Bonjbauq siusik(dunghsinyenz Lingz Hinghningz/零兴宁 Cinz Giz- vwnz/覃其文) Geij ngoenz gonq, 2014 nienz guekgya gaep gyauyoz cwngzgoj bingzsenj hozdung gungh bingzsenj ok 5 hangh daegdaengjciengj、148 hangh itdaengjciengj caeuq 1167 hangh ngeihdaengjciengj, baez hozdung neix youz gyauyuzbu cawjbanh. Gvangjsih Gyauyuzdingh Minzcuz Gyauyuzcu cucangj Veiz Lanzmingz dangdaeuz guh aen hanghmoeg“Cuengh Gun song saw vah caemh yamq sonhag mozsi”, neix ndaej guekgya gaep gyauyoz cwngzgoj ngeihdaengjciengj.

Veiz Lanzmingz lwnh naeuz, 1990 nienz, gih raeuz youq Gveigangj Si Cinzdangz Gih Mungzgungh Yangh Cuengh Gun Song Saw Vah Saedniemh Siujyoz haidaeuz guh“Cuengh Gun song saw vah caemh yamq sonhag mozsi”. 1991 nienz daengz 2010 nienz, laebdaeb youq Vujmingz、Dwzbauj daengj 24 aen yienh(si、gih) 64 aen Cuengh Gun song saw vah saedniemh siujyoz(baugvat giz sonhag) doigvangq aen mozsi neix. 2010 nienz, gih raeuz gaijndei nem caezcienz“Cuengh Gun song saw vah caemh yamq sonhag mozsi”, guh baenz le“nienzgaep daemq caemh yamq caez、nienzgaep gyang caemh yamq mbangj、nienzgaep sang caemh yamq noix”.

Ciuq cam rox, 2011 nienz daengz 2014 nienz, gih raeuz dingh daengx gih 59 aen siujyoz guh“Cuengh Gun song saw vah caemh yamq sonhag mozsi”saedniemh yozyau, neix caenh’itbouh hengzguh ndei “Cuengh Gun song saw vah caemh yamq sonhag mozsi”.