Nazgyaz Cunghsinhyau dieg youq mbiengj baihsae yangh cwngfuj, seiqhenz cungj dwg Mbanjcuengh, gyaeujvunz Bouxcuengh ciemq 98%. 1912 nienz hainduj banhhag, hagdangz ciemq dieg menciz 10.7 moux, dwg aen hagdangz geiqninz ndeu. Lai bi gvaqdaeuj itcig swnjcienz aen yenzcwz “dwzyuz guhgoek、sonhag guhcawj、cizlieng banhhag” neix, laebhwnj le aen “aeu dwz laeb vunz, cienzmienh fazcanj” hagdangz fungheiq.

Nazgyaz Cunghsinhyau seizneix miz 430 boux hagseng, 14 aen ban. Miz lauxsae cienmonz sonsaw 28 boux, ndawde miz 5 boux dwg bwnjgoh, 18 boux daconh, 5 boux dwg cunghconh, lauxsae habgeklwd dabdaengz 100%. Youq sonhag ndawde, hagdangz genhciz “ungganq guhgoek”, “denva sonhag” itcig dwg gij daegsaek aen cunghsinhyau neix. Ndaw hagdangz ciep doeng le 4M gvanghlanj gvanhdai, caemh- caiq haidoeng le yauyenz vangj, seizneix miz 24 daiz dennauj, 12 gan gyausiz ancang baenz dohmeizdij gyausiz. Cizgiz senjsoengq lauxsae okbae “cungdienh”, gij lauxsae “cungdienh” dauqma le, sij ok haujlai sonhag gingniemh lunvwnz cizlieng gig sang. Sam bi gvaqdaeuj, ca mbouj lai miz gaenh bak bien sonhag gingniemh lunvwnz youq sengj(gih)、si fazbyauj roxnaeuz ndaej ciengj gvaq.

Geij bi daeuj, hagdangz cibfaen yawjnaek beizyangj hagseng gosing daegdiemj. Moix haggeiz cungj gaengawq hagseng haengjgyaez bae haibanh sonhag swhveiz、 mbehung yinlen、yawjdoeg caeuq sij faenz cijdauj、Yinghyij bak gangj doxcam doxdap、dwkgeiz、sij suhfaz、veh veh、singhyoz、lanzgiuz、binghbanghgiuz daengj ithaehlied hanghmoeg hozdung. Bi 2009 ndwen 6, youq daengx yienh cungh siujyoz gvangjbo dijcauh doxdax ndawde aeundaej siujyozcuj youhsiuciengj, doengzseiz aeundaej Dwzbauj Yen Gaiq Daih’it Cungh Siujyoz (youwzyenz) Caizyi Canjyenj Siuj- yozcuj Cunghabloih sam daengj ciengj; bi 2009 ndwen 11 aeundaej Dwzbauj Yen Cungh Siujyoz Binghbanghgiuz Doxdax Siujyozcuj Mehmbwk Donzdij sam daengj ciengj. Ndaw hagdangz gonqlaeng miz song bak lai boux hagseng ndaej gikfat rengzndumj, youq gak cungj gak loih doxdax ndawde, haujlai boux hagseng ndaej ciengj .

Hagdangz daj 2012 nienz yozcenzbanh hwnj hai miz Cuengh Gun song saw vah ngeihloih mosik sonhag. Anbaiz gij lauxsae miz Sawcuengh sonhag gingniemh haenx daeuj son. Lai bi daeuj, sonhag cingzcik onjdwt daezsang. Moix haggeiz satbyai goh Sawcuengh doengjit gaujsi bingzyaenz faensoq cungj baiz youq doengzloih hagdangz vih doekgonq; youq bi 2013 ndwen 12 ngoenz 13 Yienh Sawcuengh Hagdangz Langjduz Doxdax ndawde, Cwng Liveiz、 Cwng Liyungz song boux hagseng faenbied aeundaej daengx yienh cuj nienzgaep daemq daih’it、 daihngeih mingz; bi 2014 ndwen 4 ngoenz 25, yienh Sawcuengh Hagdangz lingjdauj youq aen hagdangz neix gawjbanh Daengx Yienh Sawcuengh Sonhag Dandauj- goq, aeundaej yaugoj haemq ndei; bi 2014 ndwen 6 ngoenz 9, youq Daengx Yienh Gangj Gojgaeq Doxdax ndawde, Cwng Liyungz doengzhag aeundaej daengx yienh daih’it mingz, Vangz Liveiz、Vangz Lisangj song boux doengzhag faenbied aeundaej daihngeih mingz. Cuengh Gun song saw vah sonhag cwngzgoj hainduj youq ndaw aen hagdangz neix cienz bae coh seiqhenz lajmbanj, ndaej daengz sevei gak gyaiq haenh ndei.

Hong sonhag dwg gij hoenz hagdangz, sonhag cizlieng dwg gij goek hwng hag haenx. Nazgyaz Cunghsinhyau youq gyagiengz “goqgaij moq” doengzseiz, genhciz goqcwngz moq leixniemh caeuq saedguh doxgiethab aen yenzcwz neix, gaijcaenh lauxsae sonhag hingzveiz. Vihliux baujcwng gyauyuz caeuq sonhag cizlieng, hagdangz cungfaen leihyungh gij gangganj cozyung cizyau gunghswh de daeuj diuhdoengh moix boux lauxsae cizgizsing. Sojmiz lauxsae saedhengz bingqnyaemh cidu, hengzguh yaucangj fucwzci, saedhengz aen gaujbingz gihci “bouxak hwnj, bouxgik roengz” neix. Dangqnaj, aen hagdangz neix gaenq habbaenz ceng doekgonq、lau lotlaeng、gamj bae soengqhawj aen fwnveiz ndei neix. Sonhag cizlieng itcig ndaej baiz youq doengzloih hagdangz vih daih’it. Hagdangz youq bi 2006 ndaej Yienh Sevei Cianh Cunghab Ceihleix Veijyenzvei soengq hawj “Bingzan Hagdangz” aen cwnghauh miznaj neix; bi 2008、2009 laebdaeb song bi ndaej yenveij yen cwngfuj、yangh cwngfuj soengq hawj nienzdoh hong sonhag “Senhcin Danhvei” cwnghauh najrongh……