Gveigangj Si Cinzdangz Gih Mungzgungh Yangh Gujsanh Siujyoz daj 1984 nienz hainduj guh hong Cuengh Gun song saw vah sonhag sawqniemh gvaqdaeuj, lauxsae hag- seng doxgiet haenqrengz bae guh, mbeilaux cimhra diuzroen Cuengh Gun song saw vah sonhag, vih swcigih dingh ok Sawcuengh haeuj hagdangz “aeu Cuengh guhcawj, Cuengh Gun giethab, aeu Cuengh coi Gun, Cuengh Gun cungj rox” cibroek cih fuengcim neix daezhawj sawqguh baengzgawq, aeundaej cingzcik hungloet. Hag- dangz 1986 nienz ndaej bingz guh Daengx Gih Hong Sawcuengh Haeuj Hagdangz senhcin hagdangz, 1993 nienz ndaej bingz guh daengx guek minzcuz gyauyuz senhcin cizdij; 2000 nienz ndaej bingz guh Gveigangj Si sifan siujyoz; 2003 nienz、 2006 nienz ndaej bingz guh Gveigangj Si cangzgveih guenjleix senhcin danhvei, bibi aeundaej Cinzdangz Gih siujyoz suciz gyauyuz cwngzgojciengj, 2011 nienz haggeiz seizcou satbyai Sawcuengh gaujsi aeundaej daengx gih mingz daihdaeuz.

Gujsanh Siujyoz yawjnaek guenj ndei hong sonhag, haenqrengz daezsang sonhag cizlieng. Aenban lingjdauj doxgiet caezsin, guh ok yiengh ndei, daiqdaeuz camgya yezvu beizyin、dangzgoq goenghai daengj hozdung, daegbied dwg Sawcuengh sonhag hozdung; doengzseiz bouxboux cungj giem son dangzgoq Cuengh Gun roxnaeuz goq suyoz aen ban ndeu, hong guenjleix guh ndaej ndei, hong sonhag caemh maenh’ak, gyoengq lauxsae cix simfug haenqrengz guh. Hagdangz dingh ok gij guenjleix cidu caezcienz de, hawj lauxsae youq beigo、sonhag、baegaij、gaujhwz daengj fuengmienh ndaej ciuqei bae guh, hawj hong sonhag guh ndaej swnhleih mizyauq.

Gujsanh Siujyoz gaenx bae caux diuzgen、laeb bingzdaiz, hawj lauxsae ndaej ciuq gij conhyez bonjfaenh bae hag bae mu, mboujduenh daezsang sonhag suijbingz. Hagdangz sonyinx lauxsae daj “roengzrengz” sonhag cienj baenz “yunghsim” sonhag, doenggvaq guh gak cungj hozdung, lumjbaenz guh bangaep banjbau bingzbeij、banhcujyin maenhndei bingzbeij caeuq lwnh cienz gingniemh、doegsaw bitgeiq bingzbeij、goh yijvwnz suyoz sonhag cingzyauq bingzbeij、“gij rizdin majhung gou” cawjdaez goqgienh bingzbeij daengj, doiq doenghboux lauxsae mizsim、yunghsim、saeqsim caiqlij cingzyauq ndei haenx youq daengx hagdangz byaujyangz de caiq hawj doxgaiq ciengjli; doengzseiz sonyinx lauxsae lai yawj saw, lai hagsib, youq ndaw hagsib daezsang swhgeij, caemhcaiq senj baij lauxsae camgya gij gak cungj beizyin gyauyenzsiz cujciz haenx, lij faen geiz faen buek dwk senj baij mbangj lauxsae camgya gij gak cungj doxgyau yenzdauj hozdung wnq, boux lauxsae bae diegwnq hagsib beizyin ma le sikhaek doenggvaq gyauyenz hozdung caeuq daihgya faenyiengj beizyin souhaeuj; vanzlij sonyinx lauxsae youq sonhag caeuq gohyenz “doxbouj” ndawde ndaej doengzcaez daezsang, banh “baenzlawz daezsang unsaw yaugoj gyauhliuzvei”、 banhcujyin maenhndei gingniemh veibauvei daengj hozdung, sonyinx lauxsae doenggvaq sij lunvwnz、sonhag dijvei、anqlaeh sonhag faensik daengj lai cungj hingzsik bae roxyiuj bonjfaenh, daezsang bonjfaenh.

Gujsanh Siujyoz gyagiengz hag- seng guenjleix, haenqrengz daezsang hagseng cunghhoz suciz. Hagdangz aeu segih gyauyuz swhyenz daeuj guh dwzyuz hozdung, caeuq sevei、ndawranz boiqhab ndei, guh ndei hagseng hingzveiz gveihfan yangj- cwngz gyauyuz, bibi genhciz ciuhai aenhoih cunhveij caeuq vunzlaux ndaw mbanj、aenhoih bohranz, caemhcaiq ciengzseiz bae cam gij vunzmbanj henzgyawj, gibseiz roxyiuj hagdangz giz guh ndaej mbouj ndei de, hawj bohranz caeuq sevei gak gyaiq saenq ndaej gvaq caemhcaiq cihciz gij hong hagdangz. Hagdangz cujciz guh mizgven gyauyuz hozdung, hawj hagseng angqyangz hagsib, cangq- vuengh majhung, lumjbaenz hagdangz moix aen haggeiz cungj guh baez cozvwnz Cuengh Gun ndei baijnem ndeu、baez bangaep minzcuz vwnzva cawjdaez banjbau ndeu、baez doegsaw bitgeiq gyauhliuz bingzbeij ndeu、baez Cuengh Gun song vah langjsung doxdax ndeu、baez gangj goj Vahcuengh doxdax ndeu、baez yienhciengz cozvwnz Cuengh Gun doxdax ndeu、baez vwnzyi comzyienj ndeu、baez sij cih veh veh doxdax ndeu daengj hozdung, hawj hagseng youq dangz goq daihngeih neix ndaej baijyienj bonjsaeh swhgeij, mizyinx youh sim’angq. Hagdangz gaijbienq cungj fuengfap bingzgyaq caenh yawj hagseng yijvwnz suyoz cingzcik ndeiyaez de, daj dwz、ci、dij、meij、lauz haj daih fuengmienh bae bingzgyaq hagseng, faen guh Sawcuengh、vwnzmingz、veiswngh、dijyuz、caizyi daengj 13 hangh bae bingzgyaq yienzhaeuh gyoebgya guh ciengjli, gigfat hagseng cienzmienh fazcanj, caemhcaiq dawz gij saeh ndei hagseng sij baenz faenzcieng caeuq gij mbawsiengq ndaej ciengj、camgya gak cungj doxdax gyoengq hagseng guh baenz banjbau ndaej senjdoengh, dawz bae ndaw gak aen mbanj baijcuengq, hawj vunzmbanj comz yawj, aeu lwgda caeuq conghbak vunzmbanj haenh caeuq coi hagseng gaenx hag haengj cam, ceng’aeu cingzcik ndei.

Seizneix, Gujsanh Siujyoz laux- sae hagseng caezsim caenhrengz, laebdaeb guh ndei gak hangh Cuengh Gun song saw vah son caeuq hag hozdung, hawj gyauyuz sonhag cizlieng ndaej daezsang, ceng’aeu vaiqdi caux- laeb baenz aen hagdangz lajmbanj ceiq maenhndei.