Baijcauhfanj Gveilinz youq Gveilinz Si Dijyuzcangz hai baez hoihhung fanh vunz ndeu, lienzdaemh baedaeuq Veiz Gozcingh baenz sam ngoenz. Camgya buenxdaeuq lij miz mbangj lingjdauj ganbu dangdieg. Veiz Gozcingh doq gwn yw doq guh genjcaz. Baijcauhfanj bik de daenj mauhsang, venj baizndaem, youzgai okcouj, de dauqma aen ranzyouq deng baijcauhfanj dawz haenx, lienz ning cungj ning mbouj ndaej saekdi lo.

Veiz Gozcingh naiqnueknuek ma daengz Namzningz le, gyoengq baij- cauhfanj gaenq cap haeuj gyanghongh Swcigih Dangjveij, ciengj ndaej gij gienz dangjveij. Hoeng, seizhaenx de ceiq gvansim lij dwg daengx gih cingeng ndaem naz. De heuh Swcigih Dangjveij boux misuhcangj Liuz Yiswngh bae doengcei cangzveij daeuj hai hoih, caemh hemq gij bouxdaeuz duetgienz haenx daeuj camgya. Veiz Gozcingh nyinhnaeuz, yaek cingeng lo, wnggai fat aen doengcei hawj gak dieg, heuh gak dieg guh ndei cingeng. Bouxdaeuz baijcauhfanj dwg boux vunzhong bujdungh ndeu, cangzveij cam yigen de, de naeuz: “Doenghbaez baenzlawz guh seizneix cix baenzlawz guh!” Baezneix dwg dangjveij ndaw gih deng cung le, hai baez hoih cangzveij ceiq doeklaeng ndeu, caemh dwg Swcigih Dangjveij bonjgaiq fat aen vwnzgen ceiq doeklaeng ndeu.

Veiz Gozcingh mbouj ndaej gaemgienz le, mboujdwg deng “laeglingh” bae yawj bauqdaihcih, couhdwg deng hemq bae ciepsouh baedaeuq. Dandan youq ndwen ngeih daengz ndwen sam, cij cib lai aen baijcauhfanj gonqlaeng doxgap hai gij hoihbaedaeuq haemq hung haenx couh miz bet baez, haj roek fanh vunzbaez daeuj camgya gvaq, gij goengdaeuz dinghgiz doxhwnj haenx cungj deng bae camgya gij baebuenq byoengq lauxdaej gyoengqde haenx.

Caenhguenj gij bauqdaihcih “feiz coemh”、“hat maenj”、 “dub laemx” de haenx sanq doh gwnzbiengz, hoihbaebuenq hawj de daenj le aenmauh “fanjgwzming siuhcwng- cujyi”、 “bouxrwix samfanj”、 “bouxdaeuz byaij roen swhbwnjcujyi” daengjdaengj, hoeng de sim net raixcaix. Aenvih, baenz ciuhvunz de cungj gig cungsim aendangj、lwgminz caeuq hongsaeh seveicujyi, guh vunz lauxsaed, simcingh ndangseuq, coengzlaiz mbouj loengh gvaq yaemgoeng.(caengz sat)

□ Hoz Saubangj sij Cinz Siengzcouh Liuz Gingliuj Cinz Siengzgen hoiz