●Gaenh bi daeuj, Liujcwngz Yen ciuq aen mozsi“gunghswh+gihdi+nungzhoh”fazcanj gij canjyez ndaem gosangh ciengx nonsei, bineix daengx yienh ndaem suensangh mauhgvaq 15 fanh moux, reh moq guj miz 1.7 fanh dun, canjyez seicouz bi miz canjciz 6.7 ik maenz.

(Danz Gaijhingh)

●Daj bineix daeuj, Lungzswng Gak Cuz Swciyen roengz 4.5 ik maenz, bu suijniz coq 15 diuz roen doeng mbanj, roengz cienz rengz coengh vunz diegbya hai “roen baenzfouq”.

(Veiz Gizyangz Yangz Lijswh)

●Daj 2009 nienz 7 nyied guhbaenz caemhcaiq mienxfeiq hai hawj vunzlai yawj (gaenq haj bi lai) daeuj, Dunghhingh Gingh- cuz Bozvuzgvanj nem Ginghcuz Swnghdai Boz- vuzgvanj gaenq mienxfeiq ciep hekyouz 80 lai fanh.

(Bangz Gwzbingz Liu Gaihginh)

●Gaenh bi daeuj, Sanhgyangh Dungcuz Swciyen Linzhih Yangh Gauhsiu Cunh ndaem lwgmaenz moix bi moix moux soundaej 1800 goenggaen doxhwnj, moux canjciz 6000 maenz, ndaw cunh ndaem miz 200 lai moux“lwgmaenz vunz maij aeu”, mbouj yungh ok douranz couh gag miz vunz daeuj cawx liux lo.

(Gungh Bungjgangh Banh Bingz)

●Daj bineix hwnj, Yungzsuij Myauzcuz Swciyen comzrengz gaijguh daengx yienh 65 giz ranzhag aeu faex guh de. Dangqnaj, gaenq roengz 1200 fanh maenz gaijguh 40 giz, ndawde 15 giz gaenq guhbaenz ndaej yungh lo.

(Lungz Linzci)