Duh’anh Yangh Gizgyangh Cunh Siujyoz youq 1959 nienz 8 nyied haibanh, daengz seizneix gaenq miz 55 bi seizgan lo. Ginggvaq 50 lai bi fazcanj, hagdangz gveihmoz daj iq daengz hung, dangqnaj, hagdangz ciemq dieg menciz miz 3820 bingz- fuengmij, gencuz menciz 1554.354 bingzfuengmij, diegninz menciz 1107 bingzfuengmij, ndawde hagseng geiq- ninz suzse menciz 200 bingzfueng- mij, ranz sonhag menciz 1200 bingz- fuengmij. Seizneix gungh miz 6 aen gyauyozbanh, 145 boux hagseng, ndawde hagseng geiqninz ndaw hagdangz miz 59 boux. Miz 10 boux lauxsae, ndawde miz daconh yozliz 9 boux, cunghswh yozliz boux ndeu, lauxsae habgeklwd dabdaengz 100%. Gauhgiz lauxsae 9 boux, siujyoz it gaep lauxsae boux ndeu.

Aen hagdangz neix daj 1983 nienz hwnj hainduj yungh Cuengh Gun song saw vah sonhag, dwg daengx yienh sawjyungh Cuengh Gun song saw vah sonhag hagdangz ceiq caeux ndawde aen ndeu.

Vih hawj hagdangz gyauyuz sonhag fazcanj ndaej ndei, habbaenz haemq ndei sonhag fungheiq, aeu vanzging ndei bae gujvuj gyoengq- vunz, hagdangz dingh ok le ithaehlied gveihcangh cidu.

Lai bi gvaqdaeuj, aen hagdangz neix itcig aeu suciz gyauyuz guh cunghcij, aeu aen gyauyuz lijnen “cienzbouh vih hagseng fazcanj, vihliux fazcanj hagseng sojmiz” neix, cienzmienh bae gvancez gyauyuz fanghcinh aen dangj raeuz; gaem dawz song saw vah sonhag saedniemh guh cawjsienq, daengx aen hagdangz lauxsae gak dawz ok bonjsaeh daeuj, daihdamj bae sawq guh aeu Cuengh Coi Gun sonhag fuengfap, ginggvaq mboujduenh swnjcienz caeuq damq- ra, rom ndaej le mbouj noix gyauyuz sonhag gingniemh caeuq fuengfap dijbauj, aeundaej sonhag cwngzgoj hungraeuh:

2012、2013 nienz song bi ndawde, Vangz Haijmouz lauxsae caeuq Hij Yizyouj lauxsae aeundaej yienh gaep maenhndei lauxsae ciengj, Nungz Dingcang lauxsae aeundaej yangh maenhndei lauxsae ciengj; 2013 daengz 2014 nienz Vangz Yizfungh lauxsae aeundaej yienh maenhndei lauxsae ciengj; Liengz Cwzdungh lauxsae、Nungz Ginhlenz lauxsae aeundaej yangh maenhndei lauxsae ciengj, bi haenx, aen hagdangz neix deng bingz guh “Sonhag Cizlieng Senhcin Yozyau”. Lai bi gvaqdaeuj, yienh Cang’yau moix bi gawjbanh gak cungj doxdax, mboujguenj dwg lauxsae hanghmoeg roxnaeuz hagseng hanghmoeg, cungj dued ndaej cingzcik ndei dauqma, bineix 6 nyied 8 hauh gawjhengz gangj goj Vahcuengh doxdax, it nienzgaep Nungz Lanzlanz caeuq Moz Gyahcenz song boux doengzhag faenbied aeundaej sam daengj ciengj.

2012 caeuq 2013 hagnienz aen haggeiz gonq geizsat gaujsi, it nienzgaep、ngeih nienzgaep、seiq nienzgaep、roek nienzgaep faenbied aeundaej sonhag ngeih、sam、sam、ngeih daengj ciengj; haggeizlaeng geizsat gaujsi seiz, it nienzgaep、ngeih nienzgaep、sam nienzgaep、haj nienzgaep faenbied aeundaej sonhag it、ngeih、ngeih、sam daengj ciengj; 2013 daengz 2014 hagnienz hag- geizgonq geizsat gaujsiz seiz, sam nienzgaep、haj nienzgaep、ngeih nienzgaep faenbied aeundaej sonhag sam、ngeih、ngeih daengj ciengj; haggeizlaeng geizsat gaujsi seiz, it nienzgaep、seiq nienzgaep、haj nienzgaep faenbied aeundaej sonhag ngeih、sam、sam daengj ciengj.

2007 nienz, aen hagdangz neix doenggvaq le “Buj Giuj” niemhsou, 2009 nienz 6 nyied doenggvaq le yienh gaep habgek hagdangz niemhsou, aeundaej cunh gaep maenhndei daengjgaep, 2009 nienz 6 nyied youq daengx yienh “Yivu Gyauyuz Gyauyoz Cangzgveih” genj- caz ndawde aeundaej cunh vanzsiuj gaep daih’it. Aen hagdangz neix ciengzseiz cujciz hagseng camgya hagdangz、yangh、yienh gaep vwnzyi yienjok caeuq gak loih dijyuz doxdax, cungj aeundaej cingzcik haemq ndei. Hagdangz gyauyuz sonhag cingzcik yied daeuj yied ndei, ndaej daengz vunzlai caeuq baihgwnz bumwnz haengjdingh.

Gaenh geij bi daeuj, aen hag- dangz neix ingbaengh cwngfuj、sevei daeuj comz ngaenz banhhag, daihlig gaijndei banhhag diuzgen, hagdangz gensez yied daeuj yied ndei. 2008 nienz 2 nyied, Yienh Nungzyezgiz ok song fanh maenz ngaenz bang hwnj aen hagseng sizdangz ndeu. Hagdangz seizneix miz gyauyozlouz caeuq cunghhozlouz gak doengh ndeu. Doengzseiz boiq miz aen dennauj ndeu, 21 conq、34 conq caijden caeuq 47 conq yezcingh densi gak aen ndeu. 2010 nienz 7 nyied, Yienh Donzveij rom 2.4 fanh maenz ngaenz bang hagdangz caepguh aen daemz- raemx 80 lizfanghmij ndeu.

Seizneix, hagdangz yawjnaek vwnzva gensez, aeu aen vanzging ndei daeuj ungganq hagseng, ndaw hag- dangz loegvaq menciz mauhgvaq 30%. Ciengzhumx hagdangz cienz- bouh aeu hoi cat gvaq, daengx aen hagdangz seuqsak veiswngh, gyoengq saeseng youq aen vanzging ndei neix ndawde sonhag caeuq hagsib, boux- boux simsangj dangqmaz. Gyoengq- de gietsim haenqrengz daezswng banhhag binjvei, cingjhab saeseng hablig, caep guh aen hagdangz miz Bouxcuengh daegsaek he bae doengzcaez okrengz!