Denzlinz Yen Licouh Yauzcuz Yangh Cunghsinhyau dwg youq Denzlinz Yen mbiengj baihdoeng, liz yienhsingz 20 goengleix gyae. Daengx yangh miz 17000 lai gyaeujvunz, guenj miz 9 aen hingzcwng cunh, 82 aen dunz, ciengzgeiz miz Cuengh、Gun、Yauz 3 aen minzcuz cab youq. Licouh Yauzcuz Yangh ngamq miz aen cunghsinhyau dog, de couhdwg Licouh Yauzcuz Yangh Cungh- sinhyau, youq bi 1933 hwnjbaenz. Daengx aen hagdangz ciemq dieg menciz dwg 7075 bingzfuengmij, gencuz menciz 4928 bingzfuengmij, miz 15 moux hagnungz gihdi. 48 boux lauxsae cienmonz hwnjdangz, haglig habgeklwd dwg 100%.

Geij bi neix daeuj, ginggvaq cwngfuj gyadaih roengzngaenz guh gyauyuz, Lizcouh Cunghsinhyau banhhag diuzgen gaijbienq lai lo, aen hagdangz neix baenz le gizdieg gyoengq cawjranz soengq lwg haeuj hag doegsaw he. Ginggvaq geij daih lingjdauj caeuq gyoengq lauxsae mboujduenh roengzrengz, hong sonhag gyauyuz rom ndaej haujlai gingniemh dijbauj. Bi 2010 hagdangz deng bingz guh sengjgaep “Yivu Gyauyuz Hagdangz Cangzgveih Gvanjlij Senhcin Danhvei”. Bi 2011 caeuq bi 2014 deng bingz guh Baksaek Si “Gyauyuz Gohyenz Senhcin Cizdij”. Lai bi deng bingz guh vwnzmingz danhvei caeuq bingzan hagdangz.

Geij bi daeuj, hagdangz yaubwnj goqdaez aeundaej itdingh cingzcik, yienh gyauyuz bumwnz youq aen hagdangz neix ciuhai daengx yienh yienhciengzhoih. Youq daengx yienh geij baez sonhag goqdangz ginwngz doxdax ndawde, sojmiz lauxsae camgya doxdax cienzbouh ndaej ciengj caez. Gohsouj iq youq daengx gih doxdax ndawde aeundaej it daengj ciengj. Bi 2013 caeuq bi 2014 youq daengx gih gangjgoj Vahcuengh doxdax、yienjgangj doxdax ndawde, gyoengq senjsouj aen hagdangz neix camgya doxdax cungj aeundaej it ngeih daengj ciengj. Youq daengx gih、daengx si yenjcwngz gyauyuz goqbaijyienj, gij senjsouj aen hagdangz neix hix aeundaej haujlai mingzdaeuz ndei. Sonhag cizlieng onjyamq daezsang, dijyuz yisuz youq daengx gih hix deng haenh ndei.

Geij bi daeuj, Licouh Cungh- sinhyau daih’it aen guh sat le sengjgaep goqdaez caeuq sigaep goqdaez gietdaez, youq dangz suyoz sonhag ndawde habbaenz le aen suyoz gwnzdangz sonhag mosik “vwndiz naengzlig” he, beizyangj le gij naengzlig hagseng lajmbanj daezok suyoz vwndiz, gaijbienq gyoengq hagseng gaxgonq najnyaenq mbouj gamj daezcam haenx, aen daih’it youq daengx yienh doengzgaep hag- dangz doenggvaq sengjgaep goqdaez, cienjbienq le gyoengq lauxsae sonhag gvanhnen, caepcauh ok aen goh- yenzhingz lauxsae duivuj ndei ndeu.

Vih guh ndei sonhag cangzgveih guenjleix, aen hagdangz neix gaijgwz gaxgonq sonhag guenjleix dijci, giethab hagdangz saedcaeq cingz- gvang, dingh ok le ithaehlied gwnzdangz sonhag guenjleix cidu, daj hagsib、giva、bwhgoq、hwnjdangz、cozyez、baegaij、fujdauj、gaujcaz、faensik、cungjgez、 gohyenz daengj cib lai aen fuengmienh bae youhva gamhanh. Doiq sonhag cangzgveih guenjleix yungh lienghvaq geiq faen aen banhfap neix, gwzgvanh goeng- cingq bae bingzdingh moix boux sonhag lauxsae. Bi 2014 ndwen 4, youq Baksaek Si Gyaugohsoj gawj- banh aen siujyoz yijvwnz lauxsae suyangj doxdax ndawde, aen hag- dangz neix Loz Beisun lauxsae aeundaej it daengj ciengj. Bi 2014 gij senjsouj aen hagdangz neix camgya daengx gih ginwngz doxdax ndawde aeundaej sam daengj ciengj, hix dwg daengx gih ngamq miz aen cunghsinhyau dog camgya doxdax caemhcaiq ndaej ciengj. Geij bi daeuj, aen hagdangz neix gungh miz 200 lai bien lunvwnz youq mbouj doengz ganhvuz gwnzde fazbyauj, ndawde miz 30 lai bien ndaej ciengj.

Youq cienzswnj minzcuz vwnzva fuengmienh, Licouh Cunghsinhyau ciuqei dangdieg Heiqcuengh Loh- baek, dawz minzcuz vwnzva yinx haeuj ndaw hagdangz bae, leihyungh saunenzgungh gawjbanh le Saunenz Duenzheiqcuengh, hawj minzcuz vwnzva haeuj daengz ndaw hagdangz bae, fungfouq le gij neiyungz Cuengh Gun song saw vah sonhag.