Mboengqgonq, Gunghcwngz Yauzcuz Swciyen youq ndaw yienh Vwnzvuj Gvangjcangz gawjbanh ciengz fouxlienhndang Yauzcuz doxdax ndeu. Baez doxdax neix, aeu “hungzyangz minzcuz vwnzva” guh cawjdaez, muzdiz dwg hungzyangz minzcuz conzdungj vwnzva, baijok gij cingsaenz funghmau ginzcung mbanj Yauzcuz gyaez dangj、gyaez guekcoj, giendingh byaij diuz loh seveicujyi Gungguek daegsaek haenx, caenh’itbouh doidoengh Yauzcuz vwnzva fazcanj, fungfouq ginzcung cingsaenz vwnzva swnghhoz, vih mbanj Yauzcuz gensez huzndei gyaeundei haenx comz rengz. Gyoengq ginzcung daj dak yangh (cin)、 mbanj、segih daeuj, caez hwnj daiz diuqfoux, aeu diuqfoux Yauzcuz baijok yienghsiengq moqsak lwgminz Yauzcuz, gikfat gij ndiepcingz daihgya caez caep “siengjmuengh Cungguek” haenx, ciengzmienh hoenghhwd nauhyied, gamjdoengh simvunz.

Fouxlienhndang Yauzcuz dwg bouxbien dang- dieg dawz “fouxgaeuyiengz” 、 “fouxvenz” daengj gij foux Yauzcuz neix caeuq fouxgvangjcangz giethab hwnjdaeuj, bien baenz fouxlienhndang Yauzcuz, de baugvat 《Fouxgyongraez》、《Fouxyouzcaz》. Gawjbanh fouxlienhndang Yauzcuz doxdax hozdung, hawj ndawsingz lajmbanj ginzcung vwnzva hozdung demgya neiyungz moq, yienh’ok aen gizmen ndei “ndawsingz lajmbanj dox gyauhliuz、dox yiengjsouh vwnzmingz”、“daengx sevei huzndei fazcanj” ndeu.

(Cwng Ciminj Cuz Canghyi)