Aen sigij gonq betcib nienzdaih, Gveigangj Si Cinzdangz Gih Mungzgungh Yangh Gauhcanh Siujyoz ndaej dingh guh Sawcuengh haeuj hagdangz sawqniemh diemj. Daj seizde gvaqdaeuj, Gauhcanh Siujyoz hopheux “aeu Cuengh guhcawj, Cuengh Gun giethab, aeu Cuengh coi Gun, Cuengh Gun cungj rox” “cibroek cih” sonhag fuengcim neix, gaenx guh hong Cuengh Gun song saw vah sonhag, sonhag cizlieng onjdwt daezsang, aeundaej cingzcik maenhndei. 2009 nienz aeundaej Cinzdangz Gih 2008-2009 hagnienz siujyoz suciz gyauyuz sonhag cwngzgoj ngeih daengj ciengj; 2010 nienz、2011 nienz、2012 nienz lienzdaemh aeundaej Cinzdangz Gih siujyoz suciz gyauyuz cwngzgoj it daengj ciengj; 2011 nienz aeundaej “Cinzdangz Gih hong gyauyuz senhcin cizdij” cwnghauh; 2013 nienz aeundaej Cinzdangz Gih gyauyuz hidungj senhcin cizdij cwnghauh.

Byaij haeuj bakdou hung Gauhcanh Siujyoz, caenhraen aenlaeuz sonhag moqsup daengjdwt, ndaw hagdangz faex sang heuswd raemhrwd; lanzgiuzcangz、yindung- cangz、daiz binghbanghgiuz、daizheiq、luengqroq vwnzva… yienghyiengh miz caez, hawj vunz roxnyinh gizneix ngamj doegsaw、doegsaw ndei. “Seizhaenx hagdangz mbouj miz ciengzgvaengh, mbouj miz aendou hagdangz, cij miz aen laeuzsonhag 4 caengz ndeu, aenvih guh ndaej nanz lai gaenq youh gaeuq youh vaih lo; ndaw hagdangz gumzgumz gamxgamx, hwnj nywj hwnj rum nyasaengsaeng; cix mbouj miz gizdieg guh hozdung, yawj bae mbouj lumj aen hagdangz ndeu. Aenvih diuzgen yaez lai, haujlai lauxsae cungj siengj banhfap diuhdeuz, hagdangz gyauyuz sonhag cizlieng caemh mbouj ndei.” Veiz Cinhlanz fuyaucangj dauqngeix gij saeh haemzhoj dangnienz seiz, lwnh dwk lij lumj saeh ngoenzlwenz nei.

Gauhcanh Siujyoz haenqrengz guh ndei hong hagdangz gensez, vih aen hagdangz guh ndaej engq gyaeundei, hagdnagz lingjdauj lauxsae cungj mbaetraej dwk yungh ngaenz, dawj gij ngaenz banhgoeng de dingzlai cuengq haeuj hagdangz gensez bae; doengzseiz lij cien fueng bak geiq ceng’aeu baihgwnz bangcoengh, dan cib lingz bi neix daeuj hagdangz couh roengzngaenz 70 lai fanh maenz guh gya’gvangq laeuzsonhag caeuq cingjcoih, caep ciengzgvaengh, guh bakdou hung hagdangz, bu roen ndaem gorum gova daengj, hawj hagdangz gihcuj sezsih gensez guh ndaej haemq ndei. 2012 nienz, Cinzdangz Gih hainduj guh aen hanghmoeg ranz goenggya lauxsae coyouq neix, Gauhcanh Siujyoz caemh ndaej guh doengh laeuzyouq goenggya 3 caengz ndeu, dangqnaj gaenq guh ndei ndaej hawj lauxsae coyouq. “Hawj lauxsae youq ndaej onj louz ndaej roengzdaeuj caemhcaiq guh ndaej swnhsim, cij aeundaej gyauyuz cwngzgoj maenhndei.” Gyaudauj cujyin Cinz Cinhdonz lwnh naeuz gicej nyi.

Vih daezsang hagdangz gyauyuz sonhag cizlieng, Gauhcanh Siujyoz lij guh aen “gunghcwngz lauxsae mizmingz”, bangcoengh lauxsae coz sug vaiq guh ndei. Hagdangz anbaiz lauxsae coz camgya gak cungj sonhag beizyin caeuq sonhag doxdax hozdung, sonyinx gyoengqde sij lunvwnz sonhag, guh goqdaez yenzgiu, seizneix daengx hagdangz miz 6 boux lauxsae baenz le daengx yangh sonhag guzgan lauxsae. Daj 2003 nienz gvaqdaeuj, Gauhcanh Siujyoz miz 10 bien lunvwnz lauxsae coz aeundaej swcigih gaep ciengj, miz 32 bien ndaej si gaep ciengj; 2010 nienz, Cinz Cinhdonz、Cinz Caijsenh song boux lauxsae camgya Daengx Gih Cuengh Gun Song Saw Vah Lauxsae Gangjgoq Doxdax doengzcaez aeundaej it daengj ciengj.

2003 nienz 8 nyied, daengx guek mozfan lauxsae、daengx guek swhdwz senhcin goyinz、daengx guek “sam bet hungzgizsouj”、Cunghgoz Gungcanjdangj Daih Cibcaet Baez Daengx Guek Daibyauj Daihhoih daibyauj Veiz Cinhlanz daj Gujsanh Siujyoz ndaw yangh diuh daengz Gauhcanh Siujyoz dang fuyaucangj, caemh daiq gij sonhag leixniemh sonhag fuengfap ndei de daengz hagdangz. “Daj Veiz fuyaucangj daiq gij sonhag yenzgiu cwngzgoj ‘gyagiengz Cuengh Gun giethab, cozvwnz daezgonq son sij’ youq Gujsanh Siujyoz romcomz ndaej neix daiq daengz hagdangz dou le, ginggvaq roengzrengz guh geij bi, gij sonhag cizlieng hagdangz dou ndaej daezsang haujlai.” Cinz Caijsenh lauxsae lwnh naeuz. “Doenggvaq hawj hagseng youq it ngeih nienzgaep sug Sawcuengh、doeg Sawcuengh, youh ciuq aen daegdiemj hagseng rox doeg rox sij Sawcuengh, daj it nienzgaep couh son hagseng sij cozvwnz Sawcuengh, daengz ngeih nienzgaep hagseng rox di Sawgun le, youh son hagseng dawz cozvwnz Sawcuengh hoiz baenz cozvwnz Sawgun, vih hagseng youq sam seiq nienzgaep rox sij cozvwnz Sawgun caep roengz giekdaej ndei, hawj hagseng rox gij yinxdaeuz caeuq ndeicawq ‘cozvwnz daezgonq hag sij’ de.” Veiz Cinhlanz gaisau naeuz gicej nyi.

Gauhcanh Siujyoz yawjnaek guh hozdung rogdangz, hawj gij naengzlig hagseng ndaej cienzmienh fazcanj. Hagdangz laeb miz doih diuqfoux、 aencuj yinx meijsuz、doih Fwencuengh、aencuj langjsung seiswz daengj, gujli hagseng ciuj gij haengjgyaez swhgeij camgya haeujbae, youq ndaw hozdung angqyangz majhung. 2009 nienz 5 nyied, hagdangz vwnzyidui daibyauj Mungzgungh Yangh camgya Cinz- dangz Gih cungh siuj hagseng vwnzyi veiyenj aeundaej it daengj ciengj; 2011 nienz 9 nyied, youq camgya Guengjsae cungh siuj hagseng gangj goj Sawcuengh doxdax ndawde, hagseng Couh Yenzyenz aeundaej it daengj ciengj; 2011 nienz 11 nyied, hagdangz doih binghbanghgiuz camgya Mungzgungh Yangh cungh siuj hagseng binghbanghgiuz doxdax ndawde ndaej mingz daihdaeuz.

Gauhcanh Siujyoz guh Cuengh Gun song saw vah sonhag ngeihcib lai bi, guh ndaej haemzhoj, caemh guh ndaej sim’angq, nyeux gyaeuj yawjyawj gij vunqdin byaij gvaq- daeuj haenx, aen simmuengh “vih lwgnyez diegbya dem doiq fwed siengjmuengh ndeu” youq moix yamq roen de yap rongh, caemh lij yaek ciuq rongh diuzroen baenaj. “Dou miz saenqsim dawz hagdangz hwnjguh baenz aen hagdangz mizmingz hagseng haengjgyaez、bohranz cuengqsim、lauxsae vuenyungz、sevei habhoz ndeu.” Yaucangj Cinz Fuzbu doeklaeng gig miz saenqsim dwk doiq gicej naeuz.