Mungzgungh Yangh dwg Cinz- dangz Gih caemh dwg Gveigangj Si aen yanghcin dog guh hong Sawcuengh haeuj hagdangz sawq- niemh ndeu, daj 1984 nienz 9 nyied hainduj youq Gujsanh Siujyoz guh Sawcuengh haeuj hagdangz sawq- niemh gvaqdaeuj, seizneix Cuengh Gun song saw vah sawqniemh hagdangz gaenq miz baenz 7 aen. Aenvih miz Cuengh Gun song saw vah sonhag le, baenzneix Mungz- gungh Yangh Cunghsinh Siujyoz couh beij gij cunghsinh siujyoz aen yanghcin wnq lai le faenh hong ndeu, couhdwg guenjleix sonyinx hong Cuengh Gun song saw vah sonhag, roengzrengz daezsang Cuengh Gun song saw vah sonhag sawqniemh hagdangz sonhag cizlieng, hawj gyoengqde aeundaej cingzcik maenhndei, youq Mbanjcuengh yaprongh.

Mungzgungh Yangh Cunghsinh Siujyoz dieg youq gwnzhaw yangh cwngfuj capyouq haenx, cawz guh ndei hong sonhag hagdangz bonjfaenh le, lij aeu guh gij hong hagdangz guenjleix sonyinx、lauxsae beizyin、sonhag sonyinx 13 aen cunhvanzsiuj gungh 3676 boux hagseng 218 boux lauxsae ndaw yangh haenx dem, diuzrap naek- gywggywg.

Vih guh ndei gij hong guenjleix、sonhag sonyinx, aenban bouxdaeuz Mungzgungh Yangh Cunghsinh Siuj- yoz youq gak gaep gyauyuz bumwnz lingjdauj sonyinx lajde, ciuq hag- dangz saedcaeq bae guh, laebhwnj laeb caezcienz gak cungj cidu, mingzbeg faen hong, gvicomz guenj- leix, cawz cungsaed sawqniemh hagdangz lingjdauj cungcaengz hawj hong sonhag guh ndaej saeqnaeh capsaed le, lij cungfaen fazveih gij gyauyenzcuj gak aen hagdangz cozyung, anbaiz caeuq guh ndei hong sonhag nem gyauyenz, doengzseiz sien boiq gaeuq lauxsae hawj gij sawqniemh hagdangz neix, baujcwng hong sonhag guh ndaej cingqciengz swnhleih. Youq gij giekdaej neix gwnzde, lij yungh gij banhfap “aeu gyauyenz coi sonhag, aeu doxdax coi hagsib” de bae doidoengh hong song saw vah sonhag, lumjbaenz cujciz lauxsae camgya “Guengjsae Siujyoz Cuengh Gun Song Saw Vah Sonhag Yenzgiu” (Gyauyuzbu cungdenj yenzgiu goqdaez) daengj goqdaez yenzgiu, banh Cuengh Gun song saw vah sonhag gwnzdangz sonhag doxdax, doengzseiz cujciz banh ndei hagseng boihdoeg doxdax、cozvwnz Cuengh doxdax、sij cih Sawcuengh doxdax、gangj gojgaeq Vahcuengh doxdax daengj lai cungj lai yiengh hozdung dem, dungyenz、cujciz daengxgyoengq hagseng camgya, hawj lauxsae hagseng youq ndaw hozdung roxyiuj Sawcuengh, ndiepgyaez Sawcuengh. Vanzlij gujli lauxsae sij lunvwnz sonhag，sonyinx hagseng sij cozvwnz, geiq hawj 《Gvangjsih Minzcuz Bau》caeuq 《Sam Nyied Sam》daengj bauganh, caemh aeundaej cingzcik ndei, dan 2012 nienz, Gujsanh、Gauhcanh、Lingzsw、Sanghlungz、Liusui 5 aen siujyoz neix couh miz 99 bien cozvwnz Cuengh hagseng youq gwnz 《Gvangjsih Minzcuz Bau》daeng okdaeuj.

Doenghbi neix daeuj, Mungz- gungh Yangh Cunghsinh Siujyoz guh ndei giva, baij yaucangj、gyaudauj cujyin、guzgan lauxsae bae camgya lauxsae beizyin hagsib, doengzseiz saedhengz lauxsae caeuq lauxsae “saefouh lwgsae” gap doiq doxbang doxhag, mboujduenh daezsang lauxsae gak fuengmienh suciz; lij ciengzseiz bae daengz gij sawqniemh hagdangz haenx cazyawj sonyinx guhhong, ca ndei lauxsae gihbwnj- gungh mulienh caeuq yezvu yenzdauj hagsib, hawj lauxsae yezvu naengzlig caeuq sonhag suijbingz ndaej daezsang. Daj 2006 nienz gvaqdaeuj, 7 aen hagdangz neix couh gonqlaeng baij ok 650 lai vunzbaez camgya swcigih gaep hagdangz guenjleix、sonhag naengzlig、saenqsik gisuz daengj yezvu beizyin; 2013 nienz, daengx yangh Cuengh Gun song saw vah sonhag sawqniemh hagdangz gungh miz 13 boux guzgan lauxsae ndaej senj haeuj Gvangjsih 100 boux Cuengh Gun song saw vah sonhag lauxsae okmingz beizyangj gungh- cwngz beizyangj doiqsiengq bae. Gauhcanh Siujyoz lauxsae Veiz Cinhlanz ndaej bingz guh daengx guek mozfan lauxsae、daengx guek swhdwz senhcin goyinz gvaq, caemhcaiq youq 2007 nienz ndaej najrongh dwk senj guh dangj raeuz cibcaet daih daibyauj, neix dwg Guengjsae cungh siujyoz boux lauxsae dog aeundaej gij mingzdaeuz miznaj neix.

Mizyauq bae guenjleix sonyinx caeuq lauxsae caezsim haenqrengz bae guh, hawj Mungzgungh Yangh hong Cuengh Gun song saw vah sonhag aeundaej cingzcik yienhda: Gyoengq bizyezswngh camgya daengx Guengjsae Sawcuengh bizyez niemh- dingh cingzcik cungj baiz youq baihnaj 23 aen sawqniemh yienhsi, gyauyuz sonhag cizlieng ndei gvaq doengzloih hagdangz ndaej baiz youq ndaw doih hagdangz senhcin Cinzdangz Gih; Gujsanh Siujyoz gonqlaeng aeundaej “Daengx Guek Minzcuz Gyauyuz Senhcin Cizdij”、swcigih “Hong Sawcuengh Haeuj Hagdangz Sawqniemh Senhcin Danhvei” daengj mingzdaeuz ndei. Geij bi neix daeuj, Mungzgungh Yangh gyauyuz baiz youq ndaw doih 10 aen yanghcin gyauyuz senhcin ndaw Gveigangj Si. Mungzgungh Yangh Cunghsinh Siujyoz caemh gonqlaeng aeundaej Cinzdangz Gih hong gyauyuz senhcin danhvei、swhdwz gensez senhcin cizdij, 2011 nienz ndaej bingzguh swcigih yivu gyauyuz hagdangz cangzgveih guenjleix senhcin hagdangz.