□ Hoz Saubangj sij Cinz Siengzcouh Liuz Gingliuj Cinz Siengzgen hoiz

Veiz Gozcingh caeuq gij goengdaeuz dangjveij ndaw gih wnq cungj mbouj doengzeiq dingz guhfap neix. Veiz Gozcingh gangj: “Gyoebcomz doih hung bae ngonz- yawj, it aeu ngaenz, ngeih aeu seizgan, hoeng lij mbouj itdingh hag rox gingniemh. Aenvih ndaem naz dwg hangh hong sijsaeq ndeu, daj genj ceh、coq bwnhdaej、cimq ceh、doek ceh、ndaem gyaj daengz ndai naz、coq bwnh、guenq raemx、baiz raemx、dak naz daengj doenghgij hong guenjleix dajndaem, hoh dawz hoh, hohhoh cungj miz yozvwn, mbouj dwg bae ngonzyawj geij ngoenz le cix hag ndaej rox.” De cawjcieng, youz swcigih ok ngaenz, daj Cauzsan cingj boux ak hong dajndaem daeuj, faenbied bae gak dieg swnghcanjdui gauj nazyienghbanj. Gauj nazyienghbanj youz swnghcanjdui ok naz caeuq gij doxgaiq bietaeu dajndaem, hoeng ndaem naz daj goek daengz byai cungj youz gij bouxak Cauzsan gag guhcawj bae ndaem. Swnghcanjdui aeu genj boux ndangdaej ndei、guh hong ak haenx bae gaenban dajndaem caeuq hagsib. De naeuz: “Doenggvaq gauj nazyienghbanj, daj ndaem daengz sou, cungj hawj bouxak Cauzsan caenfwngz gag son gonq, boux gaenban haenx yaengyaeng hag, yienghneix cij son ndaej sijsaeq, hag ndaej saedcaih, gij gingniemh Cauzsan cij ndaej bienq baenz gij doxgaiq vunzlai yawjraen haenx, caencingq miz guhyiengh caeuq doidoengh cozyung.” Gij cangzveij dangjveij ndaw gih caeuq gij goengdaeuz nungzyezdingh cungj doengzeiq yigen de.

Bi 1964 ndwen 8, Swcigih Dangjveij cingqsik yiengq Guengj- doeng Swngjveij cingjgouz bang- coengh. Veiz Gozcingh caemh gangj gij naemjfap Guengjsae hawj Dauz Cau dingq, Dauz Cau naeuz: “Aen banhfap neix ndei, gou dongx Cauzsan Digih gonq, gyoengqde dingh dingj- rengz sou.”

Doiq gij iugouz Guengjsae, gij goengdaeuz gak gaep Cauzsan Digih cungj gig yawjnaek. Gyoengqde dangq ndaej bae coengh Guengjsae dwg hangh hongrap miznaj ndeu, gig nyinhcaen bae genj bouxak yaek baij okbae haenx, caemhcaiq son’gyauq gyoengqde, anbaiz ndei saeh ndaw gyoengqde, hawj gyoengqde ndaej simnet youq Guengjsae son dinfwngz. Seized, gyoengqde lij baij gvaq veivwndonz, faenbied bae daengz Guengjsae gak aen diemj cunz gij bouxak gyoengqde.

(caengz sat)