[Vah bouxbien] Gih raeuz saedhengz Cuengh Gun song saw vah sonhag sawqniemh gaenq ndaej samcib lai bi, yienznaeuz saemxsaemx saxsax, yienznaeuz saek seiz daemjndoet, hoeng, gyoengq beixnuengx guh hangh hong neix, mbouj lau dwgrengz haemzhoj, gaenx mu fuengfap sonhag, lauxsaed haenqrengz bae guh ndei moix gienh saeh son ndei moix dangz saw, aeundaej le cingzcik yienhda, daeng haenh daeng danq! Daj geiz neix hwnj, bonjbauq dawz gij saeh ndei gij yiengh ndei hagdangz Cuengh Gun song saw vah raeuz sij okdaeuj daeng hawj daihgya yawjyawj, muengh daihgya caez daeuj cihciz、bangcoengh hangh hong neix guh ndaej engq ndei, engq hawj vunzlai habhoz!

Gveigangj Si Cinzdangz Gih laebbaenz cib lai bi gvaqdaeuj, ciepswnj caeuq raphwnj le diuzrap naek guh hong Cuengh Gun song saw vah gyauyuz, yawjnaek caeuq gyagiengz sonyinx nem guenjleix hong Cuengh Gun song saw vah gyauyuz, haenqrengz caepmaenh caeuq gyahung Cuengh Gun song saw vah gyauyuz cwngzgoj, gaenxgomx bae cauxlaeb aen gihdi guh yiengh ndei Cuengh Gun song saw vah sonhag, aeundaej cingzcik yienhda. Seizneix, Mungzgungh Yangh ndaw gih de miz Cuengh Gun song saw vah gyauyuz hagdangz gungh 7 aen cunh vanzsiuj caeuq aen cuhcungh ndeu, yozcenzbanh hagseng 516 vunz, siujyozswngh 2150 vunz, cuhcungh- swngh 1375 vunz, loq ndaej guh baenz le aen Cuengh Gun song saw vah gyauyuz dijhi daj yozcenz gyauyuz daengz cuhcungh gyauyuz haenx.

Cibgeij bi daeuj, Cinzdangz Gih cien fueng bak geiq gaemdawz gij seizndei gak fuengmienh, gyalai roengzngaenz, haenqrengz sien anbaiz gaijndei gij diuzgen banhhag hagdangz Cuengh Gun song saw vah, dan 2011~2013 nienz, aen gih neix couh youq hengzguh hagdangz ancienz gunghcwngz、coihcingj ranz hagdangz daengj 214 aen hanghmoeg ndawde roengzngaenz 1000 lai fanh maenz, hawj Cuengh Gun song saw vah hagdangz aen’aen miz ranzhag moq、doenghyiengh sonhag moq、daizeij moq, banhhag diuzgen ndei gvaq dangdieg doengzloih hagdangz.

Cinzdangz Gih Cuengh Gun song saw vah hagdangz banhhag diuzgen ndei, ndeicawq lai, vunzlai caemh haengjgyaez caeuq cihciz, caemh miz haujlai hagdangz sinhcingj saedhengz Cuengh Gun song saw vah sonhag. Baenzneix, 2013 nienz, aen gih neix ciuq mizgven vwnzgen cingsaenz, dingh demgya Sinhlingj Siujyoz、Yinghngoz Siujyoz ndaw Mungzgungh Yangh guh Cuengh Gun song saw vah gyauyuz hagdangz, caemhcaiq hawj gij hagdangz neix lienz baenz benq ndeu, ndaej fuengbienh guh gyauyenz hozdung, caemh fuengbienh guenjleix, hawj gveihmoz banhhag hwnj le mbaek moq ndeu.

Cib lai bi neix, Cinzdangz Gih laemxsim ca ndei hong cizlieng sonhag, gouz saed caux moq, mbouj- duenh daezsang cizlieng sonhag, doicaenh hong Cuengh Gun song saw vah sonhag yamqonj baenaj. Gyoengqde laeb ndei laeb caezcienz sonhag guenjleix cidu, dingh ok 《Cinzdangz Gih Cuengh Gun Song Saw Vah Hagdangz Sonhag Cangz- gveih Gihbwnj Yauhgiuz》 daengj haujlai guenjleix cidu, ca ndei gij hong gwnzdangz sonhag, gyagiengz gamyawj genjcaz cizlieng sonhag; doengzseiz gaenx guh diuyenz, youq ndaw gvaengz 《Sawcuengh Gocwngz Byauhcunj》daez ok cungj lohnaemj sonhag moq baez mbaek gemjsiuj dangz vahcoj neix, couhdwg youq nienzgaep daemq Cuengh Gun caemhdangz son、nienzgaep gyang mbangj caemhdangz、nienzgaep sang caemhdangz siuj neix, aeundaej sonhag yaugoj yienhda.

Cinzdangz Gih yawjnaek hong gyauyenz Cuengh Gun song saw vah, bingzciengz cawz ciuq giva guh ndei cangzgveihsing gyauyenz hozdung le, lij cujciz gak gaep gyauyenz yinzyenz doenggvaq gij hingzsik dingq、caz、yawj neix bae cienzmienh genjcaz、sonyinx gak aen hagdangz gyauyuz sonhag guenjleix、lauxsae sonhag cingzgvang、hagseng hagsib cingz- gvang, yaugoj haemq ndei. Doengzseiz cujciz Cuengh Gun song saw vah sonhag lauxsae cungjgez sonhag ging- niemh, sij sonhag lunvwnz, camgya gak gaep yenzdaujvei caeuq sonhag lunvwnz bingzbeij, camgya gak gaep godiz yenzgiu, hag aeu gingniemh, daezsang bonjfaenh.

Cinzdangz Gih yawjnaek hong beizyin lauxsae Cuengh Gun song saw vah, cujciz lauxsae camgya swcigih、si、yienh gaep Cuengh Gun song saw vah gyauyenzyenz、hagdangz yaucangj、gyaudauj cujyin、guzgan lauxsae beizyin caeuq “bak boux lauxsae Cuengh Gun song saw vah mizmingz” hanghmoeg beizyangj giva, sien anbaiz Cuengh Gun song saw vah lauxsae camgya “lajmbanj lauxsae suciz daezswng giva”、 “gozbeiz giva”、“gihbeiz giva”daengj hanghmoeg beizyin; moix aen singhgiz lij cujciz lauxsae hag Sawcuengh, hawj gij lauxsae mbouj rox Sawcuengh roxnaeuz rox Sawcuengh mbouj lai haenx ndaej daezsang Sawcuengh suijbingz, riengzlaeng ndaej guh hong Cuengh Gun song saw vah sonhag. Doengzseiz laeb aen gunghcozsiz lauxsae mizmingz, aeu lauxsae mizmingz guh daeuz, camgya caeuq banh gak cungj sonhag yenzgiu hozdung, caemhcaiq baij lauxsae mizmingz bae daengz hagdangz hwnj dangzgoq sifan, fazveih boux lauxsae mizmingz guh yiengh ndei、sonyinx、dazyinx、daiqdoengh cozyung, aeu diemj daiq mienh, daezsang sonhag cizlieng, vih Cuengh Gun song saw va sonhag fuzvu, aeundaej yaugoj ndei.

Cib lai bi daeuj, Cinzdangz Gih lauxsaed haenqrengz bae guh hong Cuengh Gun song saw vah gyauyuz, aeundaej cingzcik maenhndei, moix bi hagseng camgya daengx gih siujyozswngh Sawcuengh bizyez dungjgauj, cingzcik cungj dwg baiz youq daengx gih daih’it mingz, Sawgun sonhag cingzcik caemh cungj ndei gvaq dangdieg doengzloih hagdangz suijbingz, okyienh le buek senhcin cizdij caeuq goyinz ndeu, baenz Gveigangj Si mbaw geiznding hong minzcuz gyauyuz ndeu, Swcigih gyauyuzdingh gonqlaeng 9 baez youq Cinzdangz Gih ciuhai Cuengh Gun song saw vah sonhag gunghcoz codanzvei, aeu gij hengzdoengh neix bae haengjdingh caeuq haenhdanq le gij cingzcik yienhda Cinzdangz Gih aeundaej haenx.

2013 nienz 5 nyied, Swcigih Gyauyuzdingh dingh Cinzdangz Gih guh Guengjsae Cuengh Gun song saw vah sonhag sifan gihdi, gijneix hawj Cinzdangz Gih gyoengqvunz guh hangh hong neix haenx gig souh gujvuj, caemhcaiq gig miz saenqsim. Seizneix gyoengqde cingq ra cinj dinghvih, yawj cinj muzbyauh, dingh ok le hengzguh fangh’an, ceng’aeu ciuq byauhcunj sang、yauhgiuz yiemz、cizlieng sang dwk bae guh ndei gak hangh hong, haenqrengz laebguh ndei sifan gihdi.