Hahsou dwk yiengj bauq daih’it lo. Ciuq 5 aen digih gyonjgeiq, gij vunzguhnaz Cauzsan ndaem ndaej 519.7 moux nazyienghbanj haeux- caeux, bingzyaenz mouxcanj 911 gaen, ceiq sang lij ndaej 1294 gaen. Youq gij vunzguhnaz Cauzsan sonyinx lajde, gij “nazgaenban” gak dieg swngh- canjdui ndaem haenx, daih dingzlai caemh ndaej fungsou.

Ginggvaq guhyiengh ndaem haeuxcaeux, vunzguhnaz Cauzsan hawj vunzguhnaz Guengjsae ndaej yawj seiqmienh. Boux vunzgeiq ndaej 70 lai bi he naeuz:“Gou gaenq baenzneix geq lo, lij caengz ndaej raen gvaq okhaeux baenzneix lai.” Doenghgij vunz yienzlaiz vaizngeiz haenx seizneix caemh saenqfug lo, gyoengqde naeuz:“Vunz de miz gij dinfwngz dajndaem ak dahraix, dou caiq mbouj bae hag cix doek gvaq seizndei lo!” Daengx gih gak dieg gij vunz iugouz gaenban haenx yied ngoenz yied lai, gij yienh、se mbouj anbaiz vunzguhnaz Cauzsan bae haenx, cungj faenfaen daezok iugouz: “Cingj swcigih baij vunzguhnaz Cauzsan bae ndaem nazyienghbanj.”

Veiz Gozcingh seizhaenx youq diegrog, ndaej rox aen cingzgvang neix le naeuz:“Gou yawj ne, cingj gij vunzguhnaz Cauzsan daeuj Guengjsae, dwg Guengjsae gyavaiq doigvangq dinfwngz senhcin nungzyez、coicaenh nungzyez swnghcanj fazcanj diuz roen lai vaiq ndei mbaet he.” De genyi Swcigih Dangjveij ngeixyaeng, dwg mbouj dwg caiq cingj Guengjdoeng lai baij bang bouxak gvaqdaeuj dem.

Doeklaeng, Swcigih Dangjveij gietdingh, cingjgouz Guengjdoeng caiq baij 2000 boux vunzak dajndaem Cauzsan hawj Guengjsae, youz boux dinghcangj nungzyezdingh gidij bae lienzhaeh. Aenvih seizhaenx Fuzgen、Gyanghsih daengj swngj caeuq mbangj dieg Swngj Guengjdoeng, caemh iucingj baij bouxak dajndaem Cauzsan bae son gingniemh, Cauzsan mbouj miz banhfap muenxcuk gij iugouz Guengjsae, cij baij le 1500 boux vunz gvaqdaeuj, ndawde baudaengz 100 boux vunz cangh ndaem makgam haenx. Makgam Cauzcouh seizhaenx youq daengx guek caemh haemq okmingz bw.(caengz sat)