Youq henz funghgingjgih Gamj- caw Hozciz Si Ginhcwngzgyangh Gih Luzgyaz Cin Dandung Cunh, miz aen mbanjmoq minzcuz heuhguh Mbanj- gyaeqndaw ndeu bya loeg hophumx seiqlengq, funghgingj gyaeundei, ndaw mbanj ranzranz miz caujgiciz, ranzranz doeng swlaizsuij、doeng bilu densi, 25 doengh ranzlaeuz yiengh- siengq daegbied haenx ndoj youq ndaw raemhfaex, roen mbanj youh gvangq youh bingz, gwnz roen、gyanghongh、ndaw ranz doxgaiq baij ndaej ndeicup, ronghsag cinghseuq, fuk veh doenghnaz lajmbanj gyaeundei ndeu yaprub haeuj ndaw lwgda vunzraeuz.

Mbanjgyaeqndaw dieg youq baihsaebaek Ginhcwngzgyangh Gih, liz sigih 11 goengleix gyae. Aen mbanj gaeuq gaxgonq aenvih youq laj dinbya, souh gij haemzhoj reihnaz siuj youh ciengz deng rin daenz haenx lai raeuh, vih gaijbienq gij yiengh gungzhoj neix, 2005 nienz baihgwnz mizgven bumwnz ra ngaenz bangbouj caeuq ciuq aen yenzcwz “vunzmbanj gag comz gag okrengz, gak gaep cwngfuj bang bouj di” neix, comz ngaenz 400 lai fanh maenz youq baihnaj Gamjcaw liz dieg mbanj gaeuq goengleix roen gyae de, ciuq gij dajveh caeuq iugouz lajmbanj moq seveicujyi, giethab gij ndeicawq dangdieg miz raemx lai caeuq habngamj guh lijyouz de, guh aen gveihva doedok daegsaek minzcuz youh ndei youq ndeu, guh baenz le aen mbanjmoq swnghdai vwnzva minzcuz miz 25 doengh ranzlaeuz gij yiengh gig ndeiyawj youh daegbied ndeu, moix aen ranz dieg gvangq 90 bingzfanghmij sam caengz gungh miz 240 bingzfanghmij; caemhcaiq guh baenz aen laeuz vwnzva minzcuz ndaej guh’angq、lienhndang、hwnj- dangz、yawjsaw ndeu. Ndaw mbanj roensuijniz bingzbwd, roeniq bu ciennding, ndaemganq diegnywj, lij guh le lanzgiuzcangz、daizheiq daengj dieg dwkgiuz yienjheiq haenx, hawj vunzlai youq ndaw aenmbanj vanzging gyaeundei、gizdieg nem doxgaiq guh hozdung yienghyiengh miz caez de angqyangz vuenyungz gvaq saedceij.

Senj haeuj mbanjmoq le, gyoengq vunzmbanj youq gak gaep dangjveij cwngfuj nem mizgven bumwnz cihciz caeuq bangcoh lajde, ciuq saedcaeq ndaw ranz mbangj bae guh siengmuengx ciengx bya, mbangj bae gwnz bya ciengx roeggae caeuq gaeqndoeng, mbangj haifat gij hanghmoeg lijyouz yawj gingj bin bya caeuq banh “nungzgyahloz”, mbangj bae ndawsingz ra hong guh, souhaeuj ndaej demlai. Seizneix, ndaw mbanj miz daemz ciengx duzngozyiz gyanghongh 12 aen, aenrungz roeg- gae caeuq gaeqndoeng 1000 bingzfanghmij, daemz ciengx duzfw 40 lai moux, byaij hwnj diuzroen daegsaek “aeu canjyez daiq fouq, aeu lijyouz coi fouq, okrog guhhong bang fouq” neix. 2012 nienz, daengx mbanj moix vunz bingzyaenz cinghsouhaeuj gaenq dabdaengz 5247 maenz. Geij bi neix daeuj, Mbanjmoq Minzcuz Gyaeqndaw gonqlaeng aeundaej “Guengjsae Cib Daih Aenmbanj Yinxvunz”、 “Swcigih Veiswngh Vwnzmingz Cunh”、“Swcigih Swnghdai Vwnz- mingz Cunh”、“Hozciz Si Minzcuz Doxgiet Cinbu Mozfangih” doenghgij yungzyi miznaj neix, baenz le aen sifancunh Hozciz Si hwnjguh lajmbanj moq seveicujyi ronghyab ndeu.