(ciep geiz gonq)

Gou muengz ciep vah gangj:“O, gou nyinhnaeuz diuz loh neix lakvaih lo, laxlawz dwg caiq coih loh. Yaek coih baenz cungj loh lawz bae ne?”

Saefouh han:“Mboengqgonq, ndaw yangh raeuz ceng ndaej aen hanghmoeg coih loh neix, dingq hanghmoeg ginghlij gangj, yaek dawz diuz loh neix coih baenz diuz lohsuijniz, gvangq seiq mij haj. Ne, neix mbouj dwg cingq gya’gvangq song mbiengj loh ma.”

“O, caen ndei ho, maqmuengh sou lai ganjgoeng di, ceng youq lajcieng coih ndei bae, daengz seizhaenx, gyoengq beixnuengx daj baihrog ma ranzmbanj couh fueng- bienh lai lo.”

Saefouh ngaekngaek gyaeuj, riunyum hai aen gouhgih daengz henz loh bae, nyiengh loh hawj gou gvaqbae. Gou docih saehfouh le sikhaek dauqma ndaw ci, hai ci gvaq henz gouhgih, coh baihnaj ganjloh lo.

Gvaq seiqcib lai faencung le, dou ma daengz gemhmbanj, baihnaj lwgda gou baez rongh. Aiya, ranzmbanj bienqvaq daih lo, bienq ndaej gou yaek mbouj saenq lwgda gou. Ngeihcib lai ngoenz gaxgonq, gou ma ranzmbanj yawj bohmeh, seizhaenx, diuzloh gwnzgemh doeng daengz ranzmbanj cix mbouj dwg yienghneix bingzbwd lwenqmyan. Ngamq gvaq ngeihcib lai ngoenz, diuz loh neix, gaenq bienqbaenz diuz lohsuijniz bingzbwd gvangqlangh ndeu lo.

Gou lij laebdaeb hai ci coh mbanj bae. Aenci cienq gvaq dieggoz ndeu, gou fwt fatyienh aen gingj moq ndeu, aen gingj moq neix couh dwg gyaeujmbanj daengj hwnj aen conghheuq sangngaungau ndeu, seizhaenx ndaw conghheuq cingq mauh’ok hoenzheu mbinbingbing. Ndawsim gou geizheih dangqmaz, caen mbouj rox gyoengqvunz ranzmbanj dou cingq guh gijmaz, seizlawz guh aen conghheuq youq gyaeujmbanj.

Lajbyonghngoenz sam diemj lai cung, dou dauqdaej swnhleih ma daengz ranz lo. Gou baez roengz ci, daxmeh gaenq ndwn youq bakdou caj dou, de angqvauvau roengz lae daeuj coux dou.

Daengz ndaw ranz, caengz naengh ndei, gou couh caeuq daxmeh gangj:“Caen siengj mbouj daengz ha, vahsug gangj ‘doxbiek sam ngoenz, yaek lingh da yawj vunz’. Byawz rox, ngamq gvaq bae ngeihcib lai ngoenz, mbanj raeuz bienq ndaej baenzneix lai lo!”

Daxmeh ngaekngaek gyaeuj, riu gangj:“Dwg vei, daj mwngz mbat gwnz liz ranz baema ndaw yienh le, baihgwnz couh hawj cienz hawj mbanj raeuz coih roen, gyangmbanj raeuz cungj bu baenz roensuijniz. Diuzmieng gyangmbanj hix yungh suijniz dauj baenz, gwnz mieng lij hoemq hwnj gaiq benjsuijniz dem. Gyangmbanj raeuz couh yaek bienqbaenz ndaw- singz, gizgiz diegdieg cungj bingzbwd、lwenqmyan、seuqsak.”

“Haxbaenh ma daengz naj gemh- mbanj, gou laihnaeuz dwg byaij loeng roen lo.” Gou riu naeuz.

“Haxbaenh sou hai ci gvaq gyang doenghnaz seiz, yawjraen aen congh- heuq gyaeujmbanj lwi?” Daxmeh cam.

“Gou yawjraen lo, gou lij geiz- heih dangqmaz ne. Youq gyaeujmbanj guh aen conghheuq haenx, miz gijmaz yunghcawq la?” Gou doq han doq cam.

Seizneix, daxboh cingq yamqdin ma ranz, de dingqnyi gou baenzneix cam, swnj vah gangjnaeuz:“Aen conghheuq neix yunghcawq lai lo. Gaxgonq caengz miz de, gyangmbanj caeuq henzmbanj dauqcawq miz nyapnyaj, daj guh baenz aen conghheuq le, vunz ndaw mbanj gyonj rom nyapnyaj daengz gizhaenx bae, rom rim baez, ndaw mbanj couh baij vunz bae diemj feiz caemh nyapnyaj seuqsak bae……Mwngz naeuz aen conghheuq neix yunghcawq laux lwi?” Seizneix, gou cij rox vihmaz youq gyaeujmbanj guh aen conghheuq haenx lo.

Seizhaenx, mbwn hix ngamq laep roengzdaeuj. Dou daengx ranzvunz homh youq aen daizluenz gwnhaemh, miz gangj miz riu, ndaw ranz angqyangz nauhyied dangqmaz.

Haetlaeng, gwn haeuxcaeux le, gou couh caeuq yahlwg bae ndaw mbanj henz mbanj youz baez ndeu, yawjraen ranzmbanj laeuz sang hausag, roen mbanj bingzbwd lwenqmyan, miengraemx sawcingx laeliklik, ranzranz cungj miz daemz caujgi, yiengh seizgonq ranz mbanj uqla haenx, lienz aen ngaeuz hix ra mbouj raen lo.

Byawz naeuz lajmbanj beij mbouj ndaej ndawsingz? Danghnaeuz mbouj saenq, gou maqmuengh daihgya bae lajmbanj ranz gou yawjyawj!

Maqmuengh ranzmbanj ngoenz beij ngoenz ndei! Maqmuengh aen conghheuq gyaeujmbanj hoenz- ngeungeu haenx, ciengxlwenx hoenz- ngeu roengzbae. (sat)