonhag naengzlig daezsang beizyinbanh. Aen beizyinbanh neix sawj lauxsae daez- sang lijlun suijbingz, youh daezsang sonhag naengzlig. 2014 nienz Sinhlungz Siujyoz camgya Swcigih caeuq ndaw yienh Cuengh Gun song saw vah sonhag gyauyenz hozdung 24 vunzbaez.

2012 nienz daeuj, Sinhlungz Siujyoz lauxsae camgya daengx gih Cuengh Gun song saw vah sonhag doxdax, miz 6 vunz ndaej itdaengj- ciengj, 6 vunz ndaej ngeihdaengj- ciengj, 14 vunz ndaej samdaengj- ciengj. Doenggvaq beizyin、 yozsiz、 doxdax, daengx hag lauxsae sonhag suijbingz daezsang gig lai.

Seiq. Daezsang gij cizlieng Cuengh Gun song saw vah sonhag

（It） Gawjbanh “minzcuz dijyuz haeuj hag” hozdung. 2014 nienz 1 nyied gawjbanh yauyinvei, ndawde miz haujlai hanghmoeg gig miz daegsaek minzcuz. Gvangjsih Minzcuz Bau banj Sawcuengh、banj Sawgun cungj baudauj yindungvei hai ndaej hoenghhwdhwd.

（Ngeih） Gawjbanh “gangj Cuengh eu fwen” doxdax. 2013 nienz 9 nyied gawjbanh “gangj Vahcuengh byauhcunj” doxdax, 2014 nienz 10 nyied youh gawjbanh “en fwen” doxdax.

（Sam）Camgya daengx cin Vah- cuengh caizyi biujyienj lwenqda dangqmaz. 2014 nienz 10 nyied 13 hauh Dungzlingj Cin gawjbanh Vahcuengh caizyi biujyienj doxdax, aen hag neix 3 vunz ndaej itdaengjciengj, 5 vunz ndaej ngeihdaengjciengj, cungjcingzcik baiz daengx cin baihnaj.

（Seiq） Camgya daengx gih gangj goj byauhcunj Vahcuengh doxdax ndaej ciengj lai. 2014 nienz 10 nyied, Sinhlungz Siujyoz 8 boux senjsouj camgya daengx gih gangj goj byauhcunj Vahcuengh doxdax, 2 vunz ndaej ngeihdaengjciengj, 5 vunz ndaej samdaengjciengj, baijyienj ok cingzcik ndei Cuengh Gun song saw vah sonhag.

（Haj） Camgya daengx gih Cuengh Gun siujyoz Sawcuengh cwzsi cingzcik ndei. 2014 nienz roek nienzgaep 146 vunz camgya daengx gih Cuengh Gun siujyoz Sawcuengh cwzsi, faenbingzyaenz 62 faen, gizgwzliz 68%, youhsiuliz 32.6%, cungjcingzcik baiz daengx gih baihnaj.