2014 Nienz Daengx Gih Cuengh Gun Song Vah Saw Yozcenz Lauxsae “Angq Hag

Sawcuengh” Sonhag Geiz Daihsam Beizyinbanh Youq Vanzgyangh Banh Ban

“Roegcak bakdou heuhcacet, angqcoux bouxhek daeuj daengz ranz; eu fwenlohhaiz simcingz sangj, yienh cenj caz hom gingq bouxhek.”

Neix dwg 9 nyied 19 hauh banhaet, gyoengq hagseng Vanz- gyangh Mauznanzcuz Swciyen Swh’wnh Cin Yinzhoz Siujyoz youq bakdou hagdangz eu fwen couxhek, angqcoux gyoengq boux lingjdauj Swcigih Gyauyuzdingh、gyoengq boux lauxhangz Saw- cuengh caeuq gyoengq boux lauxsae Sawcuengh daeuj hagdangz gyoengqde camgya“angq hag Sawcuengh” sonhag beizyinbanh.

9 nyied 19 hauh daengz 20 hauh, 2014 nienz daengx gih Cuengh Gun song vah saw yozcenz lauxsae “angq hag Sawcuengh” sonhag geiz daihsam beizyinbanh youq Vanzgyangh Mauznanzcuz Swciyen Swh’wnh Cin Yinzhoz Siujyoz banh ban. Hozciz Si 19 aen Cuengh Gun song vah saw sawqniemh siujyoz gungh miz 30 boux lauxsae daeuj camgya beizyin hagsib. Gyoengq boux lauxhangz Sawcuengh Gvangjsih Minzcuz Gyauyuz Fazcanj Cunghsinh、Gvangjsih Sawcuengh Yozyau haenx daeuj daengz yienhciengz sonyinx beizyin. Beizyin ngoenzde, Yinzhoz Siujyoz Loz Sauveiz、Cinz Yivangj song boux lauxsae hawj gyoengq lwgnyez yozcenzbanh son Sawcuengh, doenggvaq dohmeizdij canjsi、guhcaemz mizyinx、 gyoeb cihsaw yawj doz、boihdoeg cihmoq daengj lai cungj fuengsik gyoengq lwgnyez haengj guh maij hag neix, hawj gyoengq lwgnyez youq gij gifwn angqyangz ndawde hag doeg singmeh “f、 v、 d 、nd 、n”. Youq gwnz aen dangz sonhag vaiqvued neix, sawj gyoengq lauxsae daeuj beizyin neix dingq ndaej haeujsim lili, bouxboux cungj haenh naeuz gij goq neix ndei raixraix. Baez beizyin neix, cawz le riengzban dingq go le, lij guh baen cuj yenzgiu daujlun、lauxhangz diemj- bingz、conhdiz gyangjco daengj fuengsik lingzvued lai yiengh neix, roengzrengz hawj gyoengq boux yozyenz hag ndaej gij cihsiz haenx rox yungh daengz giz saedsaeh bae.