Gveigangj Si Mungzgungh Yangh Lingzsw Siujyoz 1987 nienz dangguh buek daihngeih Sawucnengh haeuj hagdangz sawqniemh hagdangz, ngeihcib lai bi daeuj baenzbaenz aeu “cibroek cih” fuengcim sonhag ma sonyinx, itcig ciuq gij lohnaemj guhhong “hong bingzciengz miz cauhmoq, hong youqgaenj miz baujcingq, hong hoj guh guh ndaej bae, hong gaznaek miz gaijcaenh, cienzmienh saedguh suciz gyauyuz” miz gonq miz laeng bae guh, onjdwt bae guh gij yaubonj gyauyenz “goqcingz moq、leixniemh moq、lohnaemj moq、banjdaeuz moq” neix, doxgiet caezsim, haenqrengz cauxlaeb huzndei hagdangz, hong sonhag guh ndaej maenhndei, cingzcik yienhda. 1992 nienz aeundaej ndaw si “aen danhvei senhcin hong doigvangq Sawcuengh ”、1993 nienz aeundaej swcigih “daengx gih hong Sawcuengh haeuj hagdangz senhcin danhvei” daengj haujlai mingzdaeuz najrongh neix nem haujlai gih、yangh gaep gyauyuz sonhag cizlieng cwngzgoj ciengj dem.

Lingzsw Siujyoz yaucangj Veiz Suhgenh gaisau naeuz gicej nyi, aen hagdangz neix haujlai bi daeuj guh ndei hong guenjleix, mboujduenh daezsang Cuengh Gun song saw vah sonhag cizlieng. Hagdangz moix aen haggeiz codaeuz, ciuq hagdangz saedcaeq bae guh, boux lingjdauj hagdangz faenguenj hong Cuengh Gun song saw vah sonhag de cungj dingh ndei giva hong sonhag, caemhcaiq mizyauq dwk bae cujciz moix boux lauxsae cungj ciuq giva ciuq mizgven byauhcinj bae mu sawson, saeqnaeh bwh ndei moix dangz goq; doengzseiz lauxlaux saedsaed bae saedguh; cemhciq sonyinx lauxsae lai yawj lai hag, romcomz gingniemh, dawz gij sonhag fuengfap ceiq moq ceiq yinx ndaej hagseng haenx coq haeuj ndaw sonhag hozdung bae. Doengzseiz ciuq 《Byauhcunj Goq Sawcuengh》iugouz bae guh, hwnj caez hwnj gaeuq goqcingz Sawcuengh, dabdaengz moix aen singhgiz nienzgaep daemq 4 aen goqseiz, nienzgaep gyang aen 3 goqseiz, nienzgaep sang aen 2 goqseiz, moix boux lauxsae youq haihag codaeuz couh daj moix aen danhyenz ndawde senj ok bien govwnz ndeu guh dangzgoq Cuengh Gun caemhcaez hwnjdangz de, yienzhaeuh nyinhcaen sij Cuengh Gun gyauan, cij bae hwnjdangz, hawj hagseng “Cuengh Gun cungj rox”. Lai bi daeuj, lauxsae aen hag neix miz 50 lai bien lunvwnz aeundaej guekgya、swcigih、sih、gih(yienh) daengj gak gaep ciengjli, lauxsae camgya swcigih、si、gih(yienh)、yangh lauxsae gwnzdangz sonhag doxdax caemh aeundaej cingzcik haemq ndei, lauxsae miz 30 vunz(baez) faenbied ndaej guekgya、swcigih、si、gih(yienh) daengj ciengjli; Veiz Libingz、Luz Dunghginz、Luz Siujmeiz sam boux lauxsae neix lij ndaej lied haeuj ndaw Guengjsae Cuengh Gun song saw vah lauxsae mizmingz bae.

Lingzsw Siujyoz youq hong sonhag ndawde, yawjnaek lox hagseng yinx hagsib, gaenx doengh uk, doxbang doxhag, doengzcaez cinbu. Hagdangz moix aen haggeiz cungj guh gak cungj gak yiengh song saw vah doxdax hozdung, lumjbaenz banh banyibei yaem Vahcuengh gyoepdoeg doxdax, it ngeih nienzgaep Saw- cuengh langhdoeg doxdax, sam daengz roek nienzgaep cozvwnz Sawcuengh doq okdaez doq sij doxdax, daengx hagdangz gangj goj Vahcuengh doxdax daengj, youq ndaw doxdax guh yienhciengz bingzfaen, hawj hagseng roxnyinh mizyinx raixcaix, gak cungj hozdung cungj guh ndaej hoenghhwd caemhcaiq aeundaej yaugoj maenhndei. Moix aen haggeiz geizsat genjcwz seiz, gij cingzcik goh Sawcuengh gyoengq hagseng cungj dwg baiz youq baihnaj daengx aen Cinzdangz Gih, hagseng youq camgya gak cungj yozgoh doxdax ndawde gonqlaeng miz 200 vunz(baez) doxhwnj ndaej ciengj. Ngeihcib lai bi daeuj, buek dem buek hagseng daj aen hag neix bizyezokbae haenx doeklaeng baenz le da cunghconh bizyezswngh, ndawde dan Sawcuengh cunghconhswngh couh miz 29 vunz, seizneix gyoengqde dingzlai cungj camgya haeuj ndaw hong gyauyuz sonhag daeuj, baenz boux lauxsae miznaj ndeu.

Lingzsw Siujyoz youq Cuengh Gun song saw vah gyauyuz sonhag ndawde dingj gvaq haemzhoj, gaenxgoemx bae guh, bibi aeundaej cingjcik ndei. Seizneix, aen hag neix lij laebdaeb guh ndei Cuengh Gun song saw vah sonhag caeuq goqcingz gaijgwz sawqniemh, dingh ndei hagdangz fazcanj gveihva, laemxsim bae guh yinzcaiz suciz caeuq gohyoz cingsaenz beizyangj, ceng’aeu hawj hagseng ndaej cienzmienh fazcanj, doidoengh hong Cuengh Gun song saw vah sonhag caiq hwnj mbaek lae moq.