Nanzningz Si Cangzdangz Cin Cunghsinh Yozyau dwg aen Cuengh Gun song saw vah sonhag sawqniemh yozyau ndeu. Lai bi daeuj, aen yozyau neix ndaej sevei gak gyaiq vunzlai bangcoengh, laemxsim roengzrengz, comz ndaej haujlai gingniemh banhhag, caux baenz vwnzva minzcuz gig noengzna, gak hangh saehnieb fazcanj baenaj, laebbaenz aen yozyau guenjleix ndeindi, hagseng cienz- mienh fazcanj.

Ciuq cam rox, aen yozyau neix gaxgonq heuhguh“Cangzdangz Gauhgiz Siujyoz”, 1917 nienz hainduj laeb. 1949 nienz gaij mingz baenz “Cangzdangz Siujyoz”, 2005 nienz caiq gaij mingz heuhguh Cangzdangz Cin Cunghsinh Yozyau. Daengx aen yozyau gungh miz gencuz menciz 9296 bingzfanghmij.

Aen yozyau neix gak loih gunghnwngz sezsih caezcienz, gyau- yuz gyauyoz sezbei ciuq guekgya it loih yozyau daeuj boiqmiz. Dangqnaj miz 19 aen ban, 800 boux hagseng; doenghboux yenzgungh sonhag de 40 vunz, ndawde 30 boux miz bwnjgoh yozliz, 9 boux miz daconh yozliz; 38 boux dwg siujyoz gaugaep lauxsae, boux ndeu dwg siujyoz itgaep lauxsae; 4 boux dwg Nanzningz Si gyauyoz guzgan lauxsae. Lauxsae boiqmiz ngamj ndei, yozliz hab iugouz, ciennieb naengzlig ak.

Gaenh bi daeuj, aen yozyau neix soucomz biensij bonj sawson ndaw yozyau gag sonhag de heuhguh《Sawcuengh Vahcoenz Ngoenznaengz Gangj》, hawj hagseng hag rox Sawcuengh gvendaengz vahcoenz ngoenznaengz gangj; soucomz go Sawcuengh, hag ciengq go Sawcuengh; yozyau anbaiz moix singgeiz hwnj dangz bonj yozyau gag hai ndeu, hawj hagseng hag sawson bonj yozyau, roxyiuj fungsug sibgvenq Bouxcuengh.

Doengzseiz, vihliux hawj hag- seng roxyiuj gij minzcuz conzdungj bonjndang, swnjcienz nem hungz- yangz vwnzva minzcuz, aen yozyau neix moix ngoenz anbaiz dangz ndeu, cingj doenghboux miz dinfwngz de daeuj ndaw yozyau son’gyauq dinfwngz Bouxcuengh: Baenzlawz guh ngaiznaengj haeuxcid ndaem、guh ceiz daengj; baenzlawz dajsan, diuq foux Bouxcuengh daengj. Aeu neix daeuj hawj hagseng roxyiuj gij lizsij vwnzva naekna bonj minzcuz gag miz de, beizyangj gyoengqde miz gij cingsaenz gyaezmaij guekgya aeu gyaez minzcuz bonjndang nem gyaez guekcoj bonjndang guh cungsim.

Gaenh bi daeuj, baengh daengx- cungq lauxsae nem hagseng haenqrengz, aen yozyau neix guh Cuengh Gun song saw vah sonhag aeundaej haujlai cingzcik. 2011 nienz aen yozyau neix baij hagseng youq daengx gih gangj goj Sawcuengh doxdax ndawde ndaej samdaengj- ciengj, 2012 nienz youq daengx gih siujhagseng aeu Vahcuengh byauh- cunj guh caizyi byaujyenj doxdax ndawde ndaej ngeihdaengjciengj, 2013 nienz youq Nanzningz Si Cinghsiu Gih cungh siuj yozyau yisuzcez diuqfoux doxdax ndawde ndaej itdaengjciengj.