●1 nyied 14 hauh dwg ngoenz Yungzsuij Myauzcuz Swciyen Hungzsuij Yangh guh hozdung baebo, ngoenzde, youq ndaw yangh Dunghcih Cunh, gij dui aenvenz daj Liengzcai、Danenz、Gungdung、Bwzyinz daengj yanghcin gyawj nem ndaw yangh gak cunh daeuj de gungh 18 aen doxcomz giz ndeu, doxlwnz hwnj ciengz, doxdax boq aenvenz, yienhciengz vunz cien vunz fanh, nauhyied raix- caix.

(Gungh Siengzyouj)

●Bi’gvaq, Lozcwngz Mulaujcuz Swciyen miz 3000 ranz nungzminz ndaej cwngfuj bangfuz, gaijguh ranzyiemj, ndaej youq ranz moq.

(Veiz Yizdai)

●1 nyied 9 hauh, Sanh- gyangh Dungcuz Swciyen gawj- banh hozdung angqhoh Laeuz- gyong Majbang coihbaenz nem doenggvaq niemhsou, youq giz guh hozdung, doenghboux beix- nuengx Dungcuz boq aenvenz、dwk cazyouz、gwn ngaiz bak ranz、diuq foux Dohyeh daengj angqhoh laeuz neix bienq yiengh moq. Aen laeuz neix sang 15 mij, gvangq 11 mij, gungh 9 caengz.

(Gungh Bujgangh Cauz Siyingh)

●Geij ngoenz gonq,《Gvangjsih Yizbau》 daeng ok gij gezgoj gvendaengz daihroek gaiq Gvangjsih meijsuz daswh bingzsaemj, bineix, daengx gih 45 vunz ndaej bingzguh canghlaux meijsuz gunghyi.

(Hozciz Yizbau)

●1 nyied 13 hauh, Swcigih fuzbinz swnghdai yizminz sifan hanghmoeg(Rangh Dieg Ranz Mauznanz Vanzgyangh ) youq Vanzgyangh yienhsingz gawj- hengz aen yizsi hainduj guh. Aen hanghmoeg neix daih’it geiz guh ranzyouq 1250 dauq, dajsuenq anbaiz yizminz(bouxsenjdieg) 5000 vunz, daihngeih geiz guh 4000 dauq, anbaiz 2 daengz 2.5 fanh vunz.

(Don Yaujyinz Lanz Caijyinz)