祈求顺利向往幸福的龙脊梯田梳秧节

□ Lungz Cwng ingj Sinhyungz hoiz

Moix bi geiqciet muengzcungq gonqlaeng, gyoengq beixnuengx Bouxcuengh ranghdieg Nazmbaeklae Lungzciz ndaw yienh Lungzswng haenx, cungj caez comz youq henz naz, angqyangz gvaq aen cietheiq cietroigyaj. Gyoengqvunz ram mbaw- geiz go’gyaj, roq gyong roq laz, comz youq gyang mbanj, bae daengz henz naz, guh caeqbaiq yizsi, eu fwen diuq foux, hawj gij hong ndaem naz nyaengqnyi haenx daiq bae faenh soengset angqyangz ndeu, aeu sing fwen sing angq daeuj mbaenjgouz ndaw bi rumz dingh fwn yinz, aeu gaem youh gaem go’gyaj baijyienh gij siengjmuengh gyaeundei saedceij vuenyungz beixnuengx Bouxcuengh.

Ciuq vunzlaux dangdieg lwnh naeuz, “cietroigyaj” caemh heuhguh “ciethaigyaj”, dwg ngoenzciet conz- dungj ndawbiengz gyoengq beix- nuengx Bouxcuengh Mbanjcuengh Bingzanh daengj cibsam aen mbanj ranghdieg Nazmbaeklae Lungzciz. Aen ciet neix youq seiz Ciuhmingz Ciuhcingh couh hwng guh lo, daengz seizneix gaenq lienzdaemh banh baenz 400 lai bi, moix bi geiqciet muengzcungq gonqlaeng, fwncin baenz raq baenz raq doek roengz naz, ndaw nazmbaeklae hainduj rom miz raemx lo, gyoengqvunz Mbanjcuengh ranghdieg Nazmbaeklae Lungzci couh senj aen ngoenzndei (itbuen dwg ngoenz muengzcungq) ndeu, banh cietroigyaj le nyaengq ndaem naz hwnjdaeuj. Banhaet ngoenzciet, gyoengq vunzmbanj cungj caez comz youq henz “nazmehgyaj”, youz goeng- laux ndaw mbanj caeuq goengsae daiq vunzlai guh caeq “nazmehgyaj” caeuq “mehgyaj” yizsi, goenglaux siu yieng diemj lab, capbaek “mauhnyinz”, caeqbaiq “mehgyaj” duzsaenz baujhoh go’gyaj neix; goengsae cix nam ging boq loxlez、roq gyonglaz mbaenj fuk, siu yieng baiq “mehgyaj” caemhcaiq aeu aen roisaenz “mehgyaj”, roi sam gaem gyaj swnh le bau roengz naz bae, eiqsei dwg daj ngoenzneix doxbae, doenghnaz souh “mehgyaj” baujyouh, gomiuz maj noengq dok lai, mbouj fatbingh, daengzlaeng ndaej fungsou. Riengzlaeng, singbauq (itbuen roek daengz bet sing) yiengj sat le, ndaw nazmbaeklae couh hainduj nyaengq hwnjdaeuj lo: Gyoengq vunzmbanj mbangj gwed cae gwed rauq yien vaiz byaij youq gwnz gij haenznaz utut ngeujngeuj haenx, mbangj dawz vaiz cae rauq, mbangj cix gvanbaz roxnaeuz bohlwg boux rag boux gaem dwk cae rauq; gyoengq mehmbwk mbangj fwngz riengjret dwk ciemz gyaj swiq gyaj cug gyaj, mbangj rap bwnh rap gyaj roengz naz, mbangj gaeuz hwet ndaem naz; gyoengq vunzlaux cix mbouj youq ndwi, mbangj cawj byaek cawj ngaiz soengq daengz henz naz, mbangj aemq lwgnyez bae henz naz bang vanq bwnh bau gyaj…… Daj giz gyae yawj bae, caen lumj fuk veh hung fungsug minzcuz gyaeundei dangqmaz ndeu.

Ngoenzciet, gyoengq vunzmbanj cawz guh yizsi caeqcuengq le, lij guh gij hozdung sengdoengh mizyinx haenx dem, lumjbaenz ndaw naz gaeb bya、ndaw naz ciengj gaeq、ndaw naz baeuh naez doxdax doenghgij hoz- dung neix mizyinx youh angqyangz, vunzmbanj cungj doxcanj camgya; banhaemh, vunzmbanj doxcomz gwn donq ngaizdaizraez ndeu, yienh’ok gyoengq vunzmbanj doxgiet doxhuz. Gwn caeuz sat le, gyoengq vunzmbanj youh daenj gij buhvaq minzcuz moqsupsup haenx comz daengz gwnz diegbingz ndaw mbanj, hopngomx feizdong eu fwen ciengq go diuq foux, ciengzmienh nauhyied hoenghhwd; doeklaeng, gyoengq vunzmbanj bouxboux cungj gaem gaiq bogfeiz ndeu, doxriengz dwk byaij hwnj gij haenznaz nazmbaeklae bae, vunz byaij doenghyubyub, bogfeiz caemh ronghyebyeb, hawj nazmbaeklae yienh’ok aen gingj doengxhaemh “ndaundeiq buenx ronghndwen” ndeiyawj raixcaix ndeu, cigdaengz gyanghwnz cij sanq bae. Ngoenzciet hawj gyoengq hekyouz caeuq boux gyaez ingjsiengq haenx comz bae yawj mbat gaeuq ndeu, sim’angq baenzhwnz.