Lungzsangh Cin Cunghsinhyau youq 1916 nienz laebbaenz, hagdangz gveihmoz daj iq daengz hung, seizneix hagdangz ciemq dieg menciz gaenq dabdaengz 10593 bingzfuengmij, dieg lauxsae caeuq hagseng ninz cungj- menciz 6530 bingzfuengmij. Miz 15 aen ban, 682 boux hagseng. 41 boux lauxsae, ndawde miz bwnjgoh yozliz 9 vunz, daconh yozliz 24 vunz, aeundaej cunghgiz cizcwngh 35 vunz, lauxsae habgeklwd dabdaengz 100%.

Lungzsangh Cunghsinhyau lai bi daeuj itcig swnjciep aen banhhag leixniemh “ingbaengh minzcuz gyauyuz fazcanj bingzdaiz, caepguh bingzan、doxhuz hagdangz”, doeng- gvaq mboujduenh gaijndei banhhag diuzgen、gyagiengz baihndaw guenj- leix、daezsang lauxsae suciz、caepguh doxhuz hagdangz, coicaenh hagseng cawjdoengh、doxhuz bae fazcanj, vih ciuhvunz hagseng fazcanj bae caep ndei giekdaej. Doenggvaq roengz- rengz, hagdangz cugbouh habbaenz aen fungheiq “haengjgangj、gingqnieb、laebdaek、soengqhawj”; aen fungheiq lauxsae “laemxsim saehnieb、angq bae soengqhawj”; aen fungheiq hagseng “angq hag、gaenx hag、rox hag” he.

Bi 2007, aen hagdangz neix ndaej dingh guh Sawcuengh sonhag saedniemh hagdangz, rap hwnj diuzrap “gaihcanj minzcuz gyauyuz, swnjciep minzcuz vwnzva, coicaenh minzcuz doxgiet” neix. Vihneix, hagdangz lingjdauj banhswj cibfaen yawjnaek, youq baihgwnz lingjdauj gvansim cihciz lajde, hailaeb le goq Cuengh Gun song saw vah sonhag, doengzseiz youq gak goh sonhag ndawde gya haeuj neiyungz minzcuz gyauyuz, lai baez gawjbanh “minzcuz gyauyuz gyangjco”, cujciz hagseng souyawj 《Aenranz Hung Cunghvaz》daengj gaisau minzcuz cihsiz loegsiengq yaemsiengq, son gyoengq hagseng bae liujgaij、aeueiq gak minzcuz fungsug sibgvenq、lizsij vwnzva、cunghgyau sinyangj, gikfat minzcuz swhauzganj caeuq gij saenqsim minzcuz. Caepguh le minzcuz cihsiz senhconzlanz、minzcuz cihsiz canjbanj, guh daengz doz saw caemh miz, doengsug heih rox, yiengq saeseng gaisau le guekgya minzcuz cwngcwz、fazgveih caeuq funghcingz minzsug minzcuz vunznoix, bujgiz minzcuz cihsiz. Doiq gyoengq lauxsae cienmonz dingh’ok beizyangj giva, gujli gyoengqde vaiqdi sughangz rox son. Youq cinsiuh、beizyin、okbae ngonzyawj hagsib daezhawj daegbied ciuqgoq, aeu gihvei hawj boux lauxsae maenhndei bae baijyienj swhgeij. Lienzhab saedniemh hagdangz wnq, guh minzcuz gyauyuz goqdaez yenzgiu caeuq gyauyenz hozdung, rengzrwd dwk doicaenh le aen hong Cuengh Gun song saw vah sonhag. Bi 2014, aen hagdangz neix sinhcingj bauq aeu gih gaep gyauyuz gohyenz goqdaez 《Beizyangj Hagseng Mizyinx Hagsib Sawcuengh Yenzgiu》. Doenggvaq yenzgiu goqdaez, dabdaengz baihlaj muzdiz: Youq gizdieg minzcuz cabyouq haenx guh miz daegsaek minzcuz gyauyuz, fungfouq ginzcung Bouxcuengh dangdieg、hagseng minzcuz cihsiz; yingjyangj、gyauyuz gyoengq hagseng、ginzcung cugbouh liujgaij minzcuz fungsug sibgvenq caeuq lizsij vwnzva、cunghgyau sinyangj Bouxcuengh daengj; sonyinx gyoengq hagseng、ginzcung bae nyinhrox、ndiepgyaez caemhcaiq bae swnjciep gij minzcuz vwnzva maenhndei bonj minzcuz, naengz ciepsouh、haengj yawj、haengjgyaez、hagsib maenhndei yinhyoz caeuq meijsuz cozbinj nem dijyuz hozdung bonj minzcuz; doenggvaq yinhyoz、dijyuz、meijsuz daengj gocwngz bae yiengq gyoengq hagseng gaisau siujsoq minzcuz yinhyoz、vujdau、meijsuz cozbinj caeuq dijyuz hanghmoeg daengj lai cungj lai yiengh haenx, hawj hagseng cugciemh gamjsouh、haengj yawj、haengjgyaez、hagsib gij minzcuz vwnzva maenhndei haenx, cugbouh dabdaengz swnjciep muzdiz; cujciz gyoengq hagseng camgya gak cungj minzcuz vwnzva doxdax, hawj hagseng youq ndaw doxdax de mboujduenh demgiengz minzcuz swhauzganj.

Gaenx ganq dawzmak caen hungraeuh. Geij bi daeuj, Lungzsangh Cunghsinhyau gonqlaeng ndaej bingz guh yienh、si、swcigih gaep “Vwnzmingz Hagdangz”, lai baez aeundaej ndaw yienh aen cwnghauh “Gyauyuz Gunghcoz Senhcin Danhvei”. Luz Gijcungh yaucangj caeuq Luz Yaubinh fuyaucangj aeundaej “Baksaek Si Maenhndei Yaucangj” gvaq. Vangz Anhgwz fuyaucangj youq ndaw hong “Buj Giuj” caeuq “Song Gih” biujyienh ndei, faenbied ndaej yenveij、yen minzminz cwngfuj nem yen gyauyuzgiz bingz guh “Song Gih Gunghcoz Senhcin Goyinz” caeuq “Senhcin Gyauyuz Gunghcozcej”. Gyaudauj cujyin Cinz Meijsez yezvu suijbingz sang, ak sonhag, lai baez aeundaej yienh maenhndei gyaudauj cujyin cwnghauh, caemhcaiq ndaej gih gyauyuzdingh bingz guh “Lauxsae Maenhndei Lajmbanj Guengjsae”. Fu’gyaudauj cujyin Liuz Sinhsenz dwg boux sonhag nwngzsouj ndaw hagdangz、boux daiqdaeuz guh gyauyenz, sonhag cingzcik maenhndei, hong gyauyenz cwngzyauq hungloet, gaenq aeundaej “Gvangjsih Siujyoz Suyoz Senhcin Gyauyenz Gungh- cozcej”、 “Baksaek Si Maenhndei Banhcujyin”、“Baksaek Si Maenhndei Sausenhdui Fujdaujyenz” cwnghauh gvaq. Gvanh Gveiliuz lauxsae gangj goq 《Bohlwg Youq Ndaw Deihdoengh》youq daengx gih Cuengh Gun song saw vah sonhag gangj goq doxdax ndawde aeundaej it daengj ciengj, fujdauj hagseng camgya gih byauhcunj Vahcuengh gangj gojsaeh doxdax aeundaej cijdauj ngeih daengj ciengj; Liz Caizsinh lauxsae goqgienh 《Gij Lwgnyez Geq Ndaundeiq》 camgya daengx gih Cuengh Gun song saw vah sonhag dohmeizdij goqgienh doxdax aeundaej it daengj ciengj; bi 2013 Luz Haijfwnh lauxsae son diuq gij vujdau 《āáǎà》aeundaej Dwzbauj Yen siujhagseng caizyi doxdax ngeih daengj ciengj. Daj bi 2010 gvaqdaeuj, ndaw hagdangz gyoengq lauxsae gungh aeundaej si、yienh gyauyuzgiz sonhag cizliengciengj 160 lai vunz- baez, hagseng camgya gak gaep gak loih doxdax aeundaej yienh gaep doxhwnj ciengjli 260 lai vunzbaez, gyoengq lauxsae youq camgya gak cungj ginwngz doxdax ndawde aeundaej ciengjhangh 120 lai vunzbaez……