Mehmbwk seizdoeng gwn bouj aeu gangj gohyoz. Baez baenz binghfugoh, couh aeu gibseiz bae yihyen duenq yw. Aenvih seizneix conhyez yied faen yied saeq, cijmiz conhyez yihswh, conhyez gisuz, conhyez sezbei, cij ndaej vih mehmbwk siucawz bingh in, baujcwng ndang vunz gengangh.

Yw bouj mboujyawx gwn bouj. Conhgyah daezsingj naeuz, seiz- doeng gwn bouj caeuq gwn daihliengh huqbouj, mboujyawx sien daj gwn bouj guh hwnj. Aenvih cijmiz gwn bouj cij ndaej demgiengz rengz dingj bingh ndang vunz. Mehmbwk gwn bouj ndawde youh ndaej gaengawq aenndang mbouj doengz, faen baenz seiq cungj mbouj doengz gwn bouj fuengfap:

Bingz bouj. Dwg vix gijgwn singq heiq bingzhuz、mboujlwnh bouxvunz gengangh rox mbouj cungj ndaej gwn, caemhcaiq naengz veizciz gengangh caeuq diuzmingh haenx, lumj haeuxgok、duh、cij、lwgmak caeuq byaekheu daengj, cungj gijgwn neix singqnaengz bingzhuz, boux baenz yaem haw、boux baenz heiq haw、boux baenz lwed haw cungj ndaej gwn.

Raeuj bouj. Dwg vix gijgwn raeujndat haenx, lumj nohcwz、nohyiengz、byalae、huqdiemz、makcauj nding、nohmaknganx、maklaehcae caeuq coeng hing daengj. Gij mehmbwk seizdoeng lau nit ciengz gwn gij doxgaiq neix ndaej bangcoh swng huj, hawj mwngz mbouj lau nit, caemh ndaej demgiengz rengzndang.

Cing bouj. Dwg vix gijgwn caepliengz haenx, lumj makleiz、ngaeux ndip、byaekginzcai、beghab、duhheu、lwgbieng、duzfw、lwgsae daengj, gwn de ndaej siu huj.

Ndat bouj. Dwg vix gijgwn manh ndat haenx, lumj lwgmanh、gveiqbeiz、byaekhom、vaceu daengj, gij huq neix ndaej raeuj yiengz sanq caep, youq ndaw geiqciet seizdoeng nitgyaengj, ciengz gwn de daeuj dingj nit caeuq cawz caep.