传承民族文化 相约中国梦

Vujsenh Yen Dungzlingj Cin miz 6.6 fanh vunz, Bouxcuengh daih’iek ciemq 95%. Daj Ciuhgeq roengzdaeuj, Dungzlingj Cin Bouxcuengh、Bouxgun gak minzcuz gek ranz caemhyouq、gek mbanj doxhuz, doxgyaez youh doxbang.

Dungzlingj Cin daj bi 2013 hwnj, daengx cin hengzguh Cuengh Gun song vah saw sonhag, cin cunghsinhyau lingjdauj dawz beizyangj vunzcaiz “Cuengh Gun cungj rox” guh muzbyauh, guh ndei hong minzcuz gyauyuz, caenhrengz banh daegsaek hagdangz, cobouh saedyienh minzcuz vwnzva gyauyuz caeuq yendai gyauyuz doengzcaez fazcanj.

Bineix 10 nyied 13 hauh dwg ngoenzciet geiqniemh Cunghgoz Sausenhdui laebdoih, Vujsenh Yen Dungzlingj Cin aeu “swnjcienz minzcuz vwnzva, saedyienh Siengjmuengh Cungguek” guh cujdiz banh aen hozdung. Baez hozdung neix cujyau neiyungz miz: It dwg ciepsouh duiyenz moq, vih sausenhduiyenz moq gawjhengz aen yizsi haeuj- doih. Ngeih dwg vwnzyi byaujyenj. Cezmuz miz yungh Vahgun bujdunghva daeuj yienj, youh miz yungh Vahcuengh daeuj yienj. Sam dwg Vahcuengh caizyi canjyenj doxdax. Mboengqgonq gak aen siujyoz guh le gangj byauhcunj Vahcuengh doxdax, miz 13 boux senjsouj ndaej haeuj baezneix daengx cin doxdax. Baez Vahcuengh caizyi doxdax neix cujyau neiyungz miz doxdax baij yienj buhvaq minzcuz caeuq doxdax gangjgoj Vahcuengh.

Cin cunghsinhyau Veiz Gyahmeiz yaucangj doiq guh Cuengh Gun song vah saw gyauyuz gig miz saenqsim, de naeuz: “Cin raeuz hengzguh Cuengh Gun song vah saw sonhag, couhdwg aeu guhbaenz aen gihdi beizyangj vunzcaiz ‘Cuengh Gun cungj rox’, hawj lwglan Bouxcuengh raeuz hag rox Vahgun, youh mbouj lumz gij vwnzva bonj minzcuz.”

(Ganh Sozvwnz Veiz Gyahmeiz Luz Mingzdiz Lij Cin/甘说文、韦家梅、陆鸣笛、李振)