龙利梅 赖政良 覃光扭 收集翻译

Gwnz Byabahdwz maj rim gaeu- lwed, gaeu neix raemx saeknding, lumj lwed vunz, cienzgangj danghnaeuz yungh gaeulwed maj bak bi doxhwnj haenx daeuj bop laeuj, vunz yaek dai lo get gaemz ndeu couh rox fanj lix, get song gaemz couh rox nyinz doeng ndok soeng, bak bingh cawz goek；get sam gaemz daengx ndang hoengzmaeq, daengx naj ronghsien; get seiq gaemz couh rox rengzrwd, gij rengz naengz yut bya gwed dingj. Goengyauq gaeulwed baez cienz ok, gyoengqvunz sikhaek doxcaenx doxnap hwnj bya bae, mbouj geij ngoenz, rim bya gaeulwed cienzbouh deng beng caez lo, mboujdanh bak bi gaeulaux beng bae mbouj maj, lienz gij gaeu oiq haenx lij caengz dij ywyungh hix lienz rag vat deuz lo, doeklaeng, gyoengqvunz lienz gij namh maj gvaq gaeulwed haenx cungj dawz baema fuglaeuj lo.

Hoeng, cunggyang Mbanjbakva miz gorungz hung cien bi nanz ndeu, cib boux vunz cij got ndaej doh, go faex neix sang yaek daemj mbwn, nga lai mbaw nyaengq, daj gizgyae yawj, couh lumj aen liengjheu hung ndeu, dawz gaiq dieg haj moux hung dangj ndaej ndaetfwdfwd, gwnz gorungz geuj rim gaeulwed, gaeude hung lumj gavaiz, raez miz bet ciengh, yungh ribfwngz menhmenh mbik, gij lwed de couh lumj raemxmboq nyoenx ok, ciuq naeuz gij gaeu neix dwg go’gaeu ndawde go ceiq ndei, danhseih cix mbouj miz vunz aeu de, cig daengz ngoenzneix de lij maj ndaej gig ndei, gyoengqvunz mboujdanh mbouj sienghaih de, lij dawz de dangqguh saenzlingz, ngoenz- ngoenz bae caeqbaiq de, neix dwg vih gijmaz ne?

Yienzlaiz, go gaeulwed cien bi neix, miz aen gojsaeh mbouj doengz bingzciengz ndeu.

Cienznaeuz, gig nanz gaxgonq, byonghbya Byabahdwz miz ranz vunz ndeu, meh ndaw ranz dwg boux mehmaiq, vunz heuh de guh Doih daxmeh, Doih daxmeh miz boux lwgdog ndeu, heuhguh Vangz Guhdoih, Vangz Guhdoih lij coz seiz caeuq daxmeh doxgauq, danhseih, Byabahdwz daiq byom lai, Vangz Guhdoih yienznaeuz ngoenzngoenz ok rengz guhhong, hoeng seiqcib bi lo lij gig hojndoq, aeu mbouj ndaej mehyah. Sug vah gangj, mbouj miz mehyah mbouj naengz an’sim, mbouj miz lwgnyez mbouj naengz roengzrag. Vangz Guhdoih aeu mbouj ndaej mehyah, ciemhciemh sim couh doeknaiq, eiq couh gyoet, vunz couh bienq vaih lo, mboujdanh ngoenz beij ngoenz gik, lij ciengzciengz vih gij saeh saepsoiq haenx ndaq moeb daxmeh. Doih daxmeh deng moeb lau lo, moix ngoenz cungj dwg siujsim yupyup fugsaeh daeglwg de, hoeng, lij dwg ngoenzngoenz deng moeb ndaej naeng heu naj foeg.

Miz ngoenz ndeu, Vangz Guhdoih daengz gwnzdingj Byabahdwz ndaem haeuxyangz, sawqmwh dingqnyi laj bya miz vunz ciengq fwen naeuz: “Nuengx dwg sam nyied byaek, mbouj mbaet hix hai va, nienzgeij valala, mbouj biuz hix bienq laux; daengngoenz hoengz- doengdoeng, mbouj miz mehyah guh maz hong, mingh caeuq mbwn doxhaek, mbouj ninz hix hausak.”

Vangz Guhdoih dingq le, roxnyinh doxdoengz, de ngeix: Swhgeij cungj seiq cib bi lo, lij aeu mbouj ndaej mehyah, gij saedceij neix lij mizmaz ndei gvaq, gou lij ndaem haeuxyangz guh gijmaz, iek dai suenq lo! Yienghneix, de gveng faggvak, daengz laj gorungz bae ninzgik lo.

Ninz ha ninz ha, sawqmwh dingqnyi gwnz faex miz duz roegiq heuh, de ceng hai da baez yawj, cij raen miz duz roegga byom ndeu hamz duznon ndeu mbin daengz gwnz gorungz, gwnz gorungz miz rongz roegga ndeu, ndaw rongz miz seiq duz roegiq bizlolo, gyoengqde cungj buekmingh bek gij fwed ngamq maj bwnyungz haenx, aj gvangq gij bak henj de, ceng doiq roegga byom heuh dwk：“Daxmeh, gou iek, daxmeh gou iek!”

Roegga byom dawz duz non saek haeuj ndaw bak duz roegga iq, youh gipgip muengzmuengz mbin okbae ra duz non lo.

Ngoenzhaenx banhaet, roegga daxmeh gaeb ma bak lai duz non, mbin baedauq bak lai mbat, danhseih moix baez cungj deng roegga iq gwn sat lo, cij miz faenh naetnaiq louz hawj swhgeij, de ciengxlwenx dwg din ngamq nem rongz youh gipgip muengzmuengz mbin okbae bang lwg de ra gwn lo, danhseih gyoengq roegga iq cix lumj seiq aen congh laeg, baenzlawz gueng hix dienz mbouj imq gij dungx gyoengqde.

Vangz Guhdoih yawj le, gig gamjdoengh, de ngeix: Gou lij iq seiz, hix dwg yienghneix caj aeu gwn, daxmeh gou hix dwg yienghneix sinhoj vih gou ra gwn, baenzneix dawz gou ciengx hung, hoeng, gou seizneix mboujdanh mbouj bauqdap gij aen- cingz daxmeh, lij ciengzciengz moeb de, gou caen mbouj dwg vunz ha. De yienghneix siengj dwk, couh roengz gietsim hawj daxmeh nyinhloek, daj seizneix hwnj doiq daxmeh ndei di, ndeindei bauqdap gij aencingz daxmeh.(caengz sat)