□ Hoz Saubangj sij Cinz Siengzcouh Liuz Gingliuj Cinz Siengzgen hoiz

Veiz Gozcingh 50 nienzdaih youq Baekging ngonz gvaq daiz heiqvah 《Vwnzcwngz Gunhgcuj》, miz aen ciengzmienh soengqcaen ndeu, doihguhlaex dawz haujlai hongdawz maenhndei Bouxgun、ceh daengj doxgaiq buenxhaq bae Sihcang, gijneix hawj de geiq ndaej gig maenh. Gij dinfwngz swnghcanj senhcin caeuq guh vwnzva baedauq, coengzlaiz cungj dwg gij banhfap vunzloih gouz baenaj haenx. Seizhaenx de naemj, dangh- naeuz ndaej daj dieg Cunghyenz yinx gij gingniemh maenhndei caeuq gij dinfwngz gunghyi maenhndei daeuj Guengjsae nei, cix ndei raixcaix lo! Seizneix de youh ngeix, danghnaeuz ndaej yinx gij dinfwngz ndaem haeuxnaz maenhndei dieg Cauzsan haenx daeuj Guengjsae nei, daengx gih ndaem haeuxnaz cix ndaej daezsang daengz aen suijbingz moq lo.

De lwnh aen naemjfap neix hawj Anh Bingzswngh gonq, aenvih goeng neix ngamq daj Guengjdoeng diuh daeuj mbouj geij nanz, sug gij saeh Cauzsan, seizneix youh dwg faenguenj nungzyez.

Anh Bingzswngh naeuz: “Cauzsan ndaem haeuxnaz youq Guengjdoeng soqlaiz maenhndei, youq daengx guek caemh ak lai, bi 1955 youq Diegbingz Cauzsan cix ok le daih’it aen yienh mouxcanj cien gaen daengx guek ndeu. Gyoengqde ndaem naz, caencingq rom ndaej dauq gingniemh baenzsug ndeu. Hag rox gij gingniemh gyoengqde, dancanj raeuz goj ndaej daezsang haujlai bw.”

Gyauz Yaujgvangh、Vuj Cinnanz、Ho Hihmingz、Cinz Yinggih cungj nyinhnaeuz, hagsib Cauzsan dwg aen cawjeiq ndei ndeu, cawjcieng vaiqdi bae lienzhaeh Guengjdoeng.

Hagsib gingniemh diegrog, gij guhfap seizde hingq haenx, dwg baij vunz bae gizde ngonzyawj. Gij bumwnz nungzyez caemh miz vunz cawjcieng, youz swcigih gyoebcomz gij daibyauj ganbu caeuq vunzguhnaz digih、yienh haenx, faengeiz faenbae doxlwnz bae Cauzsan ngonzyawj hag- sib.

(caengz sat)