Youq bangxdah Gyenzgyangh yienhsingz Vujsenh, miz aen hagdangz moq yienghyiengh guhbaenz yendaiva caemhcaiq daiq miz daegsaek minzcuz naekgywggywg ndeu coekcak daengj- dwt, cingq gingz hwnj gangfung yamqyat baenaj, aenneix couhdwg Vujsenh Yen Minzcuz Cunghyoz.

Vujsenh Yen Minzcuz Cunghyoz bi 2012 ndwen 9 guhbaenz hai yungh, ciemq dieg 80040 bingzfuengmij (120 moux), guhranz mienhcik 41000 bingzfuengmij, miz ranz sonhag mienhcik 14453 bingzfuengmij, dieg dijyuz yindung miz 19504 bingz- fuengmij. Hagdangz saedhengz fung- haep guenjleix, seizneix miz 60 aen ban, 2958 boux hagseng, 183 boux gyau cizgungh.

Vujsenh Yen Minzcuz Cunghyoz banhhag hwnjdin sang: It dwg banh- hag lijnen moq. Saedhengz cingsaeq guenjleix. Ngeih dwg banngeg byauh- cunjva (ndaw ban vunzsoq ciuq byauhcunj anbaiz). Sam dwg saed- hengz suenhag funghaep guenjleix. Seiq dwg lauxsae suciz ndei vunzsoq gaeuq. Haj dwg yungh yendaiva sezbei sonhag.

Vujsenh Yen Minzcuz Cunghyoz yienghyiengh yienh’ok daegsaek minzcuz: Hagdangz moix bi sou Cuengh Gun song saw vah hagseng, moix singgeiz cungj haihwnj goq Sawcuengh, bingzseiz guh swnjcienz minzcuz vwnzva hozdung, guh minzcuz doxgiet gyauyuz, dawz daegsaek minzcuz gyauyuz guh banhhag muzbyauh. Laebhag song bi lai daeuj, hagdangz gaenq laeb ndaej gij cidu guenjleix miz daegsaek swhgeij. Daegbied dwg, hagdangz youh dwg aen gaijgwz sifan hagdangz Laizbinh Si caeuq Vujsenh Yen, gauhyau godangz sonhag gaijgwz byaij baihnaj daengx Laizbinh Si.

Bi 2013 aen haggeiz seizcin, hagdangz sien youq 2012 gaep 20 aen ban guh gauhyau godangz gaijgwz. Seizneix, daengx hagdangz 60 aen ban gaenq cienzbouh doihengz gogaij. Ndaw si caeuq ndaw yienh gyoengq lingjdauj gig yawjnaek caeuq gvansim, ciengzciengz daeujdaengz hagdangz cijdauj, sawj hagdangz gogaij guh ndaej swnh. Ndaw yienh rog yienh cungj miz lauxsae daeuj yawj hag.

Aen hag neix guh gauhyau godangz gaijgwz gig yawjnaek cizlieng sonhag daezsang: It dwg aeu gyauyenzcuj、beigocuj guh bingzdaiz, doxbang、 doxhag、doxbingz, doengz- caez daezsang. Ngeih dwg dinghseiz dinghvunz beizyin hagsib, guh ndei gyauyenz bonj hagdangz, seizneix cujyau dwg guh gyauyenz gogaij. Sam dwg gak aen gogaijcuj doxdax, doicaenh hong gogaij. Seiq dwg guh ndei gogaij bingzgya.

Vujsenh Yen Minzcuz Cunghyoz haenqrengz laebbaenz gihdi vwnzva minzcuz, guhsaed guh ndei minzcuz gyauyuz. It dwg haenqrengz cauxguh aen cindi minzcuz vwnzva. Hagdangz caenhliengh yungh gak cungj fuengfap, haenqrengz senhconz minzcuz doxgiet gyauyuz. Guh coij roqluengq minzcuz vwnzva 300 lai mij raez ndeu, youq gwnz bangxciengz veh doz minzcuz dijyuz yisuz, guh baenz aen “ranz minzcuz” daengj. Youq ndaw roqluengq veh doz sij faenzcieng, gaisau gij cihsiz minzcuz. Youq ndaw “ranz minzcuz”, baij gij ndangdaenj caeuq hongdawz conzdungj minzcuz, moix aen singgeiz cungj anbaiz soujgungh cicozgo, hawj hagseng doenghfwngz san nyangj、san cuk、raed ceij、giet va daengj. Ngeih dwg dawz minzcuz vwnzva gyauyuz iemqhaeuj godangz. Hagdangz giethab vwnzva bonjdieg biensij minzcuz gyaucaiz bonj hagdangz, baugvat minzcuz yinhyoz、minzcuz dijyuz、minzcuz soujgungh、minzcuz fungsug daengj. Moix aen haggeiz cungj dingh ndei giva, nyinhcaen guh ndei minzcuz vwnzva gyauyuz. Sam dwg gawjbanh gak cungj hozdung, daezsang cwngzyau minzcuz gyauyuz, sien guh ndei hong senhconz, gawjbanh “gak minzcuz doengzcaez doxgiet doengzcaez fanzyungz fazcanj” cujdiz banhvei, gawjbanh “minzcuz doxgiet cinbu lumj ranz ndeu” yienjgangj, guh “minzcuz cangzsiz gou rox gangj rox guh” hozdung, iugouz moix aen ban moix haggeiz rox ciengq song diuz go minzcuz, rox diuq song aen foux minzcuz, rox gangj geij coenz vah minzcuz, rox sij geij aen cih minzcuz; doengzseiz guh doxdax ringx gengxdiet、bau aendomq、dwk lwg- gyangq、haizgiegraez byaijvaiq daengj gak cungj gak yiengh doxdax hozdung, lij doxdax bien hwzbanjbau、bien bauqfwngzcau、veh manva daengj, vanzlij dawz minzcuz doxgiet gyauyuz caeuq cietheiq doxhab hwnjdaeuj guh, laebbanh miz foux minzcuz、dijyuz minzcuz daengj 10 aen sedonz, leihyungh ndwencieng、 sam nyied sam、seiq nyied bet、ngux nyied ngux daengj cietheiq, guh minzcuz vwnzva swnjcienz caeuq minzcuz doxgiet gyauyuz hozdung, sonyinx hagseng bae liujgaij gij fungsug fungcingz gak minzcuz, caeuq gak minzcuz beixnuengx doxgiet doxhuz. Gij hozdung neix hawj hagseng hag rox haujlai cihsiz minzcuz, caemh roxyiuj gij yiyi hungloet minzcuz doxgiet cinbu.

Vujsenh Yen Minzcuz Cunghyoz laebbaenz seizgan yienznaeuz dinj, hoeng banhhag cwngzgoj gig hung, bingz ndaej Laizbinh Si gyauyoz senhcin danhvei、Laizbinh Si minzcuz doxgiet cinbu mozfan yozyau、Laizbinh Si minzcuz dijyuz doxdax donzdij cungjfaen daih’it mingz、Vujsenh Yen minzcuz yijvwnz gunghcoz senhcin cizdij daengj mingzdaeuz ndei.