9 daengz 10 nyied, Denhdwngj Yen Minzcuzgiz comz vunz roengz gihcwngz, bae caz gij cingzgvang vunzlai muengh mbouj muengh miz cezmuz gvangjbo denyingj densi aeu Vahcuengh bo, caemhcaiq cam vunzlai baenzlawz guh ndei hong gvangjbo denyingj densi Vahcuengh.

Baez diucaz neix camcaz daengx yienh 13 aen yanghcin 26 aen cunhveij(segih) 520 ranz(vunz), gungh caz 15 aen fuengmienh, gungh sou dauq gij gienjcamdap 520 faenh. Ginggvaq camcaz rox, gij gienj- camdap ndawde han naeuz bingz- ciengz aeu Vahcuengh doxgyau de ciemq 84%； gamjdaengz Vahcuengh depgyawj simvunz ciemq 88%；gyaezmaij gvangjbo denyingj densi Vahcuengh ciemq 81%； dingq rox gvangjbo denyingj densi Vahcuengh ciemq 97%. Neix couh naeuz aen yienh neix vunzlai muengh miz gvangjbo denyingj densi Vahcuengh.

Doenggvaq camcaz nem yenz- giu, Denhdwngj Yen gij hong guh gvangjbo denyingj densi Vahcuengh de lij miz geij aen vwndiz daeuz: Ndaw yienh gvangjbo denyingj densi Vahcuengh noix; bouxgicej bouxbien nem bouxboqyaem noix ndaej camgya conhyez beizyin, rox vah dangdieg noix, conhyez suijbingz daemq; cezmuz mbouj lai, cezmuz maenh- ndei noix. Yienghneix le, aen yienh neix nyinhnaeuz: Wnggai haenqrengz fazcanj gvangjbo denyingj densi Vahcuengh.

(Vangz Souciz/黄寿积)