Vujmingz Yen Davangzhou Cunh doenghbi neix daeuj mbeilaux gaijfang swhsiengj, baengh gij ndeicawq dieg youq henz Dahsihgyangh, suijli sezsih caezcienz, roen doeng dienh daengz neix, haenqrengz hwngfat gingjci ndaw cunh, ciu canghhek yinx cienzngaenz banh giyez, daengx cunh gak hangh saehnieb cungj guh ndaej bae, cingz- cik yienhda, gonqlaeng ndaej bingz- guh daengx guek vwnzminz cunh、swcigih senhcin gihcwngz dangjcujciz、swcigih gohbuj sifancunh、swcigih minzcuz doxgiet senhcin cizdij doenghgij mingzdaeuz miznaj neix.

Davangzhou Cunh dieg youq baihsaenamz yienhsingz Vujmingz Yen, daengx cunh miz 4 aen mbanj, 20 sigij 90 nienzdaih, aen cunh neix couh youq boux sien ndaej baenzfouq dazyinx lajde, laebbanh le di cizdij giyez ndeu, vih gvaqlaeng hwngfat gunghyez caep giekdaej ndei; doengz- seiz guh ndei hong diegdeih cienjbau, bi haenx ndaw cunh dawz 1000 moux diegdeih cizdij doxcomz cienjbau, 500 moux louz hawj cunhminz caeuq ndaw cunh bau guh, 500 moux aeu daeuj ciu canghhek yinx cienzngaenz, hangh neix moix bi couh souhaeuj 65 fanh maenz ngaenz, youq gvaqlaeng hwng guh mbanj moq ndawde cunhminz cix mbouj yungh ok saek faen ngaenz, gemjmbaeu le diuzrap nungzminz. 2006 nienz, Vujmingz Yen dawz Davangzhou Cunh dangguh buek daih’it hwnjguh seveicujyi lajmbanj moq sifancunh ma cauxlaeb, gak gaep lingjdauj nem cunhminz caezsim roengzrengz, cauxguh gunghyez yenz- gih, cauxlaeb byauhcunjva dajciengx sifan gihdi, guh yiengh mbanj gaij guh gaij moq, bu roensuijniz ndaw mbanj, guh giuzcangz, ndaem faex loegvaq aenmbanj cang lengj aenmbanj daengj, geij bi gvaqbae, Davangzhou Cunh bienq yiengq lailai, gij vunz bae ndaw mbanj yawjngonz caeuq youzcet haenx bi beij bi lai. 2013 nienz, daengx cunh moix vunz bingzyaenz cinghsouhaeuj mauhgvaq fanh maenz, cunh cizdij souhaeuj 58 fanh maenz, seizneix cunhgaep gunghyez yenzgih gaenq banh miz 130 lai aen giyez, vih cunhminz dangdieg daezhawj 1300 lai aen gangjvei guhhong, daengx cunh miz 1600 lai vunz ndaej saedyienh “guh hong mbouj ok mbanj”.

Youq ndaw mbanj cetbyaij, caenh raen aen youh aen ranzlaeuz moq baenz coij baenz coij baij youq raeblaeng raemhfaex, aen LED gohbuj sinsizbingz daengj youq gyang mbanj ringxdoengh boqingj gohgi saenqsik, ndaw daemz go’ngaeux heuloeg、duzbya conrat, ndaw vwnzva minzcuz Bouxcuengh dijyenyenz、roqluengq vwnzva caeuq henz dwnghgvangh giuzcangz、daizheiq ndaw mbanj vunz lai vunz daih, nauhyied dangqmaz, ndaw gyanghongh vunzlaux sam boux guh doih haj boux guh bang naengh dwk yawj lan gangjgoj, yienjok cungj yienghsiengq doxhuz vuenyungz ndeu.