Youq Guengjsae raeuz 24 aen minzcuz cunghyoz saedhengz Cuengh Gun song saw vah gyauyuz ndawde, Gveigangj Si Cinzdangz Gih Mungz- gungh Yangh Minzcuz Cunghyoz dwg aen hagdangz dog dieg youq lajmbanj ndeu, caemh dwg Gveigangj Si aen hagdangz cuhcungh guh Cuengh Gun song saw vah sonhag dog ndeu. Daj laebbaenz gvaqdaeuj, hagdangz couh ciuq gij leixniemh banhhag “aeu vunz guh goek, yienghyiengh vih hagseng, hawj lwgnyez Mbanjcuengh bouxboux ndaej angqyangz hagsib cangqvuengh majhung” neix, daj gij saedcaeq cingzgvang hagdangz caeuq hagseng bae guh, cauhmoq fuengfap sonhag, onjdwt daezsang gyauyuz sonhag cizlieng, aeundaej cingzcik yienhda. Hagdangz moix bi cungj aeundaej Cinzdangz Gih gyauyuz sonhag cwngzgoj ciengj; 2005 nienz ndaej bingzguh Gveigangj Si suciz gyauyuz senhcin danhvei; 2007 nienz aeundaej Guengjsae Hong Saw Vah Minzcuz cizdij ngeihdaengjgoeng; 2011 nienz aeundaej Gveigangj Si yivu gyauyuz cangzgveih guenjleix senhcin hagdangz.

Guengjsae raeuz dauqfuk doihengz sawjyungh Sawcuengh le, Mungzgungh Yangh Minzcuz Cungh- yoz caemh riengzdwk hwnjguh laeb- baenz. “Seizhaenx aenvih roengz- ngaenz siuj lai, hagdangz gyausiz、rugninz cungj dwg ranzvax ranzvaih, yindungcangz cix gaebgedged; caet bet boux lauxsae ciengzgeiz caenx youq fungh rugninz hung ndeu. Louz lauxsae roengzdaeuj sonsaw、hah hagseng haeuj hagdangz doegsaw cix dwg gienh saeh hung gyaeujdot ndeu.” Yaucangj Luz Gozminj lwnh naeuz gicej nyi.

Saedhengz Cuengh Gun song saw vah gyauyuz, caemh hawj Mungzgungh Minzcuz Cunghyoz daezhawj aen seizndei miz ik ndeu. Baengh gij ndeicawq neix, hagdangz lingjdauj lauxsae mbouj lau dwgrengz haemzhoj, mo laep caux roen, roemx ok diuzroen ronghlwenq cuhcungh guh Cuengh Gun song saw vah sonhag ndeu. Hagdangz ciuq aen saedcaeq cingz- gvang hagseng cungj dwg daj gij siujyoz saedhengz Cuengh Gun song saw vah sonhag sawqniemh hagdangz ndaw yangh haeujdaeuj rox Sawcuengh neix, dingh hwnj dangz goq Sawcuengh bizsiuhgo, moix aen singhgiz song aen goqseiz, yienghneix ndaej hawj hagseng daj yozcenzbanh daengz cuhcungh cungj ndaej hag Sawcuengh. Doengzseiz, dawz cung- denj sonhag cuengq youq rox yungh gwnzde, sonyinx hagseng soucomz dangdieg gij fwen、heiq aeu sawndip geiq haenx, riengzlaeng youq gwnz dangz Sawcuengh gangjgej caemhcaiq sonyinx de aeu Sawcuengh gyoepyaem hoiz geiq roengzdaeuj, hawj hagseng yinx hag gyaez yungh Sawcuengh. Caiqlij yungh gij ndeicawq Sawcuengh, son hagseng Cuengh Gun doiqciuq, ra ok diuz roen moq sij cozvwnz Cuengh Gun ndeu, dan gyawj haj bi neix, moix bi cungj miz ceiq siuj 20 boux hagseng miz cozvwnz ndaej youq gwnz 《Gveigangj Yizbau》、《Gvangjsih Minzcuz Bau》 daeng okdaeuj, sonhag yauzgoj gig ndei.

Vih hawj gij hozdung neiyungz gwnz dangz caeuq rog dangz hagseng lai cungj lai yiengh, Mungzgungh Minzcuz Cunghyoz moix aen haggeiz cungj anbaiz guh gak cungj gak yiengh Cuengh Gun song saw vah gyauyuz sonhag doxdax hozdung, cauxlaeb gij yiengh ndei minzcuz vwnzva ndaw hagdangz. Hagdangz doenggvaq banh “yozgoh cihsiz doxdax”、“hagseng cozvwnz Cuengh Gun doxdax”、“Vahcuengh byauhcunjyinh yienj- gangj doxdax”、“lauxsae Cuengh Gun song saw vah gwnz dangz sonhag doxdax” daengj hozdung, dawz gij yiengh ndei mizyinx hwnghoengh de baijyienj okdaeuj, hawj lauxsae、hagseng gagnyienh gagrox dwk camgya haeuj ndaw gak cungj hozdung bae, caemhcaiq aeundaej cingzcik maenh- ndei. 2010 nienz, hagseng Leiz Gizgiz daibyauj Gveigangj Si bae camgya “Cingz Mbanjcuengh” Vahcuengh Yienjgangj Doxdax youz Swcigih Minzyijveij caeuq Gvangjsih Gvangjbo Dendaiz doxcaemh banh neix, aeu- ndaej itdaengjciengj.

Mungzgungh Minzcuz Cunghyoz laemxsim yenzgiu Cuengh Gun song saw vah sohhag, caenhsim cimhra roen moq sonhag. Hagdangz dingh ok le dauq guenjleix gihci gohyoz caeuq guenjleix cosih mizyauq ndeu, hawj lauxsae guh ndaej daengz guh ndaej sim’angq, ndiepgyaez hong minzcuz gyauyuz, ansim guh ndei hong sonhag, doxgiet caezsim bae haekfug gunnanz guh gyaugaij sawqniemh, cauhmoq sonhag fuengfap, daezsang hagseng cingzcik. Lauxsae Cinz Cwngz caeuq Giuh Feihyungz dwg Bouxgun, ngamq daengz hagdangz seiz Vahcuengh cungj dingq mbouj rox, vunz ndaw ranz caeuq baengzyoux cungj coi songde vaiqdi diuh bae aen hagdangz wnq, hoeng songde genhciz guh roengzdaeuj, gaenxgoemx dwk bae camgya gak gaep beizyin hagsib, lij youq seiz cuengqhag bae caeuq vunzmbanj hag gangj Vahcuengh, mbouj geij nanz couh rox gangj Vahcuengh bienzbed, lij hag rox Sawcuengh dem, riengzlaeng baenz le hagdangz Cuengh Gun song saw vah sonhag guzgan lauxsae. Lauxsae aen hagdangz neix couhdwg yienghneix, gaenx hag gaenx mu, mboujduenh daezsang bonjsaeh sonhag, seizneix daengx hagdangz gaenq miz 29 boux lauxsae camgya conhgoh swng bwnjgoh hansou、gaghag gaujsi caemhcaiq aeundaej bizyez cwngsuh. 2001 nienz, hagdangz lauxsae hainduj camgya sengjgaep goqdaez 《Cuengh Gun Song Saw Vah Sonhag Sawqniemh Yenzgiu》 caeuq guekgya gaep goqdaez 《Guengjsae Siujyoz Cuengh Gun Song Saw Vah Sonhag Yenzgiu》daengj goqdaez yenzgiu, gij goqdaez neix cungj gaenq cienzbouh gietdaez niemhsou, aeundaej hangh guekgya gaep gohyenz cwngjgoj ndeu, 2 hangh sengjgaep gohyenz cwngzgoj.

Guh ok faenh goengrengz ndeu, caemh miz faenh souhaeuj ndeu. Mungzgungh Minzcuz Cunghyoz 2011 nienz cunghgauj cingzcik cungj ndaej A+ haenx miz 2 vunz, gauj hwnj sienq sifansing gauhcungh 116 vunz; 2013 nienz gauj hwnj sienq sifansing gauhcungh 163 vunz, 2 boux cingzcik cungj ndaej A+.

Roengzrengz gaenx guh ngeihcib lai bi le, seizneix Mungzgungh Yangh Minzcuz Cunghyoz gaenq yamq haeuj mboengq fazcanj moq, hagseng dem daengz 1373 vunz; doengh laeuz- sonhag moq gungh gvangq 2362 bingzfanghmij haenx gaenq guh baenz, song doengh laeuzyouq lauxsae roengzngaenz 396 fanh maenz haenx caemh guhbaenz yaek ndaej senj haeujbae youq. Doenggvaq coihcingj, yienghsiengq hagdangz moqsag ronghlwenq, yienjok gij ngumhngaeuz ngoenzcog engq gyaeundei de!