Moix bi youq aen geiqciet seizcin caeuq seizcou, vunz Dungcuz Sanhgyangh Dungcuz Swciyen cungj hoengh banh vaiz doxdaemj doxdax hozdung, yinx vunz dangdieg caeuq hekyouz bae humx yawj, nauhyied raixcaix.

Vunz Dungcuz gyaez aen hozdung vaiz doxdaemj doxdax, dwg aen hozdung conzdungj Dungcuz, gaenq miz geij bak bi lizsij. Riuz naeuz, ciuhgeq vunzraeuz lij caengz rox ciemzgyaj ndaemnaz, doeklaeng miz song duz vaizdaeg buet haeuj ndaw nazgyaj doxdaemj, caij gij go- gyaj laemx vang laemx raeh vaih bae haujlai, bouxcawj gaiqnaz mbouj miz banhfap, cijndei daj gij go’gyaj haemq deih haenx ciemz aeu mbangj go’gyaj bae dieg duzvaiz caij vaih de ndaem, doeklaeng gaiq naz neix ndaej fungsou lo. Vunzraeuz couh baenzneix rox le ciemzgyaj ndaem- naz. Vih geiqniemh hangh saeh hung ndaemnaz neix, gyoengqvunz cing song duz vaizdaeg daeuj doxdaemj, bi dem bi couh baenz le fungsug sibgvenq.

“Ciet vaiz doxdaemj” dwg youq moix bi liggaeuq ndwenngeih ndwensam roxnaeuz ndwenbet ndwengouj roeb ngoenz “haih” cix banh. Diegciengz vaiz doxdaemj ciengzciengz laeb youq ndaw ruqdah haemq gvangq henz mbanj, geij bi gonq yienhsingz lij cienmonz guh le aen ciengzdoxdax vaiz doxdaemj ndeu. Ngoenzciet gaxgonq, gyoengq bouxcoz couh boq aenvenz bae aen mbanj wnq ra iu ndei doxdax doiqfueng, guh ndei gak cungj hong bwh. Youq henz aenriengh duz vaizvuengz yaek camgya doxdax haenx, vunzmbanj roq gyonglaz boq venz cit bauq, nauh baenz ngoenz baenz hwnz. Banhaet ngoenzciet, cuengq sam sing bauqdiet le, bouxcawj cing “vaizvuengz” youq ndaw sing gyonglaz caeuq sing venz byaij haeuj ndaw ciengz doxdax. Seizneix, caenh raen baenz doih baenz doih vunz ndaw fwngz gaem gvegim、fagfouj, yaengx gak cungj geiz lai saek, doxriengz dwk byaij haeuj ndaw ciengz caemhcaiq hopngomx byaij sam hop, suenq dwg “yizsi haeuj ciengz”, caemh heuhguh “caij ciengz”. Riengzdwk, gak aen doih dinghdingh cing duz “vaizvuengz” bonjfaenh, yaengx gaiq bogfeiz, cajdeq doxdax. Sing bauqdiet baez yiengj, gyoengqde couh bau gaiq bogfeiz okbae, song duz vaiz camgya doxdaemj haenx couh daj song gyaeuj yat bongh okbae, song aen gyaeujvaiz “dung” sing hung ndeu couh doxdaemj hwnjdaeuj, mbangjseiz duz ndengj duz doenq, mbangjseiz doxdingj daemx youq mbouj faenhai. Gyoengq bouxyawj caemh riengzdwk hemq mbouj dingz, daengx ciengz haenqhwd nauhyied. Ginggvaq buekdaemj geij mbat le, duz hingz ndaej longz fan baengznding ndeu youz bouxcawj cing dwk byaij hop he le byaij okbae. Duz saw haenx couh camj di lo, gij geiz aen doih de deng gyoengq dahsau doiqfueng ciengjdued bae liux. Gvaq geij ngoenz le, gyoengq dahsau soengq gij geiz haenx bae hawj mbiengj saw, ndaej daengz gyoengq daegmbauq aen mbanj neix dakdaih, buenx gyoengq dahsau ciengq golaux, yaek doxbiek seiz lij boq venz diuq foux soengq ok mbanj, soengq laex rouh geiz ma.

“Ciet vaiz doxdaemj” ciengz- mienh hungloet, ndeiyawj mizyinx, haenqrem hoenghhwd, hawj vunzlai dangdieg yawj mbouj rox mbwq, caemh yinx gyoengq hekyouz ndaw guek rog guek bae yawjngonz, doengzseiz lij ndaej yawjngonz gij fungsug fungcingz dangdieg dem, caemh sim’angq raixcaix.