Lozyez Yen Dungzloz Cin Yanghlinz Cunh Mbanjloxgai doenghbi neix daeuj ndaetndi gaemdawz aen seizndei Gumzlaeg Dasizveiz doiq baihrog hailangh neix, youq gungcanjdangjyenz Couh Yingcwz beixnuengx daiq- daeuz lajde, laeb hwnj “dangj ginz baenzfouq lenzhozdij”, fatdoengh gyoengq dangjyenz、ginzcung ndaw mbanj nem gij mbanj henzgyawj gungh 300 lai vunz miz di ngaenz、haengj okrengz haenx aeu cungj hingzsik gapguj roengzngaenz de doengzcaez guh “nungzgyahloz” lijyouz ginghci, byaij diuzroenz doengzcaez baenzfouq. Seizneix, Mbanjloxgai moix bi ciepdaih gij hekyouz daj ndaw gih raeuz caeuq gij swngjgih henzgyawj、Gangj、Au、Daiz doenghdieg neix nem Ouh Meij、Dunghnanzya guekgya haenx mauhgvaq 10 fanh vunzbaez.

Mbanjloxgai dwg aen mbanj- bya iq doekgungx ndeu, daengx mbanj miz 50 lai ranz gungh 290 lai vunz, dieg youq baihsae Dungzloz Cin, liz yienhsingz 8 goengleix gyae, daengz seizneix lij lwlouz miz gij swyenz swnghdai caeuq fungheiq ndawbiengz fung- sug beksingq gaeuqgeq simsoh lauxsaed de, dwg gij gingjdenj Gumzlaeg Dasizveiz swnghdai lijyouz haifat ndawde naed cawbauj saekloeg ndeu. Ndaw mbanj de miz gij fungsug beksingq nyumx baengz、guh yieng、guh ceij daengj, yiengh ranzbenjfaex gag miz daegsaek. Ndaw Gamjguk- bongh、Gamjguk、Gamjmaezhoenz daengj conghgamj henz mbanj miz gij rangzrin、donghrin、“mauh” rin、 baizdangjrin、 batva’mbu daengj gingj ndei conghgamj, Byaguenyaem humxumj aenmbanj, gwnz dingjbya lij ndaej yawj daengngoenz ok dem. Mbanj neix bi 2001 gaxgonq mbouj doeng goengloh, haeuj bya ok bya cungj dwg byaij roen, doxgaiq ngoenz- yungh baengh laeng aemq mbaq rap, swnghhoz diuzgen gig yaez. 2003 nienz, Couh Yingcwz comz vunzlai doxyaeng comz ngaenz guh lijyouz, song beixnuengx de lij daiqdaeuz ok ngaenz 6 fanh maenz fatdoengh vunzmbanj okrengz guh buenq bi vatbu le diuz goengloh iq bu rinreq ndeu, hawj hekyouz ndaej hai ci haeuj mbanj. Youq Couh Yingcwz song beixnuengx daiqdoengh lajde, gij ranz ndaw mbanj sien guh “nungzgyahloz” ndaej fouq hwnjdaeuj haenx ranz bang ranz dwk caez bae bangcoengh gij ranz wnq guh “nungzgyahloz” hwnjdaeuj, doek- laeng ndaw mbanj youh saedhengz caemhcaez guenjleix “nungzgyahloz”, hawj de hwngfat ndaej engq vaiq, seizneix daengx mbanj gaenq miz 16 ranz 9 aen diemj “nungzgyahloz”, ngoenz- naengz nyaengqnyi’nyi dwk ciep- daih gyoengq hekyouz daj seiq fueng bet baih daeuj cetyouz haenx.

Mbanjloxgai cawz guh “nungzgyahloz” le, lij comz ngaenz guh gij lijyouz gingjdenj sezsih miz daegsaek haenx, baugvat congh gamj ndeu sam gumzlaeg gingjdenj ngonzyawj, giz bindat、Gamj- guenyaem、Byaguenyaem daengj 4 diuz roenbyaij caeuq 2 aen diengzyawjgingj、3 giz diegbingz ingjsiengq gwnz dingjbya daengj. Doengzseiz, ndaw mbanj lij ceng’aeu ndaej swcigih singz- mbanj yienghsiengq gaijguh gensez hanghmoeg, daengx mbanj 40 lai ranz rogciengz ndaej dajbae moqsak, gaij guh le diuzroen daj Luzlubingz daengz Mbanjloxgai、douhung aenmbanj、ciengzdingzci、daengroen、hekyouz fuzvu cung- sim、suenvalanz、gaiqbaiz gingjgih daengj, fuengbienh hekyouz, demlai souhaeuj.

Ginggvaq roengzrengz guh geij bi, Mbanjloxgai daj aen mbanjbya gungzndoq ndeu bienq- baenz aen mbanj fouqmiz okmingz ndeu, baenz Lozyez Yen yiengh ndei lajmbanj moq seveicujyi、aenmbanj doxhuz ndeu. 2012 nienz, Mbanjloxgai ndaej bingzguh Guengjsae 4 singgaep lajmbanj lijyouzgih.