Bonjbauq siusik (gicej Suh Gyahgvai) 12 nyied 10 hauh daengz 11 hauh, youz Cungzcoj Siveij Senhconzbu、Cungzcoj Si Minzveij caeuq Denhdwngj Yen Yinzminz Cwngfuj lienzhab cawjbanh aen sanhgohvei Cungzcoj Si Gaiq Daihseiq Bouxcuengh Eufwen Doxdax nem Cibbet Gaiq Seiqcung Cienzhoih Cingsaenz Dangj Raeuz youq Denhdwngj Yen Denhcauh Gvangjcangz gawjhengz hoenghhwd, baez eufwen doxdax neix faen miz dangj raeuz ginzcung lusen gyauyuz sizcenj hozdung、ginghdenj fwenyoux daih beijbingq、fwen ciengq minzcuz yinghyungz Nungz Cigauh、《Minzcuz Gihyiz Swcifaz》senhconz daengj seiq ciengz doxdax. 15 aen doih 60 boux canghfwen daj Lungzcouh、Bingzsiengz、Dasinh、Ningzmingz、Gyanghcouh caeuq Fuzsuih daeuj haenx camgya doxdax. Daengzlaeng, Dasinh Yen Daibyaujdui daih’it doih caeuq Denhdwngj Yen Denhyingh Sanhgohdui aeundaej it daengj ciengj; Lungzcouh Yen Li’gyangh Sanhgohdui、Gyanghcouh Gih Yizyangz Sanhgohdui、Denhdwngj Yen Denhli Sanhgohdui aeundaej ngeih daengj ciengj; Gyanghcouh Gih Gyanghnanz Sanhgohdui、Ningzmingz Yen Mingzgyangh Sanhgohdui、Bingzsiengz Si Youjyiz Sanhgohdui、Dasinh Yen Daibyaujdui Daihngeih Doih、Denhdwngj Yen Denhcauh Sanhgohdui aeundaej sam daengj ciengj. Linghvaih, gyoengq bingzveij lij faenbied bingz ok youhsiu cozbinj ciengj 12 aen, ceiq ndei byaujyenj ciengj caeuq ceiq ndei ndangdaenj ciengj gak 3 aen.