Bonjbauq siusik(gicej Suh Gyahgvai/苏加快) 12 nyied 26 hauh gyanghaemh, gih raeuz bouh daih’it heiqcazgi fangzloq 《Buhbwnroeg》 Bouxcuengh youq Namzningz Gicangz daih’it baez yienjok. Bouh heiqcazgi fangzloq Bouxcuengh neix dwg aeu Bouxcuengh ginghdenj ndawbiengz cienzgangj daeuj guh cangcoz sucaiz, yungz Dozveh Bangxdat Byaraiz、gyongdoengz、Fwencuengh daengj hauj- lai vwnzva yenzsu haeuj ndaw bae dem, dawz cazgi caeuq lai yiengh daizheiq yisuz guh cujhab daezlienh、gyagoeng swnghwnj cix cangcoz baenz bouh daih’it heiqcazgi fangzloq Bouxcuengh neix. Gyoengqvunz daeuj ngonz haenx angq dwk diuq hwnjdaeuj, sing dopfwngz seiz mbouj seiz lumj byajraez nei goenjhumhum.

Bouh heiqcazgi fangzloq 《Buh- bwnroeg》 neix doenggvaq bouxvunz ganjcingz riuzdoengh caeuq gojsaeh cingzcez nyoengx doxbae, aeu cingz daiq heiq, aeu cingz yienh heiq, cazgi gingyiemj caeuq gojsaeh ngutngeuj, yienjok duenh Bouxcuengh ginghdenj gojsaeh fangzloq cienzgeiz he. Ndaw heiqmoeg doenggvaq buhdaenj、daeng rongh、yinhyangj daegbied yaugoj, dawz byaraemx Guengjsae、swyenz gingjgvanh buen hwnj gwnz daizheiq bae, yienh’ok le aen saenzgeiz caeuq gingjgvanh hawsaed giethab、ndei yawj ndei ngonz ndeu.

“Buhbwnroeg”dwg cit goj guhyoux riuzcienz youq gih raeuz Hwngzyen ndawbiengz Bouxcuengh he, youq guek raeuz mbiengj baihnamz yingjyangj gig gvangq, miz gij saekcaij saenzvah lumj fangzhwnz loq nei, riuzcienz gig gyae gig nanz, doiq dangdaih vwnzyoz fazcanj miz yingjyangj hung raeuh, caemhcaiq ndaej senj haeuj ndaw Cungguek feihvuzciz vwnzva yizcanj mingzloeg bae.