Denzyangz Yen Bwzyuz Cin Swnaz Cunh Mbanjnazseng, dieg youq ndaw Baksaek Guekgya Yendai Nungzyez Gohgiyenz, baihbaek dep Byagamjcuengh, baihnamz gyawj Baeuqroxdoh Mangzgoj Funghcingz- yenz, liz yienhsingz Denzyangz 12 goengleix gyae. Aen mbanj neix ing bya dep raemx, bya heu raemx saw, faexmak baenz doengh, gingjsaek byaraemx doenghnaz gyaeundei yinxvunz, hekyouz cungj haengj bae gizde sawq gvaq gij saedceij lajmbanj cwxcaih simsoeng haenx.

Mbanjnazseng miz 3 aen cunhminz siujcuj, gungh 146 ranz 604 vunz, 2006 nienz ndaej lied guh Baksaek Si seveicujyi lajmbanj moq hwnjguh sawqdiemj, bang de hwngfat byaekdoeng byaekcou nem ndaem- ganq mangzgoj caeuq nungzgyahloz lijyouz, cauxguh aen mbanj moq swnghdai nungzyez ngonzyawj caeuq nungzgyahloz lijyouz doxcaemh guh ndeu. Lai bi gvaqdaeuj, vunzlai Mbanjnazseng caezsim roengzrengz, it dwg baengh gij ndeicawq nungzyez gohgiyenz dingh youq ranghdieg ndaw mbanj banh de, hwngfat gauhyau swnghdai youhciz nungzyez, lai ndaem mangzgoj、byaekdoeng byaekcou caeuq gomak, gonqlaeng banh hwnj le suenmbaetsou makit、mangzgoj sifanyenz daengj ndaem- ganq gihdi, baenz ndaw mbanj aen canjyez ceiq hung ndeu; ngeih dwg daj 2008 nienz gvaqdaeuj, ndaw mbanj giethab hong hwnjguh mbanj moq, roengzngaenz guh nungzgyahloz cwxcaih lijyouz canjyez, seizneix daengx mbanj gaenq miz 14 ranz vunz guh nungzgyahloz lijyouz dakdaih, moix bi daih hek 10 fanh lai vunz, lijyouz souhaeuj dabdaengz 100 fanh maenz, hawj nungzminz lai le diuz roen moq demsou ndeu. 2013 nienz, daengx mbanj moix vunz bingzyaenz cinghsouhaeuj dabdaengz 10281 maenz.

Mbanjnazseng youq dangjveij cwngfuj baihgwnz caeuq sevei gak gyaiq haenqrengz bangcoengh lajde, doihengz aen mozsi “doxcaemh gveihva, doxcaemh sezgi, doxcaemh hwnjguh, doxcaemh guenjleix” neix, hemqcomz vunzlai camgya hwnjguh, daengx mbanj gungh hwnj ranzlaeuz moq 30 ranz, miz 17 ranz gaij guh ranz gaeuq, cek senj ranzvaih mienhcik dabdaengz 13800 bingz- fanghmij, miz 130 ranz dajbae rogciengz aenranz gungh 3.2 fanh bingzfanghmij; ndaw mbanj caemh hwnjguh le laeuzcunghab、laeuz- sonhag siujyoz、lanzgiuzcangz、miengbaizraemxuq、roenngomx- mbanj、daengloh、sienqdienh gyongj- raemx haem lajnamh、ndaem faex ganq va daengj, caemhcaih guh le aen caujgiciz hung ndaej hawj 30 lai ranz vunz dajcawj ronghdaeng ndeu caeuq 53 aen ranzdog caujgiciz, boiqdauq “sam gaij” 30 ranz, hawj ndaw mbanj ranzlaeuz baenz coij baenz baiz, roenmbanj gvangq youq bingz, laeng ranz faexmak heuswd homfwt, naj ranz gova angjhai ndeiyawj, gyoengq hekyouz caeuq gak giz gicej bae yawj le deihdeih haenh naeuz dwg aen “mbanj moq gyaeundei gvaq hawsingz” ndeu. Doengzseiz, ndaw mbanj lij laeb miz vwnzyidui, gag bien gag yienj gij vwnzyi cezmuz vunzlai gyaez yawj haenx, hawj gij vwnzva swnghhoz vunzlai engq lai cungj lai yiengh, ndaej coicaenh doxgiet doxhuz, daezsang le vunzlai vwnzmingz suciz.

2008 nienz, Guekgya Nungz- yezbu dingh Mbanjnazseng guh daengx guek lajmbanj vunzcaiz saedyungh beizyin gihdi, moix bi banh gak loih beizyinbanh 10 geiz doxhwnj; 2009 nienz 12 nyied Mbanjnazseng ndaej aen mingzdaeuz ndei “Guengjsae Cib Aen Mbanj Ceiq Hoengh Ceiq Yinxvunz” neix.