Seizdoeng mbwn nit, haujlai vunz din、fwngz、fajnaj cungj hwnj baeznit. Yw baeznit miz haujlai genjdanh fuengfap, it dwg yungh rumzndat boq, couh dwg aeu dencuihfungh liz giz naengnoh hwnj baeznit 20 lizmij boq rumzndat 5 faen cung, yienghneix ndaej gyavaiq lwed naengnoh lae baedauq. Ngeih dwg nucat, couh dwg nucat song fajfwngz hawj de ndat le nucat giz baeznit, ciengzgeiz genhciz yienghneix guh, doiq ceihyw baeznit yaugoj mbouj loek.

Dwk naeng makgam roengz raemx- gyoet bae, caiq dwk di hingndip caeuq di gyu ndeu, hai feiz coemh goenj le langh ce hawj de miz saek 40 daengz 50 doh seiz cuengq din roengzbae cimq, moix singhgiz cimq 3 baez, laebdaeb cimq ndwen ndeu, doiq fuengzceih baeznit yaugoj gig ndei.

Buhvaq baujraeuj gaej ndaet lai. Baenz baeznit cujyau dwg mbwn nit cauhbaenz, danhseih hix miz gijwnq yinhsu yingjyangj. Lumj dumzmbaeq、rumz baet、daenj buh noix lai、dinghdingh naengh youq seizgan nanz, baeznit couh engq haeuj naek. Linghvaih, naetnaiq gvaqbouh、gwn laeuj fiz、dungx iek gvaqbouh、ok lwed、yingzyangj mbouj ndei daengj hawj rengzndang doekdaemq, hix yungzheih baenz baeznit.

Hwnj baeznit le gaej doq sikhaek ndat oep roxnaeuz nunaenx gizde, mienxndaej gizde foegraemx. Aeu gvaq 1 daengz 2 diemj cung cij ndaej ndat oep, danghnaeuz mbangjgiz mbouj deng sieng, wnggai yungh sinhmeizsu yenjgauh daeuj led, fuengz de ganjyenj.

Yawhfuengz baeznit miz sam aen cosih: 1、Lai guh dijyuz lienhndang, demgiengz rengzndang, caemhcaiq guh dingj nit lienhndang dem. Daj seizhah hainduj yungh raemxgyoet swiq naj、swiq din. 2、Gibseiz gwn haeux, caemhcaiq haeujsim gijgwn cizlieng, lai gwn gijgwn ndat, lumj youz、noh daengj. 3、Ciengz yungh golwgmanh oiq daeuj baek raemx swiq din swiq naj. Youq ndaw seizdoeng aeu daenj mauh. Mwh mbwn nityauyau seiz, lij wnggai daep goujcau daenj madfwngz. Vahsug naeuz:“Nit daj lajdin hwnj.” Seizdoeng, lij aeu daenj haizmienz, haeujsim cikdin baujraeuj dem.