(ciep geizgonq)

Vangz Guhdoih cingq ngeix dwk, duz roegga daxmeh youh gamz ndaej duz non ndeu mbin dauqma, danhseih, mbat neix de mbouj leix gij roegga iq haenx, de cix hamj gvaq roegga iq yiengq baihgwnz mbin bae, dawz duz non saek haeuj ndaw bak duz roeggalaux gaenq bwn loenq haenx bae, yienzhaeuh ngon dwk:“Va,va,va, roegga caen hauqswnh, meh laux mbin mbouj ndaej, gaeb non ma gueng meh, aenvih daxmeh gueng gou hung, sam cib ngoenz faeg gyaeq byom yaek dai, song ndwen ciengx lwg baeg dai meh, gaej hag lajfaex daeggo vaih, caet bi lij gwn cij daxmeh, majhung cix dawz daxmeh moeb, cukseng mbouj cig duz ndeu, raeuz hag gwnzbya duz yiengz iq, lij caengz gwn cij couh sien gvih, didi cij meh, aen ciengx gvangq lumj haij, gou mbouj bauqdap byawz bauqdap.”

Vangz Guhdoih dingq le gig najmong, naj nding daengz goek hoz, cingq mbouj rox baenzlawz gaijduet seiz, daxmeh de soengq ngaiz daeuj hawj de lo, yienghneix, de sikhaek ndwn hwnjdaeuj, daihsing hemq naeuz:“Meh, doiq mbouj hwnj, gaxgonq gou loek lo, danhseih seizneix gou aeu dauqcungz guhvunz, daj seizneix hwnj, gou aeu gya boix doiq mwngz ndei, cingj mwngz caj yaep ndeu, gou sikhaek bae ciep mwngz.” Gangj sat, de couh cung roengzbae ciep daxmeh.

Danhseih, daxmeh de rwznuk, mbouj rox Vangz Guhdoih gangj gijmgaz, cij goq ngaemgyaeuj byaij loh, de fwt ngiengx gyaeuj, yawjraen daeglwg de gaenq daeuj daengz dangqnaj, laihnaeuz youh daeuj moeb de, lau dwk cienq ndang couh buetdeuz.

Vangz Guhdoih raen daxmeh de lau swhgeij couh lumj nou raen meuz ityiengh, engqgya gvaiq swhgeij lo, de nai daxmeh: “Meh, mwngz gaej buet ha, gou caiq hix mbouj moeb mwngz lo, gou dauqcungz guhvunz, gou aeu ndeindei doiq mwngz, rouh gij coih gaxgonq gou.”

Byawz rox, de mbouj gangjvah lij ndei, de baez hai bak, daxmeh lau deng haep, siengj buetdeuz, sawqmwh, de baez yamq hoengq, laemx ndaw gumzlaeg bae, dai bae lo.

Vangz Guhdoih baez raen, coemj hwnjbae, umj daxmeh hwnjdaeuj, heuh mbwm hemq deih naeuz: “Meh, mwngz gaej dai ha, gou lij caengz bauq aen mwngz ne!” Gangj sat, couh umj daxmeh hwnjdaeuj, yiengq ranz Cangh sienyw Mbanjbakva buet bae, youq buenq roen, de rengz gaenq sat, heiq yaek goenq, vunz gaenq bibuengq lo. Seizneix, miz ndaek rin ndeu laeuz din de, de baez dingjdaeuj, ringx laj roen bae, bungq deng ndaek rin hung ndeu, uk dek dai lo.

Roegga gwnzfaex raen yaepyet duet bae song diuz mingh, sikhaek moenghmangh lo. Yienzlaiz, duz roegga dwg roeggasien gwnzmbwn, dang Vangz Guhdoih nyoegnyamx daxmeh gij mingz rwix de cienz daengz gwnzmbwn seiz, dienvuengz bonjlaiz siengj baij byaj bag de bae suenq lo, dwg duz roeggasien cingjgouz hawj de aen gaijcingq gihvei. Dienvuengz rox roeggasien bak leixhaih, cij minghlingh de daj gwnzmbwn roengzdaeuj gyauyuz gamjvaq de, siengj mbouj daengz roeggasien cij ok di geiqmaeuz iq, Vangz Guhdoih couh deng gamjvaq lo, engq ngeix mbouj daengz, de cij dwg siengj gaujyen Vangz Guhdoih mbat ndeu, Vangz Guhdoih cix song mehlwg saet mingh lo, caen dwg mbwn guhrwix lij lix, vunz guhrwix mbouj ndaej lix ha. Danhseih, saehcingz gaenq dwg yienghneix, roeggasien roxdaengz ienqhoij hix mboujmiz yungh lo. Ndigah, de cij danq gaemz- heiq, ngiengx naj coh gwnzmbwn hemq gaga hwnjdaeuj.

Daengx biengz roegga dingq daengz roeggasien swenj le, gip- muengz daj gak gungx mbin daeuj Mbanjbakva doxcomz, gyoengqde gamz namh dawz Vangz Guhdoih song mehlwg moek lo.

Vangz Guhdoih dai le, gij hoenz de gaen roeggasien bae daengz diendangz, de youq baihnaj saenz mieng dwk:“Vihliux rouh coih ciuhgonq ma, gou nyienh ciengxlwenx buenx youq henzndang daxmeh, hawj daxmeh guhhoiq.” Dienvuengz deng gij caensim de gamjdoengh lo, couh dap’wngq de. Yienghneix, daj ndaw moh Vangz Guhdoih song mehlwg de maj ok gorungz caeuq gogaeu, gorungz haenx dwg daxmeh de bienqbaenz, gogaeu geuj youq gwnz gorungz haenx dwg Vangz Guhdoih bienqbaenz. Vangz Guhdoih guh gij hanbak de, cien lai bi daeuj, de yungh gij lwedgaeu de bae ciengx daxmeh, aenvih daxmeh de——gorungz cien bi neix, dienvuengz cij hawj de bak bi sengmingh, gij rag de caeux couh dai lo, de aeu gij yingzyangj haenx dwg baengh gogaeu hawj gij lwedgaeu haenx, de seizneix lij dwg yienghneix mwnnoengq, cienzbouh dwg baengh lwg de——cien bi gaeulwed dawz gij lwed swhgeij mbouj dingz dwk soengq daengz ndaw ndang de.

Gyoengqvunz cingqdwg deng aen gojsaeh neix gamjdoengh, cij dawz go gaeulwed cien bi neix hen roengzdaeuj.

(sat)