Ngoenzneix cuengqhag dauq ranz, gou hai daehsaw couh guh cozyez lo. Cingq haeujsim guh cozyez seiz, dingqnyi sing “da da” he, laxlawz dwg duzmeuz ranz gou rag diuzsai daehsaw.

Duz meuz nyaeq neix ngamq ndaej bi ndeu, de gig dwggyaez, danghnaeuz mwngz yawjraen de, itdingh maij de. Gwnz aemq caeuq diuzrieng de cungj dwg saek henj, lumjbaenz daenj geu buhhenj he nei, aen ndang gizwnq duzmeuz cungj dwg hausagsag. Song lwgda de youh hung youh luenz, cingsaenz raixcaix. Song aen rwz de soemdikdik, baez dingqnyi baihrog miz singyaem couh doenghyaebyaeb. Bajbak nyaeq de cungj heuh “miuj miuj” mbouj dingz mbouj duenh, gaej yawj bak de nyaeq, baez ajngab saek aen mak he roengz bak bae cungj ndaej. Seiq diuz din de byaij roen cungj mbouj ok sing, laxlawz lajdin de miz nohdemh ne. Gij nyauj de gig raeh, danghnaeuz byawz hangz de, de itdingh coemj gvaqbae.

Bingzseiz gou baez heuh “meuz meuz”, de sikhaek buet gvaqdaeuj, unqswnh dwk diuq haeuj ndaw rungj hawj gou umj. De lumjbaenz boux lwgnyez he nei gingciengz heuh gou umj de ninz.

Duzmeuz gig gvai, de ceiq maij gwn noh gwn bya, baez daengz seiz gwn caeuz, de cungj “miuj miuj miuj” coh mwngz hemq, lumjbaenz gangj :“Gou iek lo， hawj gou di doxgaiq he gwn vei!” Danghnaeuz mwngz hawj noh de, de sikhaek couh gwn cengh, danghnaeuz hawj de haeux ndwi, de yawjyawj le baenzlawz cungj mbouj nyienh roengz bak.

Gou gyaez duz meuz gou, gou maij caeuq de guh baengz- youx.

(haj nienzgaep Veiz Veihdingz)