Dwzbauj Yen Duh’anh Yangh Cunghsinhyau youq bi 1936 laeb- baenz. Bi 2007 saedhengz Sawcuengh haeuj hagdangz sonhag sawqniemh. Ngamq hainduj, aenvih mbangj bohranz lijgaij loengloek, laihnaeuz seizneix cungj dwg yungh bujdunghva bae gyaulouz lo, caiq hag Sawcuengh di ndeu cungj mbouj miz yungh, lij gojnwngz caeuq Sawgun gyonjgyaux, yingjyangj hag Sawgun dem. Gyoengq bohranz cungj mbouj nyienh soengq lwg swhgeij bae hag Sawcuengh. Cimdoiq cungj cingzgvang neix, hagdangz laebbaenz le gunghcoz lingjdauj siujcuj, doenggvaq haeuj mbanj haeuj ranz bae liujgaij, gvangqlangh bae cimhra comz aeu sevei gak gyaiq gak cungj yigen, daengzlaeng doengzcaez nyinhnaeuz: Daj yisuz gyauyuz ndawbiengz guh aen bingzdaiz, yungh byauhcunj Vahcuengh gangj gojgaeq、yenjgyangj doxdax daengj hingzsik guh bangbouj, cauxguh hagdangz vwnzva fwnveiz. Riengzdwk hangh hong neix ndaej haeujlaeg bae hengzguh, danhfanz boux lauxsae lawz cizgiz gyahaeuj hangh hong neix ndawde bae, gak gaep lingjdauj cungj aeu ndiepcingz bae cihciz. Gyoengq bohranz hix roxdaengz, haujlai minzcuz vwnzva maenhndei ndawbiengz riengzdwk ndwenngoenz doxbae ciemhciemh deng gyoengqvunz lumzlangh bae liux lo. Ndigah, hagdangz lingjdauj gaem ndei aen gihvei neix, doenggvaq gak cungj roenloh bae vatgud cingjleix、swnjcienz minzcuz vwnzva maenhndei de, youq gwnz sevei cauxguh fwnveiz, hemqswenj minzcuz yisiz caenhvaiq ndiusingj gvaqdaeuj. Youq geij bi neix ndawde, hagdangz gaengawq saedcaeq, giethab baihgwnz anbaiz, cizgiz cujciz guh gak hangh hozdung, guh ndei hong senhconz fatdoengh. 2012 nienz 6 nyied 8 hauh, hagdangz youq cwngfuj、sevei gak gyaiq yinzsw, daegbied dwg Gvangjsih Gyauhdungh Cizdonz haenqrengz cihciz caeuq bangfuz lajde, guhbaenz le aen duzsuhgvanj yungz haeuj yenzsu minzcuz vwnzva he. Laebbaenz aen ban lwgnyez swnjcienz Heiqcuengh ndeu, youz hagdangz lauxsae cujciz hagseng aen ban neix gag bien gak yienj “go doiqfwen”、“haenh hagdangz” song cit Heiqcuengh daiq miz minzcuz vwnzva noengznwd neix, camgya daengx gih byauhcunj Vahcuengh caizyi byaujyenj seiz, song cit Heiqcuengh neix cungj aeundaej it daengj ciengj, ndaej daengz gak gaep lingjdauj caeuq gyoengq vunzmbanj Duh’anh gauhdu haenh ndei, caemhcaiq daihlig cihciz gij hong hagdangz. Guekgya Minzveij、Sinhgyahboh gyoengq conhgyah daengz hagdangz gaujcaz seiz, bingzgyaq hix gig sang. Seizneix, aen ban lwgnyez swnjcienz Heiqcuengh neix gungh miz 40 boux lwghag, haibanh miz Heiqcuengh Dwzbauj Lohnamz、yienzndokmax、fwen daengj geij aen yaubwnj goqcwngz.

Youq vatgud beizyangj lauxsae aen fuengmienh neix, hagdangz lingjdauj it fuengmienh dawz minzcuz vunznoix lauxsae roxnaeuz gij lauxsae haengjgyaez yinhyoz、dijyuz、meijsuz、vujdau daengj beizyangj baenz minzcuz vwnzva ndawbiengz lauxsae, ra gihvei baij gyoengqde ok rog bae gyaulouz hagsib, daezsang gij goeng- fou gyoengqde. Lingh fuengmienh, gaengawq sonhag saedcaeq, daengz ndawbiengz bae cimhra vatgud yisuz lauxsae. Vih hawj hagseng liujgaij gij goengfou goeknduj guh yienzndokmax Bouxcuengh, hagdangz lingjdauj bae daengz gwnzgai Duh’anh, cingj goenggeq Ginz Fungh daeuj ndaw hagdangz soncienz goengfou guh yienzndokmax; Heiqcuengh Dwzbauj Lohnamz、vujdau、yienzndokmax ngodyienj、eufwen daengj, cix gonqlaeng bae iucingj Fan Yizyiz、Loz Vaizgwnh、Ginz Fungh、Lij Sinhsau、Lij Sinhgoh daengj yiyinz ndawbiengz caeuq yienh Duenzheiqcuengh donzcangj daeuj son, bang hagdangz beiqyangj le buek hagseng guzgan maenhndei ndeu, vih hagdangz swnjcienz minzcuz vwnzva laeb roengz le goenglauz hungraeuh.

Doengzseiz, aen hagdangz neix gaemdawz gyauyuz cizlieng aen cungsim neix, dawz hong sonhag caeuq swnjcienz vwnzva maenhndei doxgiethab, dawz gij saeh lwgnyez gyauyuz gyoengq beksingq ceiq gvansim haenx giethab hwnjdaeuj, soucomz gyoengq beksingq doiq gij hong ndaw hagdangz daezok gak hangh yigen caeuq genyi, doengzseiz doiq lwgnyez louzsouj、lwgnyez aenranz dancaen、ranz gungzhoj bae doxdoiq bangcoengh. Gij banhfap neix, gawq soucomz ndaej swhliu, youh ndaej bangcoengh beksingq, engq ndaej daengz sevei gak gyaiq haenh ndei.

Aenvih youq swnjcienz minzcuz vwnzva ndawde cingzcik yienhda, Duh’anh Yangh Cunghsinhyau gonq- laeng ndaej bingz guh Daengx Gih Cuengh Gun Song Saw Vah Sonhag Saedniemh Hagdangz、Daengx Gih Minzcuz Vwnzva Gyauyuz Sifan Hagdangz, caemhcaiq gonqlaeng aeundaej Daengx Guek Youhsiu Gohyenz Cwngzgoj it daengj ciengj、Daengx Gih Gyauyuz Gohyenz Senhcin Danhvei、Baksaek Si “Vwnzmingz Danhvei”、“Song Gih Gunghcoz Senhcin Cizdij”、Dwzbauj Yen “Senhcin Gihcwngz Dangj- cujciz”、 “Fouz Doeg Danhvei” caeuq “Senhcin Donzcihbu” daengj cwng- hauh miznaj.

Dangqnaj, Duh’anh Yangh Cunghsinhyau gyoengq saeseng cingq saenqsim cibcuk, gaen hwnj yamqdin seizdaih, haicaux baenaj, mbouj- duenh daezsang hagdangz banhhag suijbingz caeuq banhhag yauyiz, haenqrengz daezswng gyauyuz sonhag cizlieng, banh baenz aen hagdangz hawj dangj caeuq yinzminz habhoz ndeu!