Sanglinz Yen Dangzhungz Yangh Sizmwnz Siujyoz Hagdangz aeu “aeu Cuengh guhcawj, Cuengh Gun giethab, aeu Cuengh coi Gun, Cuengh Gun cungj rox” cibroek cih fuengcim guh cijdauj, ciuq gocwngz gaijgwz iugouz, haiguh Cuengh Gun song saw vah sonhag sawqniemh, aeundaej cingzcik yienhda, 1993 nienz hag- dangz ndaej Swcigih Yinzminz Cwngfuj、Swcigih Gyauyuzdingh ciengj hawj “Sawcuengh Haeuj Hagdangz Senhcin Cizdij” aen cwnghauh neix. 1998、2000 nienz ndaej Nanzningz Digih Hingzsuj ciengj hawj “Sawcuengh Haeuj Hagdangz Senhcin Cizdij” aen cwnghauh neix. 2000 nienz caeuq 2003 nienz baenbied ndaej Sanglinz Yen Yinzminz Cwngfuj bingz guh vwnzmingz yozyau.

Aen hagdangz neix youq 1936 nienz laebbanh, hagdangz gaxgonq heuh Sizmwnz Cunghsinhyau. 1983 nienz 9 nyied hainduj guh Cuengh Gun song saw vah sonhag sawqniemh. 2001 nienz, hagdangz gyoebcomz roek aen sonhagdiemj, gaij coh guh Sizmwnz Siujyoz. Seizneix ndaw hagdangz miz yozcenzbanh daengz roek nienzgaep 10 aen ban, 250 boux hagseng. Hagdangz miz lauxsae 15 boux, ndawde bwnjgoh yozliz 7 boux, conhgoh yozliz 2 boux, cunghswh (gauhcungh) 6 boux, habgeklwd 100%.

Byaij haeuj ndaw hagdangz Sizmwnz Siujyoz, hagdangz vanzging gyaeundei, gofaex raemhrwd. Ndaw hagdangz doenghyiengh sonhag caez- cienz: Miz doengh laeuzsonhag he、doengh laeuzrugninz hagseng he, lij miz hagseng sizdangz dem. Ndaw laeuzsonhag miz gyausiz、yizgisiz、sizyensiz、duzsuhsiz、yezlanjsiz daengj. Ndaw hagdangz lij miz aen byauhcunj lanzgiuzcangz he, miz sam giz ciengzyindung. Gak goengnaengz yizgi boiq miz haenx gihbwnj dabdaengz gij byauhcunj swcigih dingh de, 2007 nienz doenggvaq le guekgya “song gih” gunghcoz genjcaz niemhsou.

Hagdangz daj yozcenzbanh bae guh, caeuq it daengz roek nienzgaep hagseng doengzbouh doicaenh Cuengh Gun song saw vah sonhag. Vih baujcwng song saw vah sonhag cizlieng, moix boux lauxsae hwnj goq song saw vah haenx, cungj camgya Cuengh Gun song saw vah lauxsae beizyinbanh Swcigih Gyauyuzdingh Minzgyaucu banh haenx gvaq, lauxsae yezvu suijbingz haemq sang. Dan gyawj sam bi neix daeuj, lauxsae Cuengh Gun song saw vah aen hagdangz neix camgya gak gaep gak loih sonhag naengzlig doxdax cungj aeundaej cingzcik ndei. Youq ndaw sonhag, gij conhyez cihsiz、sonhag suijbingz lauxsae hix ndaej daengz daezsang. Youq ndaw 2001 nienz Gvangjsih Gyauyuz Gohyoz Yenz- giusoj gawjbanh gyauyuz lunvwnz bingz ciengj, gij lunvwnz Lanz Gengangh lauxsae ndaej bingz hwnj it daengj ciengj; lunvwnz Lanz Cangzginh、Cinz Dingzveih lauxsae ndaej bingz hwnj sam daengj ciengj; haujlai lauxsae camgya gak cungj sonhag naengzlig doxdax cungj aeundaej cingzcik ndei. Haujlai lauxsae lij ndaej daengz swcigih、si caeuq yienh senhcin lauxsae dem.

Lauxsae sonhag suijbingz sang vih hagdangz song saw vah sonhag sawqniemh caepmaenh giekdaej, hong sonhag guh ndaej swnhleih, hagseng hagsib sibgvenq、 habsib naengzlig、cauhmoq naengzlig hix ndaej daengz gig ndei fazcanj. Hagdangz youq gaem ndei sonhag cizlieng seiz, caemh guh ndei hong dwzyuz, hawj hagseng dwz ci dij cienzmienh fazcanj.

Ginggvaq daengxcungq lauxsae caeuq hagseng doxcaez roengzrengz, gaenh bi daeuj, aen hagdangz neix siujyoz bizyezswngh hwnj cuhcungh vwnzva suciz genjcwz itcig baiz youq daengx yangh daihsam mingz gaxgonq, moix bi cungj miz hagseng ndei gauj hwnj yienh cuhcungh ban cungdenj caeuq yienh minzcuz cunghyoz ban cungdenj; miz Cinz Ci daengj haj boux hagseng gonqlaeng ndaej daengz gij ciengj Sanglinz Yen Cangh Cicinh Gyauyuz Gihginhvei ciengj hawj haenx; 1990 nienz hagseng Vangz Cin’gyangh、 Lanz Yimeiz camgya Swcigih siujyoz suyoz gingsai baenbied ndaej ngeih daengj ciengj. 1991 nienz daengz 1994 nienz, hagseng Lanz Liujhungz、Lanz Liujfung、Lanz Yinzyingh、Liuz Haijminj camgya daengx yienh cozvwnz doxdax baenbied ndaej it、ngeih、sam daengj ciengj. 1991 nienz daengz 1993 nienz Cinz Ci daengj sam boux hagseng camgya cungnamz haj sengj (gih) siujyoz suyoz dunghsinsai, baenbied ndaej Gvangjsih saigih ngeih、sam daengj ciengj. 2009 nienz, hagseng Liuz Mingzginh camgya Daengx Gih Daih’it Gaiq Siujhagseng Yungh Vahcuengh Byauhcunj Doxdax Gangjgoj, ndaej daih’it mingz. Bi- gvaq hagseng Lanz Mozfeih、Lanz Yiz camgya Daengx Gih Daihsam Gaiq Siujhagseng Yungh Vahcuengh Byauhcunj Doxdax Gangjgoj, ndaej daihsam mingz.