“138778xxxxx, dienhvah daeuj lo!138778xxxxx, dienhvah daeuj lo!”

Baez dingqnyi soujgih yiengj, gou caemxsax cuengq hong ndaw fwngz, daj ndaw daeh mbonq ok soujgih daeuj ciep.

Dwg daxmeh dwk daeuj, gou muengz naenx aen gen ciepdingq, soujgih baihhaenx couh cienz daeuj sing daxmeh.

“Dwg golaux lwi? Gou dwg daxmeh ha, mboengqneix nyaengq lwi?” Aenvih youq doih lwg ndaw ranz gou, gou dwg golaux, ndigah daxmeh coengzlaiz cungj heuh gou golaux.

“Yaxndei, mbouj suenq nyaengq lai. Daxmeh, ranz miz gijmaz saeh lwi?” Gou cam.

“Yax mbouj suenq dwg saehgip, hoeng, gij saeh neix, yaek caeuq mwngz doxyaeng cij ndaej.” Daxmeh naeuz.

“O, dwg maz saeh, mwngz gangj ba!” Gou hannaeuz.

“Dwg yienghneix, daeg nuengx- yot mwngz gaenq gangj bawx baenz lo, dou siengj youq geij ngoenz neix naemj guh saeh caijmwnz, daengzcwz mwngz yut seizgan ma ranz doxyaeng baenzlawz banh cix ndei.” Daxmeh naeuz.

Neix dwg aen siusik angq ndeu ha. Gou angq dwk sikhaek han daxmeh naeuz: “Meh, mwngz cuengq- sim, gou daengzseiz itdingh baema ranz !”

Cuengq soujgih le, ndawsim gou youh mizdi yawjlaep hwndaeuj. Mbouj dwg aenvih daegnuengx banh caij- mwnz sai cienz, gou yawjlaep baema ranz, cix miz leixyouz gou. Daih’it, aenvih diuz loh baema ranz haenx, miz duenh ndeu dwg loh luegbya, gumzgamx mbouj bingz, hoj byaij lai. Duenh loh neix yienznaeuz mbouj suenq raez, vunz byaij roxnaeuz civaiz byaij, diemj lai cung couh byaij daengz ranz lo, hoeng, hai ci couh aeu saek song diemj cung cix ndaej. Aenci youq gwnz loh byaij, seiz hwnj seiz roengz, diuqbugbug, naengh youq ndaw ci, dungx fan saej geuj liux, hojsouh dangqmaz. Daihngeih, ranz- mbanj uq lai. Vunz youq ndawsingz youq gvenq le, cungj maij guhseuq. Ndawsingz gwnzgai seuq, ndaw ranz seuq, buhvaq gwnz ndang seuq, couh dwg aen veiswnghgenh ndaw ranz hix seuq. Lajmbanj couh mbouj doengz lo. Youq lajmbanj, ca mbouj lai gizgiz uqlah. Yienznaeuz seizneix lajmbanj ranzlaeuz hausag daengj baenz rangz, ndawranz hix gig seuq. Hoengq, diuzroen gyangmbanj couh cuet lai lo. Ngoenzrengx lij ndei di, baez bungz daengz ngoenzfwn, daegbied dwg mboengq doek fwnmoenq, diuzroen gyang mbanj, yaek ra giz cuengq yamqdin cungj hoj, dauqcawq dwg naezboengz, dauqcawq dwg haexvaiz haexcwz, uq ndaej vunz yawjraen le yaek rug bae. Diuz mieng iqet gyang mbanj haenx, aenvih baiz raemx caeuq vut nyapnyaj haeuj ndaw lai, bienqbaenz diuz mieng haeusaeng ndeu, nyungz byuz nyungz douh, ndeirueg dangqmaz.

Yawjlaep gvi yawjlaep, wnggai baema cix yaek baema, cungj mbouj ndaej gangj yawjlaep ranzmbanj cix mbouj baema. Byawz hawj mwngz dwg vunz lajmbanj, byawz hawj diegcoj mwngz dwg lajmbanj ne?

Ngoenzndei ciuqseiz daeuj daengz. Ngoenzhaenx, daxmeh youh dwk soujgih gou, coi gou daengx ranz vunz vaiq ganj maranz. Dwk dienhvah sat, gou daengx ranzvunz sam boux ganj baema ranzcoj. Gou hai aen ci gou, daj yienhsingz daengz ndaw yangh dou, itloh lij suenq swnhleih, daihgaiq banringz cibngeih diemj cung couh ma daengz ndaw yangh dou lo. Youq gwnz haw ndaw yangh, dou roengz ci daeuj cawx doxgaiq le, couh caemxsax ganj loh baema ranz, gou rox, ganj caeux beij ganj haemh ndei, aenvih duenh loh daj ndaw yangh baema mbanj gou, loh rwix loh yak, gumzgumz gamxgamx, gangj mbouj dingh, mbouj rox daengz gizlawz ci baez deng gaz, couh cuet lo.

Lau gijmaz, daeuj gijmaz, caen dahraix, ci ngamq hai ndaej sam seiq goengleix gyae, dingjlingz bungz aen gouhgih baij youq gwnz loh gaeu namh. Seizhaenx, gou baez dungx- mbaeu hemq hwnjdaeuj:“Dai lo, dai lo, baezneix caen dwg gyangngoenz bungz duzfangzraq lo. Ngoenzneix goulau cix ganj mbouj daengz ranz lo, yaek youq gwnz loh gvaqhaemh lo.”

Yah lwg dingq gou baenzneix hemq, hix da yawjmyoengmyoeng, mbouj rox gangj gijmiz vah cij ndei. Gou roengzci daeuj, byaij coh aen gouhgih bae, saefouh hai gouhgih yawjraen gou le, dingz hong roengz- daeuj, riunyumnyum doiq gou gangj: “Mbouj ndei eiqsei lo, mboengqneix cingq ganj coih diuzloh neix, hawj sou gyoengqboux baihrog ma ranz mbouj fuengbienh lo.” (caengz sat)