Roegyengj bwn lengj sing ndei, hag rox gak cungj singyaem, dwg mingzsingh duzroeg.

Ngoenz neix, roegyengj hwnj gig caeux, cinjbei hawj daihgya yienj hagsing. Gizgyawj caeux miz geij duz roeg maengx bungj de haenx, caemcingx caj dwk.

Seizneix, “ya” sing ndeu, aen ngaeuz ndaem he mbin gvaq, dwg duz roegga.

Geij duz roeg haenx goemq rwz hwnjdaeuj, naeuz: “Rwix dingq dai lo!” “Duz roegga dairaq neix!” “Mingzsingh yaek byaujyenj, de yienghneix mbouj dwg daeuj nyauxluenh ma?” Roegyengj dingq le hix mbouj angq lo.

Douq iq daeuj lo, manaez daeuj lo, haujlai doenghduz cungj daeuj lo, lienz yiengzbya daxgoeng hix daeuj lo.

Byaujyenj hainduj lo.

Seiz byaujyenj yaek sat, roegga mbin dauqma lo. Geij duz roeg haenx swenj：“Duz roegga, ga ga ga, ndang uq ndaemndanda!” “Duz roegga, ga ga ga, mbouj gvai mbouj lingz ngaengqnganga!”

Roegga ndaw bak gamz non, lumj mbouj dingqnyi nei mbin baema lo.

Gig vaiq, roegga mbin dauq daeuj lo. De doiq daihgya gangj: “Doiq mbouj hwnj, seiz okbae hoengh daihgya lo, gou gaenj okbae ra doxgaiq hawj bohmeh gwn.”

Yiengzbya daxgoeng naeuz: “Roegga, dou mbouj gvaiq mwngz. Mwngz roxsoq youh coengmingz maenh’ak, dwg boux lwgnyez ndei.”

Gyoengq roeg mwngz coenz gou coenz, cungj gangj roegga mizmaz coengmingz maenh’ak.

Yiengzbya daxgoeng naeuz: “Roegga rox gueng bohmeh laux, gig roxsoq, cigndaej raeuz hagsib. De hix rox hagsing, lij rox cabheiq, mbouj beij roegyengj yaez ne. ”

Yienghneix daihgya couh yoengx roegyengj caeuq roegga doxdax baez ndeu.

Roegga naeuz: “Ndei ba, couh suenq hawj daihgya boizlaex ba.”

Roegyengj lienh hagsing haemq sug, roegga dangyienz beij mbouj ndaej de lo, hoeng daihgya hix gig haenhndei.

Ciep roengzdaeuj dwg doxdax cabheiq lo.

Roegyengj mbin gwnz faexsang bae, song cik nyauj gaem ngefaex ndaet, baez daengj hwet soengx hoz, guh le gak cungj dungcoz nanz.

Lwnz daengz roegga lo, roegga naeuz, heuh nuengx de caeuq baengzyoux daeuj guhdoih yienj lai ndei, daihgya doengzeiq lo.

Roegga swenj sing ndeu, nuengx de gamz gaiq suliu hoengz ronghrikrik ndeu, daiq geij duz roegga daeuj lo.

Roegga gamz suliu mbin hwnj- daeuj, gyoengq roegga hix cungj mbin hwnj. Roegga mbin gig vaiq, sawqmwh ajbak, suliu doek roengzdaeuj, nuengx de lingzgiuj ciep dawz, youh cienz hawj duz wnq, yienghneix duz cienz hawj duz, couh lumj dwk giuz lwggyamj nei.

Daihgya dopfwngz robrob, raq dem raq.

Gyoengq roegga dingz youq gwnz nyefaex. Daihgya laihnaeuz yienj sat lo.Sawqmwh, roegga sohswd cung hwnj fwj bae, caiq doek roengzdaeuj, ciepdwk fan dingjdaeuj, baenq- ndundu, naj coh gwnz mbin, guh gak cungj yienghceij, doq yienj doq angq hemq.

Daihgya yawj ngaez lo, cungj geiq mbouj ndaej dopfwngz lo.

“Saenzgeiz lai lo!” Roegyengj haenh naeuz.

Byaujyenj sat le, daihgya angq humx hwnjbae. Yiengzbya daxgoeng naeuz:“Daihgya raen loba? Geiq maenh: Yawj vunz mbouj ndaej cij yawj yienghsiengq.”

Gij roeg riu roegga haenx, cungj yiengq roegga boizlaex、 angqhoh.

（Ganh Sozvwnz/甘说文）